19-01-2009, 10:48 AM
|
#1 | |
 
|
بسم الله الرحمن الرحيم السلام عليكم ورحمة الله وبركاته يسرنا يا اخوتي (ادم وخيّال البلد) ان نضع بين ايديكم المقابلة الثانية من مقابلات شخصيات البلد والتي هي مع الاستاذ خضر عبيد على بركة الله نبدأ: - الاسم الكامل: خضر محمد صالح عبيد - العمر : 38 سنة , بحكيلكم انا لسا صغير , بتكبروني - التحصيل العلمي والشهادات اللي معك : انا ماجستير تربية اعلى شهادة وحاليا بدرس ماجستير في دافييد يلين , او مش ماجستير, بدرس يعني اشي في تطوير المدراء وهي دورة لمدة سنتين تقريبا. - نبذة عن حياتك: انا انسان اللي ربيت في مرحلة الطفولة يتيم وكنت في مدرسة داخلي لحد الصف التاسع في مدرسة دار الاولاد بعدها انتقلت لمدرسة دار الايتام وخلصت التوجيهي من المدرسة الابراهيمية في السنة الدراسية 1987/1986 , في هاي الترة ما كنتش عايش كثير في العيسوية كنت عايش في البلدة القديمة اكثر ... في سنة 1987 انتقلت للاردن لتكملة مشواري العلمي بعد ما انهيت التوجيهي في الابراهيمة ودخلت الجامعة الاردنية في التخصص اللي انا رغبت فيه اللي هو لتربية الرياضية رغم حصولي على عدة منح في الجامعات الفلسطينية وفي الجزائر بس رغبتي كانت تكمل في دراسة التربية الرياضية اكثر . نبذة عن الحياة الرياضيه . بالنسبة لحياتي الرياضيه هي حياة طويله بلشت لاعب في الحارات وفي البيوت وفي النوادي, اكتشفوني بعض الناس وانا عندي موهبه كرة القدم لعبت في انديه كثيرة لعبت في نادي الموظفين برعم صغير لعبت في نادي الهلال كمان برعم صغير لعبت بعد نادي الهلال في نادي جمعيه الشبان المسيحيه كان من اكثر النوادي المهتمه في جيل الطلاب الصغار هناك بسرعه كبرت كلاعب لعبت في مرحله الصغار صغار والبراعم والعبت في الاشبال مع بعض, بعدها ترفعت مباشرة كمان لفريق الناشئين كنت في جيل صغير وانا العب كرة قدم بنفس الوقت كنت في فريق المدرسه طبعا في كل الفرق تبعت المدرسه المرحله الابتدائيه لاعب في المرحله الاعداديه وانا بعدني كنت طالب في الابتدائيه بعد YMCA انتقلت الي ابناء القدس لعبت في ابناء القدس من سنتين الى ثلاث سنين في الفرق الناشئه والاشبال والصغار كثير بطولات ومباريات كنت فيها هداف ما في مبارة ما اجيب فيها هدف معظم البطولات كنت هداف اطلعت بعدين على نادي هلال القدس كنت اصغر لاعب في الدرجه الممتازة لعبت فريق اول وانا لسه في ريعان الشباب في الهلال لعبت مباريات كثيرة حلوة بعدين انتقلت الي الاردن في الاردن العبت في البدايه مع نادي الفيصلي سنتين ولعبت في تلك الفترة كمان في منتخب عمان من حد ما اوصلت الاردن كنت العب في منتخب الجامعه الاردنيه وبنفس الوقت لاعب في منتخب الجامعات الاردنيه زرت الكثير من الدول العربيه في كرة القدم في مصر سوريا والعراق وبعدها انتقلت الي نادي الوحدات لعبت هناك سنتين حصلت على بطولات كثيرة برضو العبنا في دول عربيه كثيرة في البطولات العربيه في الامارات والسعوديه وسوريا عدة مرات في لبنان رجعت على البلاد مباشرة لعبت مع نادي هلال القدس النادي اللي كنت العب في لعبت بعض المباريات مع نادي العيسوية بس غير رسميه, في المباريات كنت كابتين نادي الهلال فترة زمنيه طويله لعبت مع منتخب فلسطين كابتين لمنتخب فلسطين في بريطانيا لعبنا هناك مباريات بقيت العب كرة قدم لحد الانتفاضه الثانيه بعدها توقفت عن العب طبعا في هذه الفترة بالنسيه للرياضه دخلت في دورات مدربين وكملت في هذا المجال دربت عددة فرق من ضمنها في الدرجه الممتازة هلال القدس ، جبل الزيتون من الدرجه الاولى, العيساويه ,لعبت في الداخل في مكابي كفر قاسم من سنتين الى ثلاث سنين حاليا مشرف ما بدي اسمي حالي مدرب عشان مش كتير بلتزم . في الوقت الحالي صرت محاضر لدورات مدربين - مبارة ما عمرك ابتنساها (علقت في ذكرتك ) : الوحدات والفيصلي فزنا عليهم ثلاث واحد وانا جبت الهدف الثالث كانت هي المبارة سنه 1989 كان الهدف في ميلاد العباسي وجمهور الوحدات اطلعلو اغنيه بهذا الهدف ولحد اليوم بكن كل الاحترام والتقدير لجريدة الوحدات الرياضيه الي كل مرة في كل عدد بطلع كل سنه تحت اهداف لا تنسى بكتبو هدف خضر عبيد في مرمى ميلاد العباسي . - متى قدمت الى البلد عشت في البلد سنة وحدة 86/85), وطبعا كنت اتردد في الصغر دائما كنت اتردد ولكن العودة النهائية كانت في نهايات سنة 1993 - كيف بدات حياتك هنا ؟؟ هل واجهت صعوبات ؟؟ اكيد فش اشي فش فيه صعوبات ,بلشت بصعوبة كانت كبيرة اني ما لقيتش الوظيفة بشكل سريع , واضطريت انو اشتغل عامل في الباطون بالرغم من اني بعرفش اشي في الباطون بس الاخوان اللي كانو معاي في الشغل كانوا يساعدوني كثير انو دير بالك انت ارتاح واقعد , بعدها اشتغلت معلم في المدرسة الاردنية في رام الله في هذيك المدرسة اخذت معظم الميزات لكن ما كنتش مرتاح ,رجعت اشتغلت في فندة حياة فرّاش ,في نفس الوقت بلشت وظيفة مدرب مع نادي البلدة (نادي المدرسة) انا بلشت سنة 1994 في شهر 4 او شهر 5 وقدرت ادخل كاستاذ بديل في مدرسة العيسوية لمدة شهرين ,كان المدير حسام بركات الذي ارتاح لشغلي بشكل كبير وساعدني في الوظيفة في العام الدراسي 1995/1994 وهذه كانت بداياتي في مدرسة العيسوية . - هل كان هنالك اشخاص ساعدوك في بداية مشوارك ؟؟ اكيد في كثير من الناس اللي ساعدو , الفضل الاول برجع لاخوي المختار والشيخ رياض ياسر ساعدني في بداية الطريق وبالاضافة للاستاذ حسام بركات شخصيا اللي هو وافق انه يوظفني في المدرسة - ما هو اول عمل لك في القرية ؟؟ مدرب بعدين مدرس والان مدير - ما رايك في المستوى التعليمي في القرية ؟؟ ضعيف جدا جدا جد ضعيف بشكل كبير , لا يصل لمستوى اذا كنا نحكي عن الرضى او عدم الرضى فانا غير راضي بتاتا عن الوضع التعليمي في العيساوية ,وطبعا اكيد هنالك الكثير من الاسباب . - ما هو المستوى التعليمي في المدرسة الاعدادية في الوقت الحالي ؟ لما نيجي نحكي عن المستوى التعليمي في المرحلة الاعدادية بدنا نقيسه في عدة اتجاهات الاتجاه الاول هو المعلمين : المعلمين اكفاء جدا واصحاب خبرة واصحاب شهادات عالية الا انه المشكلة الموجودة بانه الطلاب اللي بنستلمهم في المدرسة الاعدادية طلاب ضعاف جدا من ناحية التحصيل العلمي وفي مرحلة الاعدادية في فجوة كبيرة بين المدرسة والاهل ,فش متابعة , وهذا بساعد على ايجاد ضعف تعليمي اما المعلمين والادارة بتنحاول بذل قصار الجهد لتحسين الوضع والوضع مش بسيط . -هل هناك خططط لتطوير المستوى التعليمي ؟؟ وهل قمتم باعمال لتطوير هذا المستوى ؟؟ عالاكيد هناك في خطط وخططنا واضحة ومبينة على الارض بس بالنسبة للتعليم عشان يتحسن لازم نبدا من الاساس فاذا كنا ننظر على انه تطوير التعليم في العيساوية لازم ننظر على تطوير الاساس , لو اجينا لمدرب كرة قدم بده يدرب لاعب ممكن انه يدربه وهو جيل 6 سنين لجيل 9 سنين بيقدر انه يدربه ويسوي منه لاعب, بس لو يجي واحد جيل 15 سنة بدك تدربه كرة قدم صعب انك تصل معه لانه يصير لاعب . عشان هيك نفس الاشي الطالب المتعلم , الطالب في المراحل الاساسية الدنيا لازم يحصل على كم معين من المعلومات في معظم المواد خاصة في اللغة العربية واللغة الانجليزية والرياضيات وللاسف هذه الحلقة شبه مفقودة في العيساوية ,وبالتالي اعبر عن عدم ارتياحي للوضع في المرحلة الاعدادية رغم اني انا مديرها .. - بما انك مطلع على الوضع التعليمي في القريه بشكل عام مدير مدرسه الاعداديه برأيك كيف نقدر نغير هذا المستوى وكيف نطوره ومين الي لازم يشتغل وكيف كل واحد يشتغل من جهت؟ - سوال كثير في محلو لازم نبلش في عدة اتجاهات الاتجاة الاول توعيه الاهل للمحافظه على اولادهم اليوم هلقيت اذا انا واياك بنطلع نتجول في العيساويه بنلاقي معظم الاولاد في الشوارع لحد هذه الساعه المتاخرة بالنسبه لولد طالب مدرسه ان يكون هلقيت في الشارع ,بالنسبه للولاد ولاهلهم الساعه هلقيت سبعه الا ربع الي الساعه عشرة هذا اشي عادي انا بالنسبه الي كارثه اما بنسبه للاهل عادي جدا يرجع الولد الساعه العاشرة في الليل طبعا مش الكل الغالبيه العظمى هي نقطه النقطه الثانيه انا بتمنى من الاهل انهم يتعاملو مع اولادهم كبشر ومن حقهم انو يتعلمو نقطه ثالته للطلاب انه يفهم الطالب ان المدرسه مش عدوله هي بيت دافئ حنون يتقبل كل الطلاب بصدر رحب وبدو يساعدو لانه يوصل في هذه الحياة الصعبه انو يكون في امان بحيث يقدر يدافع عن نفسه في أي وقت واي زمان واي مكان بالنسبه للمدارس لازم الاهتمام بشكل كبير بالمراحل الاساسيه للطلاب نبني الولد في الروضه بشكل صحيح بنبني في المراحل الاساسيه الدنيا التي هي الصف الاول والثاني والثالث انه الولد ياخذ كل الكميه التي يجب ان ياخذها في المدرسه بمساعدة الاهل من الدار , الاهلى يعملوا التواصل بينهم وبين المدرسه بشكل دائم وللاسف لحد اليوم في اهالي ما بعرفو مدرسه ابنهم وين ولا بعرفو ابنهم أي صف فاذا انا اب بطلع من الصبح بشتغل لاخر النهار لهدف ابني انا ماشي في الطريق الغلط مش ماشي في الطريق الصح بالعكس انا بضر ابني اكثر ما بفيدو اذا انا ما كنتش متقرب من ابني ، مشكلتنا انه الاهالي بعيدين عن اولادهم بشكل كبير فش اب بقعد مع ابنه اكثر من ست دقائق في اليوم, الولد بحاجه انو يقعد مع ابوه اقل شئ من ساعتين الي ثلاث ساعات فالفرق كبير بين الست دقائق والساعتين. بدها تصير صحوة من قبل الشيوخ في الجوامع من قبل الناس الكبار من قبل الناس المتعلمين في البلد نبدا نشتغل على بناء مؤسسات بشكل صح في العيساويه نجيب الطلاب عليها بعد الظهر نساعدهم ندعمهم تعليميا ممكن برضو يكونو بحاجه الي بعض الامور التربويه والترفيهيه كمان نوصللهم اياه وهكذا نبدا العلاج المهم بس لو في كل دار لو نطلع واحد متعلم ولد واحد بتحسن الوضع شوي شوي شغله ثانيه على كل الناس المتعلمه من اطباء ومهندسين ومحامين بالبلد يتوجهون الي المدارس وهما يورجو الاولاد انهم هم نموذج لهم صيرو زينا هينا احنا نقطه مهمه جدا الي اولياء الامور اللذين مهتمين في اولادهم تعليميا يفكرو انه انا بدي اهتم في ابني في مدارس العيسويه بديش اهتم فيهم في المدارس الخاصه في المدارس الخاصه الثانيه هذول الاهلي المهتمين في اولادهم احنا بحاجه الهم في مدارسنا بشكل كبير واولادهم كمان احنا بحاجه الهم في مدرسنا بشكل كبير للاسف معظم اهالي العيسويه بطلعو اولادهم على المدارس الخاصه ولما يفشلوا بالخارج بجيبوهم على مدارس العيساوية ما نظل نطلع على السلبيات نحاول نطلع على الايجابيات في عنا برضو ايجابيات كثيرة في العيسويه مش لازم برضو نتفرج على السلبيات احنا كعرب نظرتنا على السلبيات ما بنشوف الايجابيات بنشوف اولادنا لما يغلطو ما بنشوفهم يوم بعملو الاشي الصح. بوجه دعوة لكل الاهل اتفرج على ابنك لما يعمل صح وانسى يوم يعمل غلط عززه يوم يعمل الصح الولد ببطل يغلط الولد بغلط على شان يفرجيك حالو على شان يتقرب منك بغلطش على شان بدو يغلط عشان انت يابا بتيجي تضربني كف بس لما بغلط بحس انك قريب مني بينما وانا بعمل الصح انت ما بتشكرني ولا بتحكي معي ولا بتبوسني ولا بتقرب علي ولا اشي عشان هيك بضطر اعمل غلط وبالتالي الولد بعمل غلط . -ما رايك في شباب البلد ؟ شباب البلد مقسومة لقسمين قسم رايح للضياع بشكل كبير وهو الاكثر وهو الاكبر , ضياع من عدة جوانب لعدة اتجاهات والقسم الثاني يحاول ان يحسن شيء في البلد ولكن بسبب كثرة الناس اللي رايحين للضياع الشباب الكويسين مش قاردين يسوا اشي . -اعطينا نبذة عن نادي العيساوية ؟ نادي العيساوية تاسس سنة 1968 , مر في كثير مراحل, طبعا زي ما تقول بين طلعات ونزلات للنادي , مرات كان يطلع فوق ومرات ينزل تحت .. إدارات متفاوتة اجت على النادي.. لحد الفترة الحالية كان في عنا مشاكل عدة في النادي , المشكلة الاساسية اللي كانت موجوده انه ما كان في مقر للنادي وبصراحة ما فش الادارة الواعية اللي بتفهم شو مهام الهيئة الادارية لنادي . اليوم صار في عنا مقر , في الملعب اليوم بلش يدخل في نشاط كويس بالنسبة للبلد الا انه في نقص بشكل كبير , لحد اليوم ما بنقدر نوصل للادارة الواعية كل انسان يفهم بالزبط شو معناة انه يكون اداري في نادي العيساوية , فش منافسة من اهلي البلد على الادارة لنادي العيساوية من قبل اهل البلد . المشكلة الاساسية انه البلد فش عندها ثقة في النادي وهاي مشكلة , مش زي باقي القرى , القرى الثانية عندهم ثقة في النادي عندهم تبرعات ودعم , بالنسبة للناس بتشك انه النادي عبارة عن مصدر تيجي عليه الاموال من كل محل وهذا الحكي غير صحيح ما فش منه , انا انسان مستعد اني احاسب من قبل الجميع واوراقنا مفرودة على الطاولة زي ما بقولوها . عن جد هذه الامور اللي بدها بحث بشكل واضح . بينما في القرى الثانية على سبيل المثال في جبل المكبر النادي واقف بس من اهل البلد وفي صور باهر من اهل البلد في كل المناطق الاندية بتوقف بس من اهل البلد , احنا بس مجرد اتهامات باطلة على النادي او أي مؤسسة بدها تنهض في أي مجال معين بتلاقي انه الاتهامات صارت عليها من اهل البلد كثيرة بدل ما انهم يوقفوا ويازروا ويساعدوا وينجحوا ويدعموا هذه المؤسسة , على العكس وين بدنا نحط عراقيل وكيف بدنا نوقفها وما نخليها تمشي. في كثير ناس بفكروا انه النادي تابع لتنظيم معينم او جهة معينة او ناس معينين لا النادي مش ملك لخضر عبيد النادي هو نادي العيساوية ولا مرة طلعنا ولعبنا باسم نادي فلان اونادي كذا او نادي علان , نحن دائما بنطلع نلعب باسم العيساوية وبنمثل العيسوية . الا انه لحد الان في عداوات من اهل البلد ,يمكن هذه العداوات بس مجرد على اساس انه نحن ما بدنا ندعم فبدهم يحاولوا يجدوا عراقيل , كيف نحن ما ندعمش, بنطلع عيوب على هالعالم وبالتالي لا ندعم . مرات بجي ناس بحكيلك انه النادي محسوب لعائلة معينة في البلد او عائلتين . لا النادي مفتوح لكل الناس كل انسان بامكانه ان ياتي ويمارس نشاطه . الاخ زيد وهيوته قاعد اكثر من مرة انا توجهتله بشكل شخصي وحكيتله وينك يا زيد ؟ محلك محفوظ . كل شب من البلد بحب ينتمي لهذه المؤسسة و يرفعها وينهض بها .. هذا المحل اللازم نحن كلنا نتشارك ونشتغل على اساسه , وفي هذه المناسبة بنتهز وبحكي انه كمان المنتدى يشتغل كثير على توعية اهل البلد ويفهمهم شو معناة نادي وكيف نوقف مع النادي , يعني انا مثلا مش ضروري اروح اشحد من كثير ناس عشان نضوي الملعب ,في عنا كثير ناس بالبلد من ناحية كفاءات في العمل ومن ناحية امكانات مادية انهم يساعدوا لاضاءة الملعب بدل ما نروح نشحد من فلان وعلا .. عنا القدرات لو سوينا تبرعات ونضوي الملعب وبالتالي ممكن انه نساعد في تخفيف الكم الهائل من الشباب الطائشة اللي حكيتلك عنهم . هذه الشباب كله يطوش بسبب الفراغ الكبير الموجود في البلد فش عنا اشي اللي الشباب يسووه . فيتوصل عنده فترة معينة انه وين يروح ؟؟ فبروح اما على التلة الفرنسية او يروح على مكان ثاني يمكن مش مجال ذكره . المفروض انه يكون عنا مؤسسات راعية لهذه الشباب , ومن اهم هذه المؤسسات هو النادي , وهذا النادي عشان يقدر يرعى الشباب ويدير باله عليهم هو بحاجة الى دعم ومساندة من اهل البلد . - ما هو تصنيف النادي بين اندية القدس ؟؟ في أي درجة ؟؟ في الدرجة الثانية حاليا .. رغم انه لو يعملوا بطولات تصنيف ممكن انه يوصل النادي على حسب الكفاءة الموجودة -طبعا انت بتحكي عن نشاط كرة القدم – لاني لو بدي ارجع النشاطات التي اليوم موجودة في النادي .. اليوم عنا نشاط كثير مميز التي حتى اندية الدرجة الممتازة ما بتساوي ربع اللي عنا .. يعني نادي العيساوية من الاشي اللي بفتخر فيه الاهتمام بالفرق الناشئة , وهذا الحكي مفقود في الاندية الثانية .. لو بدنا نيجي نصنف النادي على الاندية الناشئة فهو المركز الاول على مستوى القدس . ابطال فلسطين لمواليد 1988 كل فلسطين هو العيساوية ... شوف ! مركز اول على فلسطين ما سمعناش واحد حكالنا مبروك من اهل البلد , وهذا من الشغلات اللي بتخلي الانسان يرجع لورا بدل ما يتقدم , يعني احنا مركز اول على القدس ولما صار البطولة على مستوى المحافظات كلها في اريحا اخذنا المركز الاول على كل فلسطين ... وفي نفس الوقت ما حداش حكالنا مبروك , انا لما كنت اجيب بطولة في أي محل اقل ما فيها كانوا يعزمونا على كنافة . احنا فزنا على سلوان من الدرجة الممتازة .. نادي العيساوية فزنا على سلوان في بطولة القدس وما حداش حكالنا مبروك سويتوا انجاز , فاليوم نحن بنعاني من هذه الامور. نحن لعبنا مع فرق من درجة ممتازة . مثلا لعبنا مع نادي شباب الخليل فازوا علينا 3-2 في ارض شباب الخليل وظلمنا من الحكم وما حداش حكا للفريق اشي .. لعبنا مع ثقافي طول كرم على ارض ثقافي طول كرم - انا بحكيلك على مستوى احسن الفرق الفلسطينة المصنفة يعني الفريق الاول – لعبنا معهم وغلبونا 4-3 في ارضهم وظلمنا من الحكم . اليوم عنا شباب في الريق الاول ذوو مستوى كثير ممتاز الا انه في بعض المرات بصير في تقاعص او بالاحرى مش تقاعص .. بصير عندهم اني انا قاعد بنجز وبسوي لاهل البلد بس فش حدا مهتم فييا فش حدا جاي يشجع فش , ليش انا اسوي واشتغل ؟؟ انا اذا بدي حذاء كلاعب لازم اروح اشتغل يومين عشان اجيب حق حذاء واشتري واحد . هون لو الشباب يشوفوا دعم .. احكيلك ؟ لو انه كل انسان قادر في البلد يتبنى لاعب في البلد يجيبله حذاء ويجيبله لوازمه .. وهذا ما بكلفنا اشي كثير .. وبالتالي نزرع في اللاعب نوع من الانتماء للبلد .. نادي العيساوية هو النادي الوحيد اللي ما عنده ولا أي لاعب من خارج البلد .. رغم انه كثير من اللاعبين بدهم يجوا يلعبوا عنا بس نحن بنحكي لا خلي الفرصة لاولاد البلد .. بالنسبة للتصنيف انا بصفتي انسان رياضي وعشت الرياضة الفسطينة بشكا كبير .. بحكيلك انه ما بصير نحكي على الفرق الفلسطينية بأي نوع من التصنيف لانها رياضتنا مطولة لتوصل لمرحلة شوي كويسة .. -ما هو الوضع الحالي للنادي؟؟ الوضع الحالي للنادي انا بعتبره بدا ان يكون نادي .. نحن بنحكي من 68 لكن بدا من جديد .. بدا النادي بعد عون الله وتصميم وارادة الاخوان في الهيئة الادارية على بناء مقر للنادي .. رغم انه في مشكلة – الشمس ما بتتغطاش في الغربال – في مشكلة بين الجمعية والنادي والكل بسمع في هذا الموضوع , بعد استئجار الارض والنادي كان اله اليد الطولى في الحصول على انجاز رياضي ضخم في الرياضة الفلسطينة وعلى مستوى القدس بشكل عام ونحسد عليه من جميع الاندية الرياضية اللي هو الملعب .. بلشنا نقول انه في نادي وصار في عنا نشاط اكثر واكبر .. بتامل من شباب البلد انهم يتوجهوا للنادي , هذا محل الهم ومش راح يسكر بوجه أي انسان مهما كانت انتماءاته .. النادي مفتوح للجميع وعشان نطوره لازم شباب البلد يتواجدوا فيه دائما .. اليوم عنا نشاط تنس طاولة وفي النشاط الكشفي وفي نشاط الدبكة وفي سباحة وكرة قدم في جميع فئاتها وكرة سلة والكراتيه . هدف كبير عنا اننا نبني المجموعات الشبابية والنشاط الشبابي مهم جدا واللجان الشبابية في الاندية هي المحطات الاساسية في تطوير وتقدم النادي وبطلب من شباب البلد انهم يتزجهوا للنادي ويشكلوا اللجان الشبابية بالشكل الصح وينطلقوا من هذه المؤسسة لتطوير كثير شغلات في القرية بحاجة الى تطوير . -انا سمعتك بتحكي الهيئة الادارية للنادي , ممكن نعرف من هم اعضائ الهيئة الادارية للنادي ؟؟ طبعا , خضر عبيد رئيس النادي - الذي هو انا – محمد داوود محمود نائب رئيس موسى عرفات نصطفى مسؤول عن العلاقات الخارجية عالب ناصر امين سر توفيق محيسن امين الصندوق عاصم عبيد المشرف الرياضي بلال درويش المشرف الشبابي محمد حسن عضو محمد خضر ابو الحمص كمان عضو وكان عنا اخر عضو رحمة الشهيد سمير داري -هل هناك دعم للنادي او من يدعم النادي .؟؟ هذا الامر مفتوح وبنحب الناس تيجي تكشفه ,, لا يوجد أي دعم للنادي , طبعا بجي مرات او في فترات متقطعة مبالغ لا تكفي نحضر مائ للفريق الاول من السنة للسنة . اخر مرة تم تقديم مبلغ 1600 شيكل من اكثر من سنة , موعودين ما بين 1100 و 1400 دولار من قبل محافظة القدس .. لحد الان لم نستلمهم .. والمفروض اننا نستلمهن في أي لحظة .. والوضع المادي للنادي اليوم تعيس جدا مديون بشكل كبير على اساس انه في سور للملعب نحن اخذناه على عاتقنا اننا نسويه .. وهذا السور كلف 15000 دولار , توجهت انا بشكل خطي ايام ما كان السلطة في ايد فتح وكان الاخ ابو علاء قريع ريس لوزراء توجهتله بطلب رسمي لتقدسم مساعدة للسور الاستنادي . ابو علاء تبرع في 15000 دولار وتم المصادقة من رئاسة الوزراء على صرف المبلغ ولكن حتى الان لم يصرف المبلغ ولا حتى أي جزء منه .. طبعا اكيد صار في بعض العراقيل , كثير ناس صاروا يحكوا انه النادي مدعوم من بيرس وابصر شو , لو بدنا نحكي على موضوع مركز بيرس للسلام الذي كنت انا اشتغل فيه قبل سنة وشهرين تقريبا وتركته ولا مرة كان له أي اتصال او أي صلة مع النادي اطلاقا عمره ما كان النادي اله أي علاقة مع مركز بيرس للسلام ولا باي صورة من الصور, اذا كانت العلاقة معي بشكل شخصي انا اعترف اني كنت اشتغل مع مركز بيرس بشكل شخصي زهذا امر لا يخفى , ولكن علاقتي انا مع مركز بيرس عمرنا ما دخلنا النادي في النص , وفي كثير ناس بحكوا انه النادي اله علاقة مع مركز بيرس لكن انا بنفي هذا الكلام جملة وتفصيلا واي حدا عنده اثبات بسيط على انه النادي له علاقة مع مركز بيرس نحن مستعدين لاي محاسبة في هذا الموضوع بما انه هذا الموضوع للنشر فنحن مستعدين لاي انسان بحب يناقش هذه النقطة فنحن مستعدين له .. -ما هي اخر نشاطات وفعاليات النادي في مختلف الانشطة الرياضية ؟ بالنسبة لكرة القدم كان في عندنا بطولة شهداء واسرى العيساوية وكانت سداسيات تنظمت هنا واشترك فيها 16 فريق مقدسي وكانت البطولة ناجحة الا ان الزخك الجمهوري اذي كان للفرق الاخرى ولم يكن للعيساوية جمهور رغم ان البطولة كانت في ارضنا هنا وطبعا وصلنا للدور الرباعي في هذه البطولة مع مشاركة فرق من الدرجة الممتازة. في عندنا بطولت الفرق المساندة نحن اخذنا المكز الاول على الثلاث بطولت التي هي مركز اول لمواليد 1990 ومركز ثاني لمواليد 1992 ونحن هنا نحسبها على عدد النقاط والعيساوية هو حصل على اعلى عدد نقاط وشارك في كل بطولة ما لا يقل عن 13 نادي . حاليا مشاركين في بطولة ينظمها نادي هلال القدس وان شاء الله بنحقق نتيجة . في بيت حنينا صارت بطولة رمضانية في كل القدس وحصلنا على المركز الثاني ,خسرنا المباراة النهائية في ضربات الجزاء. بالنسبة لفريق رجال الاعمال .. هذا الفريق لعب تقريبا 8 مباريات ولم يخسر الا لعبة واحد والباقي فار بها .. بالنسبة للكراتيه اخر اجاز كان بطولة باقون على العهد .. العيساوية حصلت على المركز الاول على جميع الفرق حيث شارك النادي في وزنين في وزن حصل المركز الاول الثاني و في الوزن الثاني حصلوا على المركز الثاني وبالتالي حصلوا على المركز الاول على جميع الفرق في البطولة . طبعا للكراتيه بحب اوضح نقطة .. في ناس صاروا يحكوا انه الكراتيه تابعة اللي بدهم يسافروا على اليابان مع مركز بيرس ومع السلام وما سلام , وانا بحكي انه هذا الحكي فش منه لانه اصلا ما اله علاقة مع النادي وفي نفس الوقت اناكنت قاطع علاقتي مع مركز بيرس وهذا الكلام فش منه وكله حكي اشاعات عشان يحاولوا يخربوا على الناس اللي بدها تمشي لقدام والعالم بتضرب عليها حجار من الخلف على العكس عنا كتب رسمية من الاتحاد الفلسطيني للكراتيه وعندنا دعوة رسمية من اليابان موجهة لنادي العيساوية ونحن ما شاركناش الا بعد ما اخذنا موافقة الاتحاد الفلسطيني للكراتيه وانا بتامل اني اقدر ازودكم في صور لاعبن نادي العيساوية وهم تحت العلم الفلسطيني في اليابان وكمان وهما بلعبوا في الكوفية الفلسطينية .. -ان شاء الله ... يعني هلقيت في عضو مسجل في المنتدى باسم esawiah club -اه عرفته اه -هو نزل مرتين في المنتدى دعوتين مختلفات تمام في النص وفي الجهة اللي موجهة منها الدعوة , كان في اختلافات بين الدعوتين , فأني من هذه الدعوتين هي الصحيحة ؟؟ -انا عندي الكتب الرسمية موجودة لحد الان بقدر اني ازودكم فيها .. انا بعرفش مين هو .. انا بعرف الدعوتين . انا ما قراتهم ... ولو قراتهم كان بحكيلك .. بس نحن توجهتلنا دعوة من اتحاد الكراتيه وفي نفس الوقت في عنا موافقة الاتحاد الفلسطيني للمشاركة وكتبوا في الموافقة بشرط اننا نطلع في اسم نادي العيساوية وطلعنا هناك, الان طبعا في جهة ثانية مسافرة من هنا , والمشاكل الموجودة بين الاتحادات في الكراتيه هي التي خلقت توع من المشكلة والبلبلة في الموضوع وصار في نوع من الاتهامات .. في مشكلة بين الاتحاد الفلسطيني للكراتيه واتحاد PTKF. احنا كنادي تابعبن للاتحاد الفلسطيني للكراتيه وهو الاتحاد الرسمي المعتمد من جميع الجهات ومن قبل وزارة الرياضة والشباب وهذا الحكي معترف فيه وين مكان باقي الناس الي بتلعب رياضه بتلعب كراتيهمع أي محل تاني فهي مش معتمدة بشكل صح ، مع احترامي الشديد للاتحادات الاخرى فهي اتحادات ماديه ,اتحاد الي بدو يوخذ عشان بطاقه يوخذ مصاري من اللاعب واتحاد عشان بطوله بدو يوخذ مصاري من اللاعب احنا مش تابعين لهذول الناس احنا تابعين للاتحاد الفلسطين الرسمي . انا واضح جدا معك هلكيت اذا هذول الناس بدهم يتعاملو في هذا الاسلوب وانا ما بحبه وانا انسان صريح جدا لما كنت مع مركز بيرس كانت كل الدنيا تيجي تسالني وكنت احكي انا مع مركز بيرس, مرة واحد من الاخوان الي بدهم يصطادو في المي العكرة, توجه للاوقاف صار يحكيلهم انتو بتدعموا خضر عبيد وابصر شو وهذا مع مركز بيرس رحت على الاوقاف انا وقدام كل المجلس تبع الاوقاف وكان معي محمد حسن عطية حكو لمحمد عطية انتا خضر عبيد حكيتلهم لألأ انا خضر عبيد وانا بشتغل مع مركز بيرس بشتغل 4321 لما كنت اروح عند الرئيس ابو عمار رحمة الله عليه كنت اروح وهو بعرف اني مع مركز بيرس وكنت ارجع وانا مع مركز بيرس يعني لما كان معاي تصريح من الرئيس ما كان حدا يحكي. فلما كانت تواجهني مشكلة كنت اتوجه لكبار السلطة في موضوع بيرس بس البلد مش قادرة تتصور الموضوع - يعني كان شغلك مع بيرس نشاط رياضي وين المشكلة ؟؟؟؟؟ سونا كل شي ما خلوا صفات الا حطوها - انا كنت مسجل طبعا في مدارس كرة القدم كنا مرات نطلع نلعب معهم نروح نسوي مثلا نشاط ونلعب مع مدارس كرة القدم التابعة لمركز بيرس عرب مع يهود يروح يقولولك غاد بكو دايما يسوو اللعب بين عرب ويهود بين بعض وكانه فش بينهم اشي مثلا الولاد الزغار هان يرجعوا يحكوا لأهلهم لعبنا مع يهود اليوم ولعبنا وكيفنا وصاروا يوخذوا فكره انه اليهود فش منهم اشي وانهم اليهود مناح وليش ما نكون عايشين مع بعض وكل هالقصة - ونفس الفكرة يمكن اتقلت عند الولاد اليهود ... - طبعا هاي الفكرة تعجبش اكثر الاهالي ولا لأ ؟؟ - للاسف انو كان يزيد العدد كل سنة كنا 50 واحد اول ما بلشنا صح؟ - صحيح لما خلصت 150 وكنت اطحي 50 هلقيت لو ما تعجبنيش الفكرة اقل ما فيها انه الواحد ما بيجي كمان سنة ,معظم الناس بيجو بيضلو مستمرين من اول سنة لطول السنين واحنا ماشيين في المشروع - بس ايامها كنا نتدرب مع نادي العيساوية ,كان الي يدربنا نفسه هو الي كان يدرب طلاب مدرسة كرة القدم في نفس التدريب وطلاب مدرسة كرة القدم كانو يدربو مع نادي العيساوية - كان في فصل بين فريق كرة القدم عن تدرب النادي - حسب ما اذكر كان تدرب واحد - لأ غلطان انتا - في اول مدرسة كرة قدم كانا لما نطلع نلعب برة في البطولات مثلا كنا نطلع نلعب في الكلر الاحمر وكان مكتوب عليه مدرسة كرة القدم مدرسة خضر عبيد لكرة القدم - يعني مش فريق العيساوية دير بالك انا مكنتش في النادي دير بالك كنا نطلع نلعب ونسوي بطولات بس مش كل الي كانو في المدرسة كانو يطلعو - مزبوط - كانو الناس المعروفين هم اللي بعرفوا يلعبوا كانوا يطلعوا هلكيت اسمع في مدارس كرة القدم لأيش بتطمح لأيش بتسوي انك انتا بتنادي اللاعبين المعروفين توخدهم للنادي هلقيت مدرسة كرة القدم كانت اشي والنادي كان اشي تاني يمكن انتا فاهم الفكرة هيك بس هي اصلا لأ ماكانش المدرسة تابعة للنادي حتى من ناحية ميزانياتها ومصروفها كذا قيم وحط مش انا كنت اخد منكم رسوم اشتراك في المدرسة مكانش للنادي ولا شيكل والنادي مخصوش بالمرة - يعني نفس لعيبت النادي كانو في المدرسة - مزبوط كان لحد اخر سنة موجودين في المدرسة وبلعبو في النادي - هلكيت هاذ بتعارضش مع انظمة وقوانين الاتحاد انه لا يجوز للاعب ان ينتمي لاكثر من نادي ؟ لأ المدرسة هي محل مش رسمي مش تابع لأي نوع من الاتحادات ولا لأي اتحاد ثاني عشان هيك فش تعارض ,الاتحاد الوحيد الي انت بتلعب فيه هو الاتحاد الفلسطيني لكرة القدم. - ما هي اخر المراكز والبطولات التي حققها النادي في مختلف الانشطة الرياضية؟ كثيرة ومنها مركز اول لمواليد 88 بطول فلسطين بطوله اسمها بطوله الربيع استلمنا كاْس البطوله من الرائيس ابو مازن هي اهم بطوله مركز ثاني في بطولة سعيد الرمضانية مركز اول في بطولة لمواليد 90 لرابطه انديه القدس مركز ثاني لبطولة مواليد 92 مركز ثاني لبطولة مواليد 94 مركز اول لبطولة لمواليد 94 الي صارت في العيساويه كانت بطوله الاسير الفلسطيني مركزثاني لبطوله البراعم لمواليد 94 في ابناء القدس في رمضان بطولات كثيرة في الكراتيه على مستوى الفتيات والشباب بنات فش في كل فلسطين في كل البطولات الي شاركنا فيهن ولا مرة انزلنا عن المركز الاول لا في البنات ولا في الشباب بس في البنات قاطبتا ناخذ دائما مركز اول ثاني ثالث نحصد مدليات بشكل كبير في بطولات الكراتيه في السباحة اخر مركز مركز ثالث على انديه القدس هذى هي الانجازات الاخيرة تقريبا هل سمعت عن منتديات العيساوية ؟ وما هو رايك في ذلك ؟ اكيد اسمعت وانا اطلع على المنتديات بشكل دائم رائي انه انشاط كثير منيح كان لي مرة تعليق بسيط والي هو بشكر المسؤل عن المنتدى في انو مباشرة قدر يسيطر على المشكله الي حصلت في انو اثنين من الشباب (بصدق ما بعرفهم لهذة اللحظه) جرحو فيا انا شخصيا وجرحو في الاخ الشيخ رياض ياسر وهذا كان مبداء مرفوض تماما بالنسبه لي والحمدلله انه قدر في المنتدى بسرعه انو يوقفو هذة المهزله واذا هنا فرصه احكي بالنسبه للمشكله بيني وبين الشيخ رياض ياسر انا بعتبر ما في مشكله انا عدة مرات صرت حكيها واليوم بحكي الاخ الشيخ رياض اخ عزيز علي ما بنسى فضله المشكله بيننا مشكله مؤسسات مش مشكله اشخاص ,مشكله بين النادي وما بين الجمعيه وبتامل انو تنتهي على خير هذة المشكله . - كلمة توجهها للشباب في القرية بشكل عام وفي منتديات العيساوية بشكل خاص لمنتديات العيساويه بدي اوجهلهم كلمه مهمة جدا ان الاهتمام بالنواحي التربويه للطلاب قدر الامكان يظل والتعليميه للطلاب قدر الامكان انو نظل نهتم في توعيه الشباب وحثهم على العلم وكمان بنسبه للشباب انا بركز على نفس النقطه انو ننظر للعلم ان السلاح الاساسي الموجود عنا ما ننظر على الامور الماديه والتافهة, نحاول نتحلى بالاخلاق الحميدة والااحترام المتبادل هذا الاشي مهم جدا ان كل انسان يتمتع بالاحترام المتبادل في البلد كل انسان يحترم الغير على شان الغير يحترمو يهتم في النظافه وهذا عنصر من الاساسيات التي اهتم بها وبحث اهل البلد يهتمو فيها يهتم بجيل الاصغر منو كشباب ننظر عليهم على اساس نبني فيهم الامور الي احنا فقدنها وهم كمان ما يفقدوها بنفس الوقت بحب اقول عن املي شو بتمنى بتمنى اشوف شباب العيسويه وهما رايحين في الباص ما يكونو رايحين بملابس شغل بتمنى اشوف كل واحد حامل الزوادة تبعته ورايح على الجامعه على شان يكمل تعليمه بتمني يكون في العيساويه كثير من المراكز التي تهتم في الشباب اليوم موجود النادي بتمنى انو يكون منتدى ثقافي في العيسويه او مركز الثقافي اللي نرعى الشباب ونحاول من هناك نخرج شباب قيادي ناجح |
|
|
|
20-01-2009, 09:09 PM
|
#2 | ||||||||||
|
واحد من الناس
|
ننشر الردود التي وردت في المقابلة مقتبسه بعد فقدانها بسبب التخريب اقتباس:
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
|
||||||||||
|
|
|
20-01-2009, 09:17 PM
|
#3 | |||||||||
|
واحد من الناس
|
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
|
|||||||||
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
العرض العادي
