01-09-2007, 05:16 PM
|
#1 | |
|
عيساوي مبدع
|
السلام عليكم ورحمة الله وبركاته القصة منقولة للأمانة و هي لكاتبتها صاحبة الكلمة هي مكتوبة باللهجة الخليجية بس اي كلمة ما بتعرفو معناها انا بالخدمة . . ماذا تخفي لنا الأيام بين ثناياها فرح .. حزن .. الم .. امل .. لقاء او ربما فراق ..... سأنثر لكم حروفي في قصتي الاولى ؛¤ّ,¸¸,ّ¤؛°`°؛¤ بيــن ثنــايــا الأيــام ¤؛°`°؛¤ّ,¸¸,ّ¤ ...:::][ الجزء الاول ][:::... اليوم حر .. الجو نار .. يوم مو طبيعي الله يعين .. اكيد كلكم تسألون من هذي اللي تتحرطم من الصبح .. انا رهف .. البيت يدلعوني برهوفه ..طبعاً انقهر.. واتنرفز لماً ينادوني برهيف .. ومحد يتجرأ ويناديني رهيف .. لان يدرون وش بيصير .. قليل اذا اكسر البيت فوق راسه .. لا تصدقون عاد مو البيت مره وحده .. وين نعيش بعدين في خيمه.. لا تحسبون يوم اقول لكم اكسر البيت اني قويه .. لا .. قويه في بعض المواقف ..وبعضها لا ..حنا عائلة ابو يوسف عائله متوسطة الحال ..... انا ماعندي اخوات ماعندي الا اخوان .. ثلاث اخوان يوسف , محمد , سعد .. بتتعرفون عليهم قريب .. ومو حاسه بالوحده عشان ماعندي اخوات .. لا بالعكس صديقتي وبنت جيرانا الريم .. مثل الاخت لي واكثر .. عمري 18 و بصراحه.. انا عصبيه بقـــوه .. اقل شي يعصبني .. مثل جو اليوم الحار ..لحظه جوالي يدق ~~)(~~ كـذا من ربي حبــيته بسـرعه يوم لا قيـــــته ياناس اللي تمنيـــــته أخيـراً صـــار محبــوبي ~~)(~~ اغنية رابح صقر .. كانت نغمة جوالي & رفيقة دربي & اوووه هذي الريم صديقتي .. رديت عليها : هلا والله .. هلا هلا ريــوم ردت علي : اهلين .. كيفك قلت لها : تمام الحمد الله .. وانتي قالت لي : رهووووفه .. موداخل مخي ان الاجازه انتهت .... وان حنا راح نبدا سنه دراسيه جديده ضحكتني بصراحه نبرتها المتحطمه قلت لها : لا ومو اي سنه .. ثالث ثانوي .. يعني تحديد المصير ههههههههه الريم : ياسلام ... وتضحك بعد رديت عليها وانا اضحك : وش تبيني اسوي ابكي من الصبح يعني الريم : لا افااا من الحمار اللي قال كذا رديت عليها بسرعه : انتي ياحماره .. ههههههههههههه قالت لي ومسويه معصبه : هين يارهووف انا اوريك .. المهم بمر عليك انا واخوي خالد .. بعد ربع ساعه .. عشان نروح المدرسه قلت لها اوكي وقفلت من عندها .. وطبعاً بما انه اول يوم دراسي .. انا اصير متحمسه .. والحماس هذا مع الايام يتلاشا ويروح .. لبست العبايه وطلعت برا .. وقفت عند الباب اشوف الاولاد اللي بالابتدائي .. وهم رايحين مدارسهم .. وربي يهبلون .. بس الله يعينهم على هالجو .. جلست اناظرهم ربع ساعه .. وشوي الا وسيارة خالد اخو الريم واصله .. فتحت الباب .. وركبت .. وسلمت لفت علي الريم اللي كانت جالسه قدام وقالت لي : وش فيك تنتظرينا عند الباب .. كل هذا حماس اكتفيت بضحكه خفيفه بس .. لاني مستحيه من اخوها خالد .. خالد هذا وش اقول لكم عنه .. قليله عليه كلمة حلو .. يمكن احلى واحد شفته في حياتي ..وسيم مرره.. ..وشعره ناعم بني .. وجامعي ومثقف ..كنت سرحانه .. ماوعيت الا والريم تقول لي .. رهف .. رهف .. يللا وصلنا ........................ __________ بيت ابو يوسف .. الساعه 1:30 مساءً __________ **رهف** تو راجعه من المدرسه .. كان اليوم حلو تقريباً .. لان مادرسنا شي .. والجوع ذابحني .. اول مافتحت الباب صررخت : يـــــــــمــــــــــــــه وش طابـــــــخه لنــــــــــا غـــــــدا اليــــــوم .. الا وامي طالعه من المطبخ وردت علي : الناس تسلم .. تسأل .. شي .. وانتي على طول الغدا قلت لها : وربي الجوع ينسي الواحد كل شي .. المهم انا ببدل ملابسي الحين ..ماابي اجي الا والغدا جاهز .. ترا بموت جوع .. حتى ماسمعت رد امي علي رحت .. طيران بركب غرفتي .. الا والاسد معترض طريقي .. الاسد هذا اخوي محمد اللي عمره 24سنه هادي الملامح طويل القامه .. جسمه متوسط لا هو ضعيف ولا هو بدب .. شعره ناعم ويشبه لي مره قلت له وبحده : نعم خيررررر .. وخر عن طريقي محمد : نوو نوو نوو ... قولي وخر اخوي لو سمحت قلت له : لا والله قال لي : ايه والله رديت عليه وانا معصبه : وخر احسن لك .. لا دعيت عليك الحين قال لي وهو يضحك .. ويوخر : لا.. انا اللي بدعي عليك.. تاخذين واحد يسوي لك نفس هذي الحركات واعضم هههههههههههههه قلت له بسرعه : فال الله ولا فالك .. مالت عليك.. لو انت داعي علي بالموت اهون .. وشوي الا وتجي امي .. وتقول : للحين انتي هنا .. مابدلتي .. يللا لا تغدينا عنك قلت لها وانا راكبه بروح فوق : لا لا لا .. الحين بجي ................................ __________ غرفة رهف .. الساعه 2:00 مساءً __________ ** رهف ** فتحت باب غرفتي .. وانا بموت من التعب .. ماتوقعت اليوم الاول كذا بدلت ملابسي بسرعه .. وصليت الظهر .. بعد ماخلصت من الصلاة .. تذكرت شي .. الجدول .. ايه صح الجدول .. ولا حتى ناظرت فيه .. فتحت شنطتي .. بشوف جدولي ..الا وتطيح من الشنطه بطاقه صغيره .. اخذتها وانا مستغربه .. فيها قلوب حمرا .. من وين جات هذي .. اول مره اشوفها .. قلبتها قبل لا افتحها .. فيه مرسوم ورا قلب كبير مكتوب داخله ..............من خـــــالــــــد ......... الى ملكة قلبي رهـــــف ............. فتحتها بسرعه .. كان مكتوب فيها ... ^*^ / \ / \ / \ / \ / ^*^ حبيبي عطني لو كلمه منك تريح القلب ونبضه حبيبي بس كلمه تعيد للحياه روحها انت ماتعرف غلاك ولا ماكنت تتركني بعذاب حبك عندي مثل الهوى والماي أحلى من النفس والنبض غلاك بالروح والقلب واغلى من كل مافيني ياحبيبي لا تظن هذا حبر وكلام لا هذا من قلبي صادق الأحساس ودي اعطيك فوق كلماتي حياتي وقلبي وودي امشي بطريقك باقي عمري يا أحلى زهر بأحلى أرض ياأعذب نبع بأجمل حياه ياكل الحياه ويابعد هالناس والله ياقلبي مايوفيك الكلام بس كلمه أخيره اقولها لك أنا أحبك وغير حبك ما أبي ياغالي وأغلى غالي محبك(( خالد)) ^*^ / \ / \ / \ / \ / ^*^ لحظه لحظه ... انا مو فاهمه شي .. اذا انتو فاهمين شي خبروني .. وريحوني ..معقوله هذا خالد ..ما اصدق .... جلست على السرير .. وانا ماسكه البطاقه .. اقراها .. مره ... ومرتين ... وثلاثه .. وعلى طول رحت .. فتحت دفتري .. اللي انا مسميته .. او كاتبه على غلافه ..( انا سفينه في البحر وانت المرسى ) مسكت القلم وكتبت . . . . § بطاقة خالد § السبت - 15\7 اليوم مرت علي صديقتي الريم مع اخوها خالد شكلي بروح معاها كل يوم في المدرسه ماعطونا شي واليوم كان عادي ومافيه احداث تذكر بس اهم حدث لليوم او في حياتي كلها خالد اخو الريم عطاني بطاقه تجنن وانا للحين مو مصدقه احس نفسي بحلم كان كاتب لي في ............... وقفت لهنا لان فجأه دخل الغرفه اخوي الصغير .. سعد ..عمره 7 سنوات .. اليوم كان اول يوم يروح فيه المدرسه ..وجلس يناظرني وقال لي : رهووف امي تقولك10 دقايق والغدا بيكون جاهز .. قفلت دفتري اللي كنت اكتب فيه وقلت له : طيب .. تعال حبيبي سعوودي .. خبرني كيف المدرسه ووش صار لك طبعاً سعد ماقصر .. جلس يسولف لي .. ويقوم يمثل لي كيف يمشي الاستاذ حقهم .. ووش قال لهم المدير .. بس والله سوالفه تجنن .. ما امل منها .. سعد اكثر واحد يجلس يسولف معي في البيت .. يحبني مره .. وانا بعد احبه .. واموت فيه .. بس ما اخبي عليكم ان بالي كان منشغل .. افكر بخالد وبالبطاقه ...اللي مدري كيف وصلت لشنطتي .. قطعت كلامه وانا اضحك : سعوودي حبيبي يللا نروح نتغدا الحين .. لا امي تقلب البيت فوق راسنا .. بعد الغدا تخبرني بكل اللي صار لك ..... على طول مسك يدي وقال لي يللا.. ............................ ___________ بيت الريم.. الساعه 4:00 مساءً _________ ** الريم ** انا الريم صديقة الطفوله لرهف ... اكيد خبرتكم عني ... ادري فيها تحب الكلام .. انا بعمرها و عندي اخت اكبر مني عمرها 27 اسمها نوره .. متزوجه .. وعندها بنت عمرها سنه .. وعندي اخت صغيره .. عمرها 6 سنوات اسمها ساره .. واخوي خالد .. عمره 21 سنه .. واخوي الكبير فارس عمره 24.. كنت طفشانه مره .. دقيت على رهوفه .. وقلت لها اني بجي لها بعد نص ساعه .. تلبست .. ورحت لها .. ماكنت احتاج احد يوصلني .. لان البيت قريب مره .. بس خبرت اخوي خالد يجيني الساعه 9 بالليل .. لاني اخاف امشي بالليل لحالي .. المهم اني طلعت من بيتنا .. وصلت بيت جيرانا رهف .. كنت بدق الباب .. الا واحد فاتحه .. قب ما ادقه .. اللي فتح الباب كان اخوها محمد ............................. ** محمد ** كانت بنت عند الباب واقفه ومنزله راسها .. ماعرفتها ..لانها حاطه الغطا على وجهها .. قلت اكيد هذي وحده من صديقات .. رهف ..... لالالا .. هذي الريم ... انا متأكد .. ايه ايه .. هذي الريم .. ريحة عطرها نفسها ... تكلمت وهي مستحيه ومنزله راسها قالت لي : رهف موجوده من تكلمت قلبي بدا يدق بقووه .. صوتها مره ناعم ..فديتك .. وفديت صوتك يا الريم رديت عليها : ايه ايه .. تفضلي كنت انا مسند يدي على الجدار .. وهي كانت واقفه قريب مني ..اناظرها وانا مبتسم ..وااشر لها عشان تدخل .. بس هي مادخلت .. الظاهر عجبتها الوقفه معي .. وتبي تطول .. يحظك ياحمود .. من قدك .. ....................... ** الريم ** غبي هذا .. او يستهبل .. وشلون يبيني ادخل وهو واقف بوجهي .. لا والمشكله مسند يده على الجدار ..لا ويتبسم لي .. مستانس الاخ .. الظاهر عاجبته الوقفه معي ..مافيه حل الا اني اتكلم .. لاني لو سكت وانتظرته يوخر .. بنجلس انا وهو على هالحاله لأخر الليل تكلمت وقلت له : ممكن توخر عشان انا اتفضل ضحك .. لا ماضحك الا مات ضحك .. وش فيه هذا .. انا قلت شي يضحك .. على باله انكت الحين رد علي وهو ميت ضحك : ههههههه ايه بوخر .. رجع على ورا .. وقال لي تفضلي دخلت بدون كلام .. وهو طلع من البيت .... شفت رهوف جايه وهي مستانسه باستني وقالت لي : هلا ريوم .. وحشتيني ضحكت عليها وقلت لها : يا النصابه وحشتك تو شايفتني .. الله يرجك قالت لي وهي تتمايل ماسكه يدي تمشيني : بتوحشني...... .وانا وياك وكل يوم بشوفه معاك بيوحشني قلت لها وانا اضحك :وكل ثانيه مش وياك .......بتذبحني لفت علي وقالت لي : افصخي عبايتك وخلينا نجلس هنا برا .. قبل لا يجي الليل .. احلى انا طبعاً مارضيت .. وقلت لها ما ابي ..لو طلع واحد من اخوانك ..قالت لي :يوسف من الصبح طالع ماشفته نهائي ..واخوي محمد تو الحين طالع .. مستحيل يرجع الحين .. وابوي يشتغل .. باليت مافيه الا سعد وامي .. يللا عاد قلت لها دام كذا عادي .. وفصخت عبايتي .. وجلسنا برا .. برا بيتهم ماكان كبير طبعاً ...بس عندهم شجره كبيراه ..نحب نجلس بجنبها انا ورهف ونسولف .. الحين جلسنا بجنبها .. وكل وحده تقول .. وش راح تصير لماً تتخرج رهف : صح تعالي .. اختك نوره ليه ماكملت دراسه رديت عليها : اختي نوره تزوجت وانشغلت .. وزوجها ماخلاها تكمل ضحكت وقالت : هههههههه .. مجنوونه .. مستحيل انا ما اكمل دراسه لو مهما كان.. حتى لو اللي بتزوجه مايبيني اكمل .. برجع بيت اهلي ههههههههههه .. بتشوفيني بعدين احسن دكتورة اسنان بالشرقيه قلت لها بسرعه : مو احسن من دكتورة الاسنان الريم ههههههههه سالتني رهف : وش مواصفاة فارس احلامك رديت عليها وانا افكر : امممممم انا مايهمني الشكل ولا العمر ولا الفلوس .. اهم شي يحبني ويقدرني و... قاطعتني : لا انا يهمني الشكل .. ويهمني العمر.. بس الفلوس ماتهمني ضحكت عليها وقلت لها وانا امزح : اجل ان شاء الله تاخذي واحد يخرع وعمره 30 او 40 قالت لي وهي لاويه فمها : هذي انتي اللي بتاخذيه سالتني : وانتي وش مواصفاة فارس احلامك ............................ ** رهف ** سؤالها حيرني .. فشله اقول لها .. الفارس اللي احلم فيه .. هو اخوك خالد .. يووه من قلت خالد تذكرت البطاقه .. ما ابي افكر فيها خلاص .. قاطعت تفكيري الريم وقالت لي : طيب كم ولد وبنت تبين انتي قلت لها : ولد واحد او بنت وحده .. تعرفين يعني انا بكون بهذاك الوقت دكتوره .. وهذا بيشغلني قالت لي وهي تناظر في السما : عكسك انا ... تدرين اتمنى يصير عندي .. 5 بنات و5 اولاد فاجأتني بصراحه قلت لها : ليه عاد هالكثر .. انتي بعدين بتصيرين دكتوره ما بتقدرين قالت لي : حتى ولو انا احب اربي .. اوقات اقول لامي .. ليه ماجبتي اولاد وبنات كثير .. تقول لي انتو الحمد الله كثير .. كان اخوي سعد طالع .. يلعب بالمويه ..غرق الدنيا كلها مويه ودخل .. وكانت الريم تتكلم عن الاولاد والبنات .. وهي موحاسه.. اخذت بيدي مويه من البحيره اللي سواها سعد وكبيته على وجهها ..عصبت مني ..واخذت هي بعد مويه وكبته على وجهي .. وجلسنا انا وهي نلعب بالمويه مثل البزاريين .. حسيت بالبرد لان ملابسي وشعري مبلل .. والريم نفس الحاله قالت لي الريم وهي تتراجف من البرد وشكلها كان يضحك.. ملابسها مبلله ..وشعرها متلصق في وجهها: رهووف يا الدبه .. كله منك شكلي بمرض .. خلينا نبدل ملابسنا انا كنت جالسه على الارض .. بردانه مو قادره اوقف .. وقفت وانا اضحك .. الاوصوت سياره موقفه برا .. والباب ينفتح ^*^ / \ / \ / \ / \ / ^*^ ***** نهاية الجزء الاول ****** |
|
|
|
|
07-09-2007, 08:52 PM
|
#2 | |
|
عيساوي مبدع
|
_________ بيت ابو يوسف .. الساعه5:00 مساءً _________ ** الريم ** كنت اناظر .. ابي اعرف.. من اللي فتح الباب ... لا ما اصدق .. يافشلتي .. بموت بمكاني .. مــــحــــــــمــــــد .. يشوفني وانا هنا .. بهذا المنظر .. وبهذا الشكل .. وبهذا المكان .. وبهذا الوقت .. ياويل حالي .. وش اقول لكم .. قلبي طاح في بطني .. مو قادره اتحرك .. والمشكله يناظرني بنظرات مو فاهمتها .. بدون ما احس .. صرخت صرخه قووووووويه .. ماحسيت الا ورهف ماسكه يدي .. واخذتني داخل .. وهي تركض .. دخلت وجلست في الصاله بموت من الفشله .. وش اسوي .. وش بيقول عني محمد ..غطتني رهف بالعبايه .. طبعاً العبايه ماكانت عبايتي .. لان عبايتي تبللت مع المويه .. اكيد كنت بنظرمحمد بنت عاقله وكبيره .. والحين مايشوفني الا بزره غبيه ...غطيت وجهي بيدي وجلست ابكي .. مدري ليه بكيت من الفشله.. او من وشو بالضبط .. مسكت يدي رهف .. وكانت تقول كلام .. بس انا ماكنت معاها .. ولا ادري وش تقول ........................ _______ حديقة بيت ابو يوسف الساعه 5:15 مساءً _______ ** محمد ** كنت سرحان افكر بالريم .. وبالموقف اللي صار ..مسكينه اكيد تفشلت .. بصراحه الموقف يفشل بس هي واختي خبول هذيلا يلعبون بالمويه .. لايكون يحسبون اعمارهم بنات الـ 6 سنوات .. امممم ماتوقعت الريم كذا شكلها .. توقعتها حلوه .. مثل صوتها .. لكن مو بهذا الحلا كله .. جمال الريم بصراحه ماينوصف .. خل ادخل اشوف وش صار عليهم داخل احسن ... دخلت الصاله ... اللي ماتوقعته .. الريم تبكي .. ليه عاد .. لهذي الدرجه الموقف احرجها .. الظاهر ما انتبهو لوجودي .. راحت رهف المطبخ .. مدري وش راحت تجيب .. تقربت منها.. وهي ماتدري اني موجود .. رفعت الريم وجهها .. وشافتني وكانها تفاجأة .. نزلت راسها على طول .. شفت وجهها من قريب .. وربي وربي تهبل ..قلت لازم اتكلم بما انها شافتني واقف قلت لها : خلاص الريم .. لا تبكين ..ماصارت عاد .. ضحكت ضحكه خفيفه وقلت لها .. تحصل في احسن العائلات .. مارفعت وجهها .. ولا تحركت .. ولا تكلمت .. شفت اختي جايبه لها مويه .. اخذت نفسي وركبت غرفتي ................................ ________ بيت ابو يوسف .. الساعه :5:30 مساءً ________ ** رهف ** بصراحه ما الوم الريم .. موقف لا تحسد عليه .. شكله اخوي يقول .. انا وصديقتي .. مجانين او متخلفين نلعب بالمويه هههههههههههه .. جلست اهدي في الريم .. واقول لها انه عادي .. بس هي جلست ماده لي فمها شبرين .. بدلت ملابسها وجا اخوها خالد اخذها .. صليت .. وتعشيت .. وركبت غرفتي الساعه 10 عشان انام .. انسدحت على سريري .. اتذكر الموقف واضحك .. تذكرت بطاقة خالد .. صح البطاقه وش اسوي فيها .. ما ابي خالد يقول اني تجاهلته .. اتجاهل خالد مستحيل .. طلعت بطاقه كبيره .. فتحتها وكتبت فيها أشكي عليك الحال يا عارف الحال ولو ما بيدك شي يكفي لك أشكي يكفي تروح بكلمتك ضيقة البال ويكفي تحس بضيقتي دون ما أحكي أشكي عليك الحال يا عارف الحال .. ساعات أحس اني عن الناس في حال ساعات أضحك من قسى وقتي وأبكي كأني غريبٍ بين الأوطان جوّال مهما ابتعد قلبي يحن لوطنكِ أشكي .. لو شفت في عمري هموم وغربال فيك الحنان بصادق الحب يحكي دنيا مشاكلها على كل موال وكلٍ على همه من الوقت يشكي أشكي .. ..... وكتبت تحت ....من رهف الى الغالي خالد حطيتها في شنطتي ورحت بنام .. رجعت مره ثانيه .. وفتحت الشنطه طلعتها .. لا لا مايصير اعطي خالد بطاقه .. عيب .. وش بيقول عني .. لا اخاف يقول انا مطنشته .. ومو مهتمه فيه ياالله .. وش اسوي .. خلاص بعطيها خالد .. واللي فيها فيها .. حطيتها في الشنطه .. ورحت انام . . . . . . تصبحون على خير ........................ ________ غرفة محمد .. الساعه 1:30 صباحاً ________ ** محمد ** وش فيني مو قادر انام .. لهذي الدرجه... الريم ماخذه عقلي .. ماتوقعت كل هذا يصير اليوم .. بس لحظه .. اخاف الريم من بعد هذا الموقف .. ماتجي بيتنا .. لا عاد مو لهذي الدرجه .. اكيد راح تجي ماتستغني عن رهف هي .. بس .. ليه انا مهتم في الريم اكثر من الازم .. معقوله يا محمد انت تحب الريم .. بس هي ماتحبني .. يمكن تحبني .. ههههههه اضحك على نفسي .. جالس اعطي نفسي امال .. مافيه ولا شي يدل على ان الريم تحبني .. ما ابي اشغل بالي اكثر انام احسن لي ........................ ____________ بيت ابو يوسف .. الساعه 6:00 صباحاً ____________ ** رهف ** كنا كلنا جالسين نفطر .. وانا جالسه اسولف لهم عن ثالث ثانوي .. وإني مبسوطه عشان هذي اخر سنه .. وافتك من المدرسه وهمها .. بس فاجأني كلام ابوي قال لي : نفرح فيك عروس قريب ان شاء الله وش عروسه .. عمري 17سنه .. امممم يمكن ابوي قصده .. بعد سنوات قريبه .. المهم فطرت وخلصت الا واخوي يوسف .. ماتعرفون يوسف هذا اخوي الكبير عمره 27 عريض وطويل شعره مو ناعم بس ملامح وجهه حلوه مايشبه لنا انا ومحمد يشبه سعد اكثر .. عليه تحكمات غير طبيعيه .. لا قال كلمه خلاص .. مستحيل يغيرها .. قال لي : يللا انا بوديك المدرسه اليوم لالا انا ما ابيه يوديني .. انا ابي الريم تمر علي .. ابي اشوف خالد .. لازم اعطيه البطاقه .. مدري ليه حسيت اني كرهت اخوي يوسف .. في ذيك اللحظه قلت له : لا يوسف مايحتاج الريم تبي تمر علي قال لي : قلت بوديك يعني خلاص قلت له : ان شاء الله وانا بداخلي ودي اخذ الصحن اللي بجنبي .. واكسر جبهته المهم رحت المدرسه .. ومر اليوم علي عادي ..وقلبي يدق كل ما بدا الدوام ينتهي .. لاني راح ارجع مع الريم .. او بالاحره مع خالد ............ انتهى الدوام .. لقيت ريم تسولف مع وحده من البنات .. ياربي ريموووه ذا وقتك .. رحت لها .. وقلت : يللا يللا ريوم .. عجلي .. حر موت .. شمس .. بموت .. نبي نرجع البيت .. بسرعه بسرعه ناظرتني مبتسمه : ايه .. ايه .. وش فيك انتي .. الحين بنروح قلت لها : يللا ريووم عاد .. ما احب كذا تجلسين تسولفين لي .. عشر طعش ساعه شوي وطلعنا من المدرسه .. وانا ادور سيارة خالد .. قالت لي ريم .. يللا رهوف هذي السياره .. ركب هي قدام .. وانا ورا ........................ _________ سيارة خالد .. الساعه 1:30 مساءً _________ ** خالد ** كنت اناظر في المرايه ابي اشوفها .. بس ما اشوف شي .. كانت حاطه الغطا على وجهها .. مع اني عارفها وحافظ شكلها .. مرات كثير اشوفها في البيت .. اصلاً هي ماكنت تغطي وجهها عني الا يوم .. دخلت هالثانويه الغبرا .. لفت علي اختي الريم وقالت لي : نزلني المكتبه ابي اخذ لي شي قلت لها : لاقولي لي وشهو وانا بنزل اخذه ردت علي : ابي اخذ شي ماتعرف له انت قلت لها : اوكي انا صحيح احب رهف .. بس ما ابي اجلس معاها لحالنا في السياره .. المهم نزلت اختي.... انا في حلم ولا في علم .. اكيد انا احلم ..ماتدرون وش شفت .. بطاقه كبيره شوي بجنبي .. اخذتها وشميتها .. كانت ريحت عطر رهف فيها .. فتحتها .. قريت شوي ..لفيت البطاقه كان وراها فاضي .. طلعت قلم .. وكتبت احــبــك ولفيتها لها .. نزلت راسها مستحيه ..لا اكيد تحبني .. ياناس رهووفه تحبني ..طلعت قلم من شنطتها .. وكتبت بجنب كلمة احبك .. (((((( وانا بعد )))))))) يعني خلاص رهووفه تحبني .. معقوله تحبني ... لا ما اصدق بعد كل هالمده .. اكتشف ان رهف بعد تحبني.. لفيت عليها وقلت لها : احلفي لفت راسها للدريشه وساكته عني .. وكانها تقول لي الريم جات .. دخلت الريم .. تمنيت لو الريم ما جات .. وهي تسولف لي وتوريني كتاب بيدها .. بس انا مدري وش تقول بالي مو معاها ... بالي مع اللي ملكة قلبي **رهــــــــف** .......................... ________ بيت ابو يوسف .. الساعه 1:45 مساءً ________ ** رهف ** دخلت البيت وانا طايره من الوناسه .. مو مصدقه ان اللي صار اليوم صار .. من وين جاتني الجرأة .. خلاص خالد يحبني هو كتب لي ..وانا احبه ظليت طول اليوم افكر بخالد .. واتوقع حتى هو يفكر فيني مثل ما انا افكر فيه .. عاد باليوم الثاني .. اول ماركبت السياره .. قبل ما اجلس .. شفت ورقه .. فتحتها وانا بالسياره .. بدون ماتحس لي الريم .. كاتب لي فيها كلام حلو .. ومر علينا 4 ايام .. وهو يكتب لي ورقه .. يحطها قبل ما اركب السياره .. وانا اخذها معي .. وقبل ما انزل .. احط له ورقه .. وكنت ما احس للايام من حلاتها .. الحين انا راجعه من المدرسه .. اشم عبايتي .. ريحتها ريحة عطر خالد .. لاني تو نازله من سيارته .. كنت رايحه ادور امي البيت هدوء .. سمعت امي تتكلم مع ابوي .. تقربت .. ماكنت ابي اسمع وش يقولون .. بس من سمعت اسمي وقفت وهذا اللي سمعته امي : بس البنت صغيره .. وما بتفهم ان هذا الشي لمصلحتها صرخ عليها ابوي : لا البنت مو صغيره .. انتي ماتدرين مشعل هذا من .. هذا من اغنى الناس في الشرقيه .. ابوه مو من زمان متوفي ورث عنه ملايين .. انتي ماشفتي الفله حقته .. انا مو مستوعب اصلاً ان مشعل ولد عبد العزيز جاي يخطب بنتنا .. للحين مو مصدق .. وعطيته موافقه .. حتى ولدك يوسف قال له .. انها موافقه وخلاص .. وهذا الموضوع انتهى امي : ايه معليه يا ابو يوسف .. بس لازم تاخذ رايها .. يمكن .. دخلت عليهم وقلت لهم : وش تقولون ومن مشعل .. تتكلمون عني .. يمه فهميني .. تقدم مني ابوي وقال لي : يللا هذا انتي سمعتي وجهزي نفسك ملكتك بعد اسبوع من مشعل ولد عبد العزيز اكيد قد سمعتي فيه ماتتخيلون صدمتي .. معقوله اللي يصير .. ابوي يمكن كبر وخرف صرخت عليه بصوت عالي : بس انااااااااااااااا مااااااا ابي مااااااااا ابي مو على كيفك .. تزوجني .. لهذي الدرجه تحب الفلوس ماحسيت الا وابوي شاد شعري : لا تصارخين على ابوك .. ومشعل هذا بتاخذينه .. بتاخذينه .. رحتي جيتي بتاخذينه .. اصلاً من قدك هذا خاطبك .. انتي ماتستاهلين الا واحد منتف .. يربيك ..ويعلمك كيف ما ترفعين صوتك على ابوك رماني على الارض وراح عني .. جلست ابكي .. وامي ماسكتني تقول لي : هذا نصيبك يابنتي خلاص تركت امي وطلعت الصاله .. وانا ابكي .. شافني اخوي يوسف وقال لي : هه افهم من هالصراخ وهالبكي انك عرفتي .. ان مشعل ولد عبد العزيز ابو الملايين خاطبك انتي .. وهو يأشر علي بصبعه من فوق لتحت وكاني ولا شي مسكت يده بقوه .. مدري وش كنت بسوي .. الا وهو ماسك يدي ويقولي : خير انسه رهف .. ليش الدموع على وشو معترضه .. صدق لا قالو بنات الفقر مايعرفون يحمدون ربهم لا جاهم خير .. اقول قولي الحمد الله .. وصلي لربك ركعتين شكر .. ان واحد مثل مشعل خاطبك انتي .. انا مستغرب عاد مادور الا انتي .. مافيه الا انتي بنت لا وبــ.. ماتحملت كلامه .. مديت يدي ابي اعطيه كف .. مسك يدي بسرعه ..و شد شعري بقووه .. وضربني بدال الكف كفين .. عدو عاد كم مره بنطق اليوم والسبب هالمشعل .. قلت له اتركني .. اترك شعري .. توقعته ما يتركني .. بس تركني وقال لي : اخر زمن رهيف تحاول تمد يدها علي .. بس اسمعي عاد .. ان حاولتي .. مجرد محاوله .. تمدين يدك علي .. بكسرها لك .. فاهمه نزلت راسي .. وانا مقهوره .. قلت له وانا ابكي : زين كم عمره قال لي وهو يضحك : بدري على هالسؤال .. بعدين اجاوبك عليه .. وكان بيمشي مسكته وقلت له : قول عاد بعد يدي عنه وقال لي : زين زين دام انك مصره .. عمره 30 .. متزوج .. وعنده بنت حسيت الدنيا تدور وكلها سواد و..................................... طحت مغمى علي ^*^ / \ / \ / \ / \ / ^*^ **** نهاية الجزء الثاني **** |
|
|
|
|
|
10-09-2007, 05:31 PM
|
#3 | |
|
عيساوي مبدع
|
والله انك عندك طولت بال على المتابعه نيالك على العموم مشكوره على القصه الجميله تقبلي مروري ربـــيـــعـــو :11_12_13[1]: |
|
|
|
|
|
16-09-2007, 04:40 PM
|
#4 | |
|
عيساوي مبدع
|
********************** |
|
|
|
|
|
16-09-2007, 06:07 PM
|
#5 | ||
|
عيساوي مبدع
|
اقتباس:
هههههههههههه عنجد ؟؟ العفوو ربيع يسلمو ع المرور .. |
||
|
|
|
|
16-09-2007, 06:09 PM
|
#6 | ||
|
عيساوي مبدع
|
اقتباس:
العفو شـــكــرا الك ع المرور دمــــت بكل خير . . SaNdRa |
||
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
العرض العادي
