**** ساعدوا هذه العروسة بحل مشكلتها ولو بسطر ****

[فارس العيساوية]

اقراؤا الرسالة كاملة ومن لديه او لديها حل فليتفضل او تتفضل



بريد المرسل [email protected]

عنوان الرسالة العروس المحطمة

نص الرسالة
أرجو رجاء حار عرض مشكلتي هذه .. مع اخفاء الاميل .. وجزاك الله خير ..
مثل أي بنت أحلم بفارس أحلامي لأبني معه مستقبل رائع .. حب وتفاهم ورومانسية ..
طرق بابي مدحوا فيه كل من حولي ولم يعطوني فرصة أتعرف عليه .. الرؤية الشرعية فقط وكنت خجولة وماركزت فيه
ياليتني ركزت شوي .. هو في مدينة وأنا بمدينه أخرى .. تزوجته لي اسبوعين هالحين .. وياليتني ماوافقت ..
بصراحة أكبر مقلب خذيته بحياتي .. تصوروا مامعه الا الاعدادي و طلع يبيع غنم وبنفسه بعد

وهذا أثر على شخصيته ببساطة وســـــــــــــــــــخ وماايهتم بنفسه ولاأناقته .. ليتني عرفته .. أهلي ماأهتموا الا باصله وفصله وصلاته بس ..
شره يموت بالأكل .. دائماً مهتمل ومشرشح نفسه ..العقال صاير عقالين والشماغ صاير منديل كل الخرائط فيه ..
أعزكم الله ..ينظف خشمه قدامي عادي ويمسحه على أي شئ قدامه موكيت ..كنب عادي .. بصراحة وسخ ومغزز ..
من أول يوم شفت هالحركات ضاق صدري وحام كبدي وصرت أبكي باستمرار
شكيت همي لأمي .بكيت على صدرها ..
نصحتني أصبر عليه وأحاول أغيره وأتودد له ..
وماأنكر انه طيب ومسالم .. لكن مشرشح ومهتمل ووسخ ..
جبت معطرات جسم وأباط . شامبوهات ولوشنات وبودرات جسم .. شمغ وغتر شبابية .. جزم ماركة ..
حتى مكواة البخار شريتها حتى اكويله بنفسي ..
سويت المستحيل لدرجة جبرت نفسي أحممه بنفسي . بالبداية تقبل الأمر مني لدرجة أعلمة كيف يلبس الشماغ
بعدين صار ماله خلق على شئ .. مشكلته يحس اني صاكة عليه من هالناحية
لدرجة طفش من اهتمامي باناقته ونظافته .. وصار يعاندني .. حذف جزم الماركة ورجع يلبس أبو عشرة
وليت حياته منظمه.. فوضوي يحوسلي البيت حوس ..أنظف وأنظم وأعدل وهو بسهوله يخرب ويعاند

حتى الحياة الخاصة أتغزز و تحوم كبدي وماأتحمل .. فيتحول ليلنا لشجار ودمار ..
أمحق عيشه هذا وتوني عروووووووووس (:
أنا ماأحب وجود الشغالات ببيتي وماأرتاح لهم .. جامعية وموظفة و أنيقة جداً وأهتم بنظافتي وأكلي ورشاقتي ..

مدري كيف ابتليت بواحد عكسي تماماً ...
بصراحة صديقاتي وخواتي يتمسخرون على لبسه لدرجة اختي الصغيرة تلبس الشماع والعقال بنفس طريقته
والكل يضحك وأبتسم ولما أجلس لحالي أبكي حرقة .. وتزيد الحرقه اذا شفت شياكة أخواني ورزتهم ..
لاتقولولي الرجال مخابر ماهم مناظر .. هالحين الشكل له دور كبير ..والزوجة الأنيقة تحب زوجها أنيق مثلها
مثلاً لو جالس بمكتبك وفجاءة جاك واحد رزة بشماغ وعقال وبشت وجزمة تلمع وانتم بكرامة
وواحد جاك الشماغ على صوب والعقال عقالين والثوب مهتمل
من تفزله ؟؟!! ويستحق احترامك ..
خلاص ودي يصير نظيف ماعاد أبيه كشخة ..ملييييييييييييت ..

تصوروا لو ماأقوله اخلع ثيابك عشان أغسلهم وتروش والبس النظيف كان ماأهتم
مرة انشغلت عند أهلي بسبب مرض أمي ولما رجعتله بعد ثلاثة أيام لقيت نفس اللبس اللي تركته فيه عليه

انا في دوامة الوحدة تتزوج عشان ترتاح وانا جبت الهم لنفسي ..ساعدوني بالله
لأن الطلاق بين عيوني ناويه الخلع خلاص وصلت طريق مسدود ..

شفوووولي حل بالله .. أكيد أراءكم رح تنفعني ..

أختكم / العروس المحطمة

أختي العروس المحطمة وضعت رسالتكِ كما هي

وان شاء الله الأخوان والأخوات مايقصروا وأسأل الله يسعدك ..