الشيخ درويش درويش رجل البناء وتطوير القرية

[ام زيد]

بسم الله الرحمن الرحيم

في اول مقابلة لنا مع احدى شخصيات البلد البارزة نستضيف ان شاء الله رجل البناء والتطوير في القرية الشيخ درويش درويش
وقد قمنا (خيّال البلد و Adm ) باجراء المقابلة التالية مع الشيخ ...


- الاسم : الشيخ درويش موسى محمد درويش ( ابو معمر )
- تاريخ الميلاد : 18/7/1951 يوم الاربعاء
- نبذة عن حياته :
( انهيت دراستي الابتدائية عام 1965 , عملت موظف مراسل في البنك العثماني في الفترة بين 1966-1970 , ثم اعتقلت
في تاريخ 19/11/1970 حيث كنت منتميا لمنظمة التحرير الفلسطينية, وافرج عني بتاريخ 19/11/1973 , عملت في مستشفى المقاصد الخيرية في الفترة بين 1974-1976 ثم عملت في مجال البناء , كنت مشتركا في لجنة العمل التطوعي بير زيت منذ عام 1974 الى يومنا هذا ,اعمل متطوعا في خدمة شعبي وبلدي ,كنت احد اعضاء لجنة تطوير العيسوية
الاولى , ومديرا للجنة الحالية , مديرا لشركة باصات العيساوية , رئيس ملتقى سيدات وابناء العيسوية (المركز الجماهيري)
وأحد رجال الاصلاح المعتمدين في القرية.)

- نبذة عن لجنة اعمار وتطوير قرية العيساوية ؟
( في عام 1989 شكلت لجنة في العيساوية وتم تعين هذه اللجنة من قبل اهل البلد وذلك من اجل خدمة البلد الاجتماعية
ففي ذلك الوقت كان عندنا مشاكل في المياه العادمة (مياه المجاري) وفي ذلك الوقت ارتأى اهل البلد ان يشكلو لجنة من اجل مراجعة البلدية وذلك للاهتمام في المشاكل الاجتماعية والبنية التحتية .
فتم تعيني درويش درويش والمرحوم منير حسان والمرحوم سعيد يوسف مصطفى والمختار محمد صالح عبيد وشعبان عبيد وداوود عطية ومحمد داوود محمود وخليل محمود غريب و يحيى عوض الله درباس وربحي داري . واغلبية هذه الاعضاء
انسحبو من اللجنة وبقي خمسة اعضاء , درويش درويش رئيس , داوود عطية امين الصندوق شعبان عبيد لجنة مالية محمد داوود وربحي داري لجنة متابعة ,وقامت اللجنة بعمل عدة مشاريع في القرية مثل مد خطوط المجاري وايصالها للبيوت
وتعبيد الشوارع وشق بعض الشوارع وتطوير المقبرة وتطوير حي الجامع هذه بخصوص اعمال اللجنة . )

- ما هي المشاريع المستقبلية من اجل اعمار العيسوية ؟
اللجنة قامت بعدة مشاريع سابقة مثل ما قلتلكم اللي هو خط المجاري والشوارع والانارة وقمت انا بتطوير المقبرة بمساعدة اهل الخير في البلد وبناء ديوان على ارض الاوقاف اللي هو ارض المقبرة في البلد وعملت كذلك شركة باصات للبلد شركة مساهمة انا احدد المؤسسين فيها وطورت منطقة الخروبة ( حي الخروبة ) . ان شاء الله انا حابب اننا نعمل في المستقبل نبني مدارس ثانوية في البلد وبناء بناية عامة للمسنين ففي ناس متبرعين في ارض من عندهم من اجل اقامة مركز مسنين و مركز جماهيري في البلد وان شاء الله توسيع بعض الشوارع وشق بعض الشوارع في البلد .

- ما هو رايك في شباب البلد في الوقت الحال ؟
(والله سؤال وجيه ,شباب بلدنا طيبين عندهم النخوة والشهامة لكن ينقصهم الرعاية التامة والوعي من اجل ان يبنو انفسهم
رجالا للمستقبل وانا اناشد جميع الشباب وخاصة في وقتنا الحالي ان يحافظوا على دينهم وشرفهم وعلى خدمة بلدهم وشعبهم
وبطلب من جميع الشباب ان يساعدوني من اجل تطوير واصلاح القرية لان في عبارة تقول ( زرعوا فاكلنا نزرع فياكلون )
وبطلب من جميع شباب البلد ان يحافظو على الممتلكات العامة مثل الجامع والشوارع والباصات تعد ممتلكات عامة لان الانسان يكبر في اهله وشبابه لا يكبر في نفسه فنحن جميعا يجب ان نحترم بعضنا ونكبر بانفسنا وليس بالاخرين .

- ما هو رايك في المستوى التعليمي في القرية ؟
مهو انا من اجل هذا اناشد الشباب بان يهتموا بانفسهم لان التعليم عندنا في القرية تعيس ومتدني لدرجة من اجل ذلك عندنا تخلف وجهل كبير في القرية وانا كنت منتخب من قبل اولياء امور الطلاب في 1997 وكنت اراقب طلاب الابتدائي والاعدادي
وحتى البنات على كثب فكان في فلتان قوي في مدارس الشباب وحتى حاليا في بعض الشباب يقول يا ريت كنا نرد عليك يا ابو معمر .فانا بناشد الاهالي والشباب انهم يهتمو بالتعليم لان (كلكم راع وكلكم مسؤول عن رعيته ) الشب مسؤول عن نفسه والام مسوؤلة عن اهل بيتها والموظف مسوؤل عن عمله وكل واحد مسؤول عن الرعاية التي يقوم فيها . فيا ريت اهل بلدنا يساعدوني من اجل تطوير البلد والله لو بردوا علي ويعطوني كل واحد بس شيكل في الشهر اني لسوي العيسوية احسن من التلة الفرنسية وسبق اني كنت الم عشرين شيكل وطورت المقبرة من عشرين شيكل وشوفو حاليا اني بنيت ديوان للبلد ,انتو شاهدين على الحكي هذا, كنت اوقف في الشارع و اشحد ويحكو عني شحاد عشان اسوي للبلد واطور البلد وانا كنت فخور اني انا قاعد بعمل فيا ريت يكون في البلد ناس فخورين ويعملو ويساعدو من اجل بلدهم .



- هل عندك فكرة عن عدد سكان القرية ؟
نعم عدد سكان القرية الحقيقين 8000 نسمة والسكان اخواننا المستاجرين يقارب 2500 نسمة تقريبا كلهم بمعدل 11000 نسمة.


-ما هو وضع القرية في البلدية وما هي الخطط التطويرية المرسومة لها في المستقبل ؟
حاليا وضع البلد في البلدية يعد غير مقبول لانه فش مساعدة من البلدية لاهل البلد وكذلك اهل البلد مش متعاونين مع بعضهم من اجل ان نلاقي حل وخاصة لاوامر الهدم ,حاليا قمت انا وهاني احمد علي العيساوي واللجنة السابقة اللي كانو معي بطلب توسيع مخطط ومسطح القرية , وحاليا نشتغل عليه ان شاء الله وتقريبا وصلنا بنسبة 50% من الطريق في الخارطة الهيكلية وبتامل
انه المشروع ينجح ونوسع مسطح القرية لذلك من اجل ان يلبي جميع متطلبات السكان السكنية ,ويا ريت اهل بلدنا يطاوعوني ويتبروعوا بشوارع ويحافظوا على حرمة الشارع .

- ما هو وضع شركة باصات العيسوية في الوقت الحال ؟
والله الحمد لله انتو ملاحظين على الطبيعة والواقع احنا بلشنا من الصفر بلشت انا اجمع 100 شيكل من اجل اسهم للباصات والحمد لله وضعنا حاليا ممتاز جدا , عنا حاليا 13 باص وكذلك لما فكرنا باقامة انشاء شركة باصات العيسوية شكلت لجنة من اجل المساعدة على انجاح هذا المشروع العام واعضاء اللجنة هم درويش درويش مدير ومهدي ابو حمص مدير وهاني احمد عيساوي مدير اداري وشام داري ويوسف عطية وحسن محيسن اعضاء في اللجنة ,فبمساعدة الجميع نجحت في بناء هذا المشروع القيم فحاليا وضع الشركة والحمد لله ممتاز , نملك 13 باص ووصينا على باص موديل 2007 فولفو جاينا في شهر شباط (2) عام 2007 . وبتمنا من اهل البلد ومن شباب البلد انهم يحافظوا على هذا المشروع .

- بالنسبة للمشاكل اللتي تحدث في الباصات بين الطلاب والطالبات ,هل تفكرون في حلول لهذه المشاكل ؟
بصدق وامانة انا بعد أي مشكلة بتحصل هي مشكلتي , فاول ما قمنا ببناء مشروع الباصات فكرنا اننا نفصل الطلاب عن الطالبات ,اللي الطالبات يستعملو باص والطلاب باص اخر ,حتى اني توجهت الى مدارس المامونية والرشيدية عدة مرات على انهم يطلعو البنات في وقت معين والشباب في وقت معين لكن لم ننجح , فبدون مساعدة الاهالي نحن لن نستطيع ان نجد حل . والله عدة مرات انا بنفسي اروح على باب العامود واطلع البنات في باص والشباب في باص , الا انه من جهل هؤلاء الطلاب يعملون العكس , وانا بقول صحيح نحن كنا مراهقين لكن مراهقين بآداب واخلاق مش زي المراهقين اليوم على البلفون والتلفون ,المراهقة صحيح انها عدو مثل الجوع والجهل فالانسان اذا ما وجد مين يراعي هذا المراهق قبيوقع في الهاوية , بطلب من جميع الاهالي انهم يراقبو بناتهم واولادهم وخاصة ان اهليهم كلهم كانو مراهقين فبيعرفو ماذا المراهق يعمل , فبطلب من الاهالي خاصة من الامهات لانه الام لها من نسبة التاثير 95% في البيت والاب 5% لانها الام هي اللتي تكون في البيت ومتواجدة فيه لان البنت بتبوح في سرها لامها وكذلك الشب فيا ريت انه ربنا يعطيهن للامهات الموهبة والعمل الصالح من اجل ارشاد بنتها وابنها ويرشدهن الى طريق الصواب , لان الام واجب عليها تدير بالها على اولادها وهذا من عمل الدين , خطية الجاهل في رقبة العاقل , لازم الام هي اللي تاثر على الابن والبنت .

- انت سمعت عن منتديات العيسوية , لما سمعت عنهن ماذا كان رايك فيهن ؟
الامانة انا بالنسبة الي أي مشروع عام في القرية بسرني وبفرحني لانه هذا بيرفع من مستوى القرية فالحقيقة انا سمعت عن منتديات العيسوية وجدت فيهن الامانة والخدمة الطيبة والعمل الجيد, فبتامل من المقيمين والمشرفين على هذه المنتديات انهم يعملوا بصدق وامانة , اذا أي انسان بده ينجح في عمله فقط صدق وامانة , ويجب علينا ان نحترم بعضنا البعض الصغير يحترم الكبير والكبير يحترم الصغير . لان العلم يبني بيوتا لا عماد لها والجهل يهدم بيوت العز والكرم , ويجب ان نحافظ على علمنا وعلمائنا.

- كلمة اخيرة لشباب البلد بشكل عام واعضاء منتديات العيسوية بشكل خاص ؟
انا مثل ما حكيتلكم بناشد جميع الشباب بنات وشباب انهم يشاركوا في تطوير هذه القرية وبالنسبة للمنتديات مثل ما قلتلك بناشدهم انهم يعطو نشرة اعلامية صادقة عن وضع القرية ويحثوا الشباب على تطوير القرية .



ايها الاعضاء الكرام
الان كل من لديه سؤال يريد توجيهه للشيخ درويش
يستطيع وضع السؤال هنا ونحن نقوم بتوصيل السؤال له ليتم الاجابة عليه

[خيّال البلد]

[align=center]السلام عليكم ورحمة الله وبركاته ...

اخواني اعضاء وزوار منتدايات العيساوية ...

بعد ما تعرض له المنتدى من اختراق وتخريب خلال هذا الشهر ( شهر 1 /2009 ) اصرينا على ان نعيد المنتدى كما كان .. بمواضيعه الجميلة والمميزة والتي تخض البلد

وبعد حعد كبير وبالذات لاخونا العيساوي .. وبعد ان وجدنا نسخ عن المواضيع .. اسمحوا لي بان اقوم باقتباس الردود كما كانت من قبل ..


وعلى بركة الله نبدا ..

مشكور الك اخ خيال البلد انتا وادم
على تعبكم هاد والله يعطيكم العافيه
وانشالله نواصل بتعمير البلد يا رب

Ŗąfę

مجهود رائع فعلاً اخوي خيّال وآدم وأسئلتكم ( على الوجع زي ما بقولوا)

وبالنسبة للمدارس الثانوية .. أرجو أن يتم بنائها بأسرع وقت لانه الواحد بتغلب بالمواصلات وخاصّة لما يكون في حاجز

سؤال :- عندما تحدث مشكلة في البلد بين عيساوي وآخر غير عيساوي( طبعاً ما في فرق) مع مين بتوقف.. او بتتعاطف أكثر ؟
أرجو انو ما تفهموني غلط

تحيات
محمد نخال

اول اشي بحب اهنيكم على افتتاح هدا القسم الرائع والمميز والمفيد وتاني اشي انا بحكي متل ما حكى اخوي نخال انهم يسرعو ببناء المدارس الثانوية
لانهم المشاكل بدال ما تخف بتزيد
وانا عندي سؤال لضيفنا الغالي وهو:
لماذا تبذل كل هذا الجهد والعطاء للبلد وتسعى لرقي وتطوير وتنمية هذا البلد؟

ДŁ-мoĐąмЄr

مشكور ادم وخيال

ع مجهودكم الكبير

بجد مشكورين كتير كتير

odai

أول شئ أحب أرحب بضيفنا الكريم السيد أبو معمر درويش درويش

واشكر الأخ خيال البلد وادم على المقابلة الرائعة والشاملة تقريبا لكل ما يمكن ان نريد سؤال السيد درويش عنه

نأمل أن يستمر عطاء ضيفنا وان تتطور بلدتنا إلى الأمام أكثر وأكثر

الشئ الوحيد الذي حبيت ان اسأل عنه هو هل تهتم اللجنة بشكل عام بكل ما يدور في القرية من اعمال بناء يتم فيها الاعتداء على حقوق الطريق (بمعنى ان البناء يسرق جزء من الشارع للاسف)
كثرت هذه الأشياء للأسف ولا نفهم من يهتم بها ....مع إني قريت في الموضوع طبعا انه الشيخ درويش طلب من أهل البلد يحترموا حرمة الشارع.



وللاسف ايضا مخارج البلد خنقونا فيها يعني ما ظل عنا في البلد الا مخرج من شرق البلد والمخرج الي عند الكازية !!! وباقي المخارج سكروها يعنوا ربطونا ووقت ما بدهم بغلقوها وبيخقونا وبيصير الدور طوابير على الحواجز (المحاسيم )للاسف
يا ريت نسعى لفتح مخارج اخرى للبلد بلكي حلينا هالمشكلة .


وبخصوص الخطة الهيكلية يارب تزبط لان بلدنا للاسف صارت اشبه بمخيم وما بتفتح الشباك الا وجهك بوجه جارك وكأنك انته واياه في نفس البيت البيوت كل بيت ملزق بالثاني ...

يا رب ان كلامي ما يكون في أي ازعاج انما فقط اشياء حابين نحكي فيها لا اكثر وليس فيها أي انتقاد لعمل المسؤولين وانما كلام من القلب ليصل لمن يهمه الامر...

واخيرا اشكر السيد درويش درويش على الجهد الحقيقي والواضح في تطوير البلد والله يعطيه الصحة ليقدم كمان وكمان....وان شاء الله منتديات العيساوية ومشرفيها يظلوا عند حسن ظنك وظن الجميع من اهل البلد

العيساوي

مشكورة يا ادم وخيال البلد

نرمان

شكرا الك اخ خيال البلد واخ ادم على مجهودكم الحلو
وان شاء الله نواصل بتعمير البلد

اسيرة الحب

يا اهلا وسهلا فيكم جميعا
وشكرا الكم وعلى مروركم الرائع وتعليقاتكم الحلوة

ان شاء الله سيتم توجيه الاسئلة المطروحة للشيخ درويش
لكن ننتظر اذا في اسئلة اخرى ...


ملاحظة
ان شاء الله سنضيف اكم مقطع تسجيل صوتي للمقابلة
بس ان شاء الله بعد ما الاكي برنامج لتقسيم ملفات الصوت ..


ولا ننسى ان نشكر ونقدر الشيخ درويش على هذه المقابلة التي احسن استضافتنا فيها ..
والله يخليه ذخرا لهذا البلد ...

تحياتي .. خيّال البلد

ana bde asal 5eal albld
men aldef al tane
ale bdkm tsww m3a mkabla

mike

يتبع ...[/align]

[خيّال البلد]

والان نكمل معكم بقية المشاركات ..

مشكووووووووووووووووور يا خيال البلد على جهودك الطيبة

الجنرال الفلسطيني

الله يعطيكم العافيه(خيال البلد وادم) على المجهود الي بذلتو
ويعني جميع الاسئله الي سألتوها كانت حلوه

ومشكورين

تحياتي
كارين

السلام عليكم ورحمة الله وبركاته:
بارك الله فيكما اخ خيال البلد واخ ادم على مجهودكم المتواصل
وان شاء الله نواصل بتعمير البلد
ويعطيكم العافيه يارب

تحياتي لكم
أختكم في الله:ذات النطاقين
سلام عليكم

اولا بحب أرحب بالضيف الكريم وأقوله اهلا وسهلا بك بين ثنايا منتدى العيساوية
وأود ان أشكره على كل ما قام به وكل ما يقوم به من اجل بلدة العيساوية الصامدة
وأشد على يده وأدعو له بوفير الصحة والعافية وبالتوفيق والى الامام ان شاء الله
ليس عندي أسئلة معينة بل يكفيني أن تعرفت على إحدى شخصيات البلدة الذين يسعون لبناء البلدة وتطويرها
وأحث الجميع على ان يسيروا على نهج ودرب ضيفنا الكريم حتى يرتقوا ببلدتهم .
أخيرا اوجه شكري للأخ آدم والأخ خيال البلد على ما يقومون به من جهد وما يبذلون من طاقة لانجاح هذا الموضوع
وأرجو أن يقوم الجميع بالاستفسار ما يريدون من الضيف الكريم ولا بأس ان كان هنالك بعض الاقتراحات .. فإن لم تنفع فبنفس الوقت لن تضر .

تحياتي
أخوكم
free guy

مشكور اخ ادم وخيال البلد
برحب بلضيف الكبير السيد درويش درويش
وبحب اوجه سوال الى الضيف
بعد كل هده السنين مافي حدا بلبس القمباز
ليش انت محتافط بهدا التقليد الرئعة

يالله شباب وصبايا
هذي فرصتكم علشان تقولوا كلمه حابين تحكوها علشان بلدكم

اخونا الضيف الكريم من الناس الي بتحب مصلحة البلد
واكيد بيهمه يسمع اي شئ حابيين تحكوه او تشوفوه في بلدكم
لا تضيعوا فرصة مثل هاي من ايدكم

ناقشوا الضيف وهاتوا احلامكم واسئلتكم حتى نسمع رأى الناس الي بهمها مصلحة الكل

بالتوفيق وننتظر الاسئلة من الجميع

العيساوي

بسم الله الرحمن الرحيم
السلام عليكم ورحمة الله وبركاته
سؤالي لماذا كلما ذهبنا الى البلديه او الى جيحون ليآتوا لاصلاح اي شئي تابع لهم
يقولون لنا اذهبوا الى درويش وعندما نذهب الى درويش يقول ما باليد حيله
والله تكلمت معهم كثير ومش عاملين اشي شو اسوي
بما انك لا تستطيع عمل شيئ لماذا يقولون اذهب الى درويش ؟
ومن بين هذه المشاكل وهي المهمه جدا وخطيره ايضا في فصل الشتاء
وهي موضوع جمع مياه الشتاء .......... النيكوز ......... من بيت يوسف مصطفى عبيد حتى قاعة كازم عبيد
والتي لا تتعدى مائه وخمسون مترا وربما اقل من ذلك
لذلك ارجوا من الشيخ درويش ان ياتي في اثناء الشتاء ويرى بعينه ما الذي يجري هناك

اما السؤال الثاني لماذا لم توزعوا على المساهمين في شركة الباصات من ارباح الشركه والجدير بالذكر
ان الشركه تعمل وتربح جيدا ,

شكرا لما قمت به من اعمال لخدمة اهل بلدك وجزاك الله خيرا

والسلام عليكم ورحمة الله وبركاته

ابو خليل

اهلا وسهلا بضيفنا الكريم
سؤال للضيف بما انه من المسؤولين عن تطوير البلد

هل سيكون لدينا في يوم من الايام حديقة او مكان للتنزه في البلد؟؟؟

مع الشكر مسبقا

عزف الرصاص

مشكورين كتير على مجهودكم الرائع
وتحيتي لكم وللضيف درويش

the prince man

مشكور يا خيال البلد وادم على الموضوع
تعبناكم معنا

ஜღsallyஜღ

مشكور أخي على الموضوع

عيساوي أصيل

مشكورين على مروركم الرائع
وسيتم الاجابه على الاسئله قريباا

مع تحياتي
ادم

مشكووووورين أخي آدم و خيال البلد
على الموضوع

تاكي

مرحبا حبيت احكي للي عمل هدا اللقاء الله يعطيك الفافيه بس عندي سؤال ازا السيد درويش بحكي انو في بالبلد 13 باص طيب ليش كل يوم بنعاني من انو ما في باصات وكل يوم بتاخر على الشغل وبوقف على الموقف نص ساعه واحيانا ساعه وفجاه كل الباصات بتطلع مره وحده ليش ما يعملو انو كل 10 دقائق يطلع باص مش يكونو الشوفريه بديونو او بوكلو عند المدرسه واحنا نتاخر على اشغالنا ومصالحنا وبتمنى انو تحل هاي المشكله لانو زي ما بحكي التطوير واحنامع التطوير وشكرا الكم

مجدولين

مرحبا
نحن نعاني من مشكلة اجتماعية وهي الشوارع فها أنا
أقترح على السيد درويش بأن يجمع من أهالي القرية
ميزانية لتصليح الطرق فالمجاري في حارتنا كل يوم بتنزل
فيا ريت توجدو حل لهاي المشكلة.
مع تحياتي

*عروس فلسطين*

اه من الصبح العالم رح تدفع اليوم الواحد ما بيدفع شيكل واحد لهيك اشي وان صا جمع هاي الاموال اتوقع بتسبة 99.9 %فشل هاذا المشروع مع احترامي وتحباتي

137

اسأل متى الجواب على كل هذه الأسئله وشكرا

ابو خليل

مشكورين ع مروركم الجميل
واحب ارد على اخوي ابو خليل
سيتم الاجابه على اسئلتكم انشا لله
بعد عودة الشيخ درويش درويش من الاردن
انشا لله

مع احترامي
adm

اه والله مشكلة الباصات مشكلة وبارك الله فيكم [img]طفل صغير[/img]

مرحبا للجميع
احنا اسفين على التاخير ( ادم و خيال البلد )
لكن لظروف طارئه
الاخ خيال البلد بقدم في امتحانات ندعو له بنجاح يا رب
وانا كمان عليه امتحانات في الجامعه
انشا لله اول السنه الجديدة وانشا لله بتكون سنه خير على الكل سوف نرجع لكم ومع شخصيه جديدة
مع احترامي للكل
adm

السلام عليكم ورحمة الله وبركاته
بارك الله فيكم أخواني
وبالتوفيق والنجاح الباهر بإذن الله تعالى
وفقكم الله إلى ما يحب ويرضى
والسلام عليكم ورحمة الله وبركاته

ذات النطاقين

مشكوووورين على عملك وجهدكم الطيب

lovely-boy16

مشكورييين عهالموضوع الحلو ويا ريت يكون بقريتي كمان مثل هاد المنتدى

amona

مشكور الك اخ خيال البلد

يحيى داري

يتبع .. ....
...

[خيّال البلد]

والان نكمل مع اخر الردود على هذا الموضوع .. ..

اولا اخوتي السلام عليكم ورحمة الله
ثانيا نحن اسفين جدا جدا والله على كل هذا التاخير
لكن والله الظروف كانت صعبة جدا وهي التي لم تسمح لنا باحضار الاجابات بالوقت المناسب

لكن الحمد لله استطعنا ان نكمل
( ان تاتي متاخرا خيرا من ان لا تاتي )

ولنبدا على الاجابات
وهي كالتالي
ناخذ سؤوال سؤال ونضع رد الاخ ابو معمر عليه ..

على بركة الله نبدا ..

اقتباس :

اول شيء انا بحترم شباب البلد وبحب اولاد بلدي لكن الحق يقال اول شيء انا بحبش حدا يتعدى على اولاد بلدي ولا بحب اولاد بلدي يكونوا متعدين على الاخرين , وانا خاصة اني بقيس كل مشكلة هي مشكلتي ان كان ابن بلد او مش ابن بلد فانا بوقف مع الحق لان الحديث يقول ( انصر اخاك ظالما او مظلوما فقالوا كيف يا رسول الله ,فقال ان كان ظالما رده عن ظلمه وان كان مظلوم ناصره في تحصيل الحق له . فانا لا يوجد عندي تمييز بين عيساوي وبين أي انسان من خارج العيساوية ,كلهم عندي سواسية وانا بوقف مع الحق فيعني كثير مرات بكون ابن البلد معتدي كنت ارده عن اعتدائه وما اوقفش معه نهائيا لاجل الحق فانا بشتغلش لغاية او لغرض انا بشتغل لوجه الله تعالى لاصلاح ذات البين ..


اقتباس :

اول شيء الدين الاسلامي يحث أي انسان انه يقوم بعمل الخير فانا انتمائي لبلدي وايماني بالله وبخدمة ابناء بلدي قاعد اخدم لاجل البلد ولوجه الله تعالى , ورب العباد يقول ( وقل اعملوا فسيرى الله عملكم ورسوله والمؤمنون وستردون الى عالم الغيب والشهادة فينبئكم بما كنتم تعملون ) صدق الله العظيم . فالانسان اللي بكون حريص على الاجر والثواب وعلى الايمان بالله مفروض انه يعمل لبلده وشعبه ,فنا سبق اني انسجنت من اجل حقوق شعبي والدفاع عنه , فانا لما اشعر حالي اني بعمل من اجل بلدي وشعبي بشعر اني عايش ومبسوط جدا ومستعد اعطي اكثر واكثر والتضحيات انواع , في من بضحي في ماله او نفسه او حاله وانا تربيت على التضحية منذ صغري ..


اقتباس :

بشكر الاخ العيساوي على هذا السؤال , حقا انه سؤال قيم ورائع . اللجنة حقيقة بتهتم في اشياء كثيرة من اجل تطوير البلد لكن كذلك نحن نطلب من جميع الشباب انهم يساعدونا لانه ايد وحدة ما بتصفقش فمفروض يكون في تعاون من الشباب مش فقط اللجنة لحالها حتى الشباب نفسهم يتعاونو من اجل تطوير البلد ومن اجل منع كل انسان يعتدي على حرمة الشارع في كثير من الحالات . الحديث يقول ( من راى منكم منكرا فليغيره بيده فان لم يستطع فبلسانه فان لم يستطع فبقلبه وذلك اضعف الايمان) وكذلك ( كلكم راع وكلكم مسؤول عن رعيته ) مش فقط اللجنة المفروض فيها لوحدها تهتم في البلد لكن لازم كل الشباب يساعدوا اللجنة من اجل تطوير هذه البلد ومن اجل خلق جو ومشاريع مناسبة للبلد اللي بتخدم في البلد .
بالنسبة للمدارس الثانوية انا الحقيقة بسعى , حتى اليوم (هذا اليوم ) اللي هو 11/1/2007 بعثت كتاب للبلدية من اجل بناء مدارس ثانوية وتخفيف تعب السفر على بناتنا واولادنا فيا ريت الشباب هم اللي يساعدونا في ضبط وربط الاوضاع وخاصة السفر من البلد الى القدس واذا هما بساعدونا بصير في حل مناسب وحل قوي .
بالنسبة لفتحات ومداخل القرية , فش ولا بلد ولا قرية في القدس الها اربع مداخل الا العيسوية , عنا مدخل الجامعة العبرية والمدخل اللي من التلة الفرنسية والمدخل الشمالي من عند الكازية الجديدة و المدخل الشرقي . فاجو يسكرو المدخل اللي عند الجامعة فرحت عشان افتحه وفتحته انا وهاني احمد علي ودفعت من جيبتي امانة الله دفعتهن من جيبتي واخذ بس حق السولار من شان نسهل السفرة ع البلد , لكن في الشباب الضايعة الشباب الصغار الفالتة هما اللي بخلقوا مشاكل للبلد , بروحو يعملوا اشياء مش كويسة لذلك بسكروا الشوارع . اما حاليا عنا المدخل الشرقي ان شاء الله بظل مفتوح وانا طلبت انه يتم فتح المدخل الشمالي ولكن في شوية عقبات . فحاليا مداخل كويسة اللي عنا واذااحنا بنساعد بعضنا كشباب وكاهل بلد بصير عنا كثير حلول مناسبة للبلد وخدمة لتطوير البلد كويس .


اقتباس :

ن
وانا برضه بشكر الاخت كارين على الاشتراك معانا وعلى شعورها واهتمامها بالنسبة للمنتدى ولوضع البلد


اقتباس :

الاخت ذات النطاقين مشكورة جدا على متابعتها لهذا الموضوع وبتامل انها تساعدنا وتشاركنا في تطوير البلد , في عنا المركز الجماهيري بتقدر تروح عند الست رباب العيساوي هي مديرة المركز الجماهيري وتشارك معها في تطوير البلد وانجاح المشاريع في البلد , فبطلب من جميع الصبايا والشباب انم يشاركوا في المركز هذا من اجل تطوير البلد


اقتباس :

الحقيقة انا بشكر الاخ فري جاي على مابعته لهذة البرنامج وللمشاركة ودعمه معنويا لهذا البرنامج وبتامل وبدعو الى الله ان يرجعه هو واهله انهم يرجعوا يعيشوا في العيساوية وفي احضان العيساوية واهله وبلده , وبتمناله التوفيق


اقتباس :

الاسم تبعك اسم حلو جدا وانا بحب الحرية وانا بشكره على سؤاله هذا وانا بطلب منه انه هو كذلك يدعم للحفاظ على التراث , فلباسي هو التراث ولباس عربي اصيل , احنا عنا في العيساوية الاغلبية لحد سنة 1985 كانوا يلبسو قمباز , لكن باسف انه اليوم صاروا اللي يلاقوه لابس قمباز يستغربوا لبسه بدل ما يفتخروا فيه او انه يحث ابوه او قرايبه انهم يفصلوا ويلبسو وانا شخصيا بحب احافظ على هذا التراث فانا لقيت انه هذا التراث يمثل اللباس العربي الاصيل واحافظ عليه , مع انه بكا في عنا ابوي كان يلبس قمباز وحماي عبد المجيد درويش لما مات قبل سنتين كان يلبس قمباز مش بس انا , وبحكي لابن الحرية بشكره على هذا السؤال وبطلب منه الحفاظ على هذا التراث .
اليوم اغلب الطلاب واغلب المدارس العربية خاصة اجو عندي من المدرسة وطلبوا مني قمباز وطلبو مني اشياء كثيرة تراثة واعطيتم , وبدا ما هذا التراث يتعلق في مدارس يجب ان يتعلق على اجسامنا كعرب لانه هذا فخر النا.

-طيب هل عندك ادوات وشغلات اخرى تتعلق في التراث ؟؟
عندي ادوات الزراعة عندي المحراث اللي بسموه السكة وعندي الكدرانة اللي بتنحط في الرقبة وعندي النير والغربال وعندي الخطافة اللي كنا نرميها في البير لما يوقع الدلو فيه , عندي حجر بسموه خزق البير تقريبا عمرها 150 سنة , في عندي حوض كانو يسقو فيه البقر والغنم جبته من شرقي البلد من منطقة اسمها بير الحج اقل تقدير عمره 100 سنة جبته من شرقا خوف من انه يرح وحطيته عندي , مرة اجا واحد يهودي يشتريه دفعلي فيه 1000 دولار بس ما ارظيت ابيعه ابدا لانه هذا تراثي وانا لا يجوز لي بيع تراثي ..


اقتباس :

الحقيقة انا بشكر الاخ العيساوي على هذا الدعم المعنوي وبطلب منه ومن جميع امثالة انهم يشاركوا معانا في تطوير البلد ومثل ما قلتلكم في السابق انو موجود عنا مركز جماهيري في البلد وهذا بهتم في تطوير البلد فبطلب من الاخ العيساوي ومن الجميع انهم يراجعو المركز هادا ونبني ايد فايد للبلد مش انا لحالي او انت لحالك مفروض الجميع يشارك
انا بدي فعل بدي مشاركة بديش انتقادات هوائية بدي انتقادات فعلية ويجوا يشتغلوا معي عشان نحافظ عالبلد فبطلب من العيساوي انو يشكلو لجنة تنظيف في البلد ويشكل فريق لنظافة البلد يعني لو اجينا لشباب زغار من سن 12 وطالع لطلاب الثانوية شو فيها لو اجو انا مستعد اني اوفر مكانس ومجارف وكل اشي وبنيجي نسوي حملة تنظيفات في الشهر مرة عشان نسوي وعي في البلد عالنظافة وانا بناشد الصبايا والشباب انهم يجوا يساعدوني في جملة تنظيفات لو في الشهر مرتين على اساس نحافظ على عيساوية نظيفة عيساوية جميلة ويشاركو معي عشان نزرع الشوارع شجر يا ريت , بناشد جميع الشباب يشارك معي في حملة التنظيفات الي حملة التنظيفات لو في الشهر مرتين واهاد في نضري رياضة ونشاط
وانا بطلب من العيساوي انو يسمع الحيكي هذا لبشباب البلد والصبايا (انهم يشاركونا في التنظيف في جميع مناطق البلد مش يس منطقة وحدة وحتى نفر عالسكان ونقلهم حافظو عالنظافة هاي بلدكم مش النا لحالنا البلد الكم وهذا مرض الكم كذلك.
يا ريت نقوم بحملة تنظيفات نعملها من اجل الحفاظ على عيساوية نظيفة.
وبشكر العيساوي على هذه الدعوة.


اقتباس :

بشكر الاخ ابو خليل , اللي هو اظن انه ساكن في شارع البستان . وفي الحقيقة البلدية من سياستها اهمال شرقي القدس وكذلك السبب اللي هو اهل البلد . انا اجيت عملت مشروع نيكوز في سنة 1995 انا واللجنة اللي بمتد من منطقة الحواكير (منطقة دار صالح الشيخ اللي تنزل من عند دار حورية ) لشارع البستان , فاجو ناس من اهل البلد ما رظوش يمرقوا النيكوز من اراضيهم لذلك البلدة قاعدة بتجاكر فينا . فبالنسبة الهم لما يقولوا روحو لدرويش انا رحتلهم عدة مرات وراح معي يوسف مصطفى عبيد على جيحون واوعدونا انهم يجيوا يشتغلوا لكن للاسف مش معنين يصرفوا ولا قلرش على العيساوية جكر في العيساوية لانهم هما نفسهم بقولوا عن العيساوية انها قرية مشكلجية . احكيلك ؟ بالنسبة لدرويش هما دايما برموا الحمل علي لحالي وكثير بروح انا واياهم وبنطالب وفي الاخر بحكيلك فش ميزانية لذلك يجب ان يكون في ناس من البلد يساعدوني مش انا لحالي من اجل اننا ننجح في أي مشروع في البلد . فبطلب من ابو خليل انه يجي يقابلني شخصيا عشان اوضحله شو الوضع بالنسبة للنيكوز هناك .. وبحب احكيله - بجوز هو بشوفنيش - اني انا كل يوم بسوي لفة في البلد مرتين الصبح والمغرب عشان اشوف شو في نواقص في البلد .. حتى اليوم 11/1/2007 كان في معي صحافة ولففتهم كل البلد وحتى اخذتهم لعند دار عيسى ابو عويس لفوق وفريتهم الدار اللي هدوها قبل 7 سنين . انا بشتغل بس بدي ناس تساعدني , وبطلب من اهل البلد يتجاوبوا معانا .. بتعرف انت لو انهم بيعطوني 10 شيكل كل يوم جمعة صدقني الا اسويلهم العيساوية نموذجية . والاثبات على ذلك انتو شفتوا شو سويت عند المقبرة , المقبرة بكت مزبلة عند الجامع بكت مزبلة شوفو شو سويت فيهن , وكذلك الديوان اللي سويته عند الجامع .. بكا غاد فش حدا يقدر يقبر ..
و بعدين قبل اسبوع كنت في البريد وقاعد بطالب في صندوق بريد واجتني الموافقة الحمد لله وعملت قسم في الديوان لصندوق توزيع بريد وان شاء الله بعد شهر زمان انه يكون في ردود ايجابية على ذلك ..

وانا بطلب من أي واحد بسال سؤال على الانترنت يجي معاي – كل احترام انه بتابع المنتدى هذا – بس برضه لازم يقعد معاي على اساس نشوف وجهة نظره. وبطلب مرة اخرى من الصبايا والشباب انهم يروحوا يدعموا المركز الجماهيري ومديرة المركز بنت من عنا من البلد فبقدروا يتساعدوا هما واياها ويطوروا البلد .. انا بديش بس يسالوا بدي فعل انه الناس تشارك في العمل . حكيتلك ( كلكم راع وكلكم مسؤول عن رعيته) ..

بالنسبة لتوزيع الاسهم هذه بدي اوضحها للجميع او شيء الشركة نجحت مع انه اغلب اهل البلد كانوا يراهنو عليها انها تنجح او لا .انا الحمد لله فش مشروع مسكته الا نجح لانه هجرتي لله .وبحب اقول لاخونا ابو خليل انه اهل البلد ما دفعوش حق باص وانا بشكرهم انهم ساعدوني في بناء هذه الشركة لكن رغم كل هذا لو اجينا للاسهم كلهن الموجودات في الشركة لا يساوين حق باص .احنا ان شاء الله حاليا في 30/1/2007 جاينا باص حقه مليون ومئة الف شيكل .واحنا اذا ما وزعناش ارباح على اهل البلد فاحنا قاعدين بنكبر في اسهم المساهمين يعني اللي كان اله 60 سهم اليوم صار في اله 100 سهم لانه كان اول ما دخلنا راس مال الشركة مليون شيكل اما اليوم فراس مالها 4.5 مليون شيكل هذول طبعا مربح للمساهمين . انا لما يكون عندي باصين جداد حقهم 2 مليون ومئتين الف باص فولفو 2006 واخر 2007 وفي عنا ارع باصات افيكو صغار وعنا باصين مرسيدس وباص كبير حقه نص مليون شيكل بكو اهل البلد مش دافعين حقه معاي . فانا بستغرب كيف بيجي كثير ناس بحكوا ليش ما وزعت الاسهم ؟؟ طيب انا كيف بدي اوزع الاسهم وانا ببني وبطور في الشركة ؟؟ يعني انا قاعد بكبر باسهمهم .. ويتفضل أي واحد على المكتب ويتفرج ويشوف الوضع وانا بعرف انه في كثير ناس بيحكو وخاصة الجهال اما في الواعيين بقدروا الظروف وبقولوا انها هذه الشركة بلشت في باصين حقهن 190 الف شيكل اليوم عندكم 12 باص منهن باصين حقهم 2 مليون ومئتين الف شيكل .. شوف الفرق .. في تقدم الحمد لله ... اصلا حرام اجي اوزع راس مال الشركة في هذا الوقت , فانا بعدد ما ابني الشركة مزبوط واظور الخط 100% اصلا انا مع اني اوزع الارباح لانه دعم الي ,لكن هما حاليا مش شاعرين انه في تطوير للاسهم تبعاتهم . وانا انشاء الله في اخر الشهر او الشهر الجاي بجوز اعمل اجتماع لاهل البلد واحكيلهم شوفو تفضلوا شو في عنا ارباح ...

اقتباس :

الحقيقة انا بشكر كل انسان بهتم في اوضاع البلد وبقول للاخ عزف الرصاص في اجتماعكم قوة لكم وفي تفرقكم فلا قوة لكم,فيا ريت من الاخ عزف الرصاص انه يجي يعمل معنا اجتماع ونفعد ونبحث عن خطة وعن ارض عشان اقام حديقة لاهل البلد . مع العلم انا عند الخروبة طورتها وسويتها زي منتزه بسيط فهذا عملي انا وفكرتي انا . اول اشي احنا فش عنا اراضي الناس تتبرع فيها عشان نعمل منتزه , الحديقة الصغيرة اللي جنب التلة الفرنسية انا طالبت بها لاقامتها وعملتها البلدية النا غاد ,فبدنا ناس يساعدونا من اجل اقامة حديقة للبلد وان شاء الله في الخارطة الجديدة راح يكون فيه اشي زي هذا .
يا ريت يكون عنا اراضي اضافية للبلد من اجل نعمل حديقة يعني على ارض مين بدنا نسوي ,جيبولي اراضي بنسوي البلدية نفسها بتقلك يا عمي جيبلنا اراضي بنسوي,هل اخونا عزف الرصاص في عندة ارض 2دونوم يتبرع فيها للبلد اسوي فيها منتزة , اذا اهل البلد مساعدونيش عتطوير البلد منين بقدر اسوي , يعني اخونا قاعد بسأل عن توسيع الشوارع اذا انا امرات بروح للي ببنو على جنب الشوراع وبترجاهم رجا بقلهم يا اولاد الحلال انت بكرة بدك تسوي مصلحة ابعد عن الشارع مترين بتصف سيارة قاعدين ببنو وباجرو الدور وبصفو السيارات في الشوارع وبدون بعد اذن اللجنة , اقسم بالله مرة واحد في طريق الطور بقلة يا زلمة حرام عليك ابعد عن الشارع مترين بكرة ابنك تبع مصلحة قال تيفتح مصلحة بصير خير بعد ما بنى وخلص ابنه فتح كراج صار يصف السيارة في الشارع شو رأيك
انا مش فاهم كيف لما الواحد بيقبل المسبة عأبو يعني مرة شفت سيارة صافة في نص الشارع سبيت ابوه وبسبة هو حرام هذا الاشي والله يا جماعة عيب انا بطلب من اهالي البلد بمساعدة من اجل تطوير البلد .شوف انا بقلهم كتير الي بحافظ على نظافة بيتة بحافظ على نظافة بلدة والي بوسخ دارة بوسخ بلدة انا هدا المبدأ الي ميخذة بطلب من جميع اهالي البلد انهم يحافظو عالنظافة بدل ما الأم تودي ابنها يكب الزبالة عالارض اه طيب هي تروح او ابوه يكب الزبالة


اقتباس :

وانا بشكر وبرحب فيه للبرنس مان وبطلب منة يشارك معنا فعلي من اجل تطوير البلد انا بحب الانتقاد البناء وانا مستعد اواجه اي سؤال شخصي من اي واحد من هالبلد من اجل تطوير البلد


اقتباس : مرحبا حبيت احكي للي عمل هدا اللقاء الله يعطيك الفافيه بس عندي سؤال ازا السيد درويش بحكي انو في بالبلد 13 باص طيب ليش كل يوم بنعاني من انو ما في باصات وكل يوم بتاخر على الشغل وبوقف على الموقف نص ساعه واحيانا ساعه وفجاه كل الباصات بتطلع مره وحده ليش ما يعملو انو كل 10 دقائق يطلع باص مش يكونو الشوفريه بديونو او بوكلو عند المدرسه واحنا نتاخر على اشغالنا ومصالحنا وبتمنى انو تحل هاي المشكله لانو زي ما بحكي التطوير واحنامع التطوير وشكرا الكم
بقول للاخت مجدولين الحقيقة انا حريص على توفير السفر لاولاد البلد وانا شخصيا والاعضاء في الشركة اللى معي اول كلمة بنقولها للسواقين انها الشركة مش ربحية هاي شركة خدماتية من اجل خدمة ولاد بلدي مش عشان الارباح رغم انه في مساهمين متاملين انهم يربحو بس انا عندي خدمة اهل بلدي اهم من المصاري
ساعة ونص ساعة مأظنيش لأنة كتير الصبحيات بس البعض مرات خاصة الجمعة والسبت والاحد بجوز يحصلن فيهن شوية تأخير بعدين نص ساعة هاي طبيعي على اساس انو احنا كتير نستنا بصات ايجد تقريبا نص واحنا في المواقف بنفس الوقت الغريب انة ركاب واهل البلد فش عندهم اشي اسمه نظام سفر احنا صدقني في بعض الاحيا كل 5 دقايق عنا باص وللامانة عنا خط قوي وبنفس الوقت عنا المسافة بعيدة في ناس بدهم ينزلو عالقاعة نازل طيب مهو لما انتا تنزل عند المدرسة او عند القاعة بتوخد وقت كأنك بتروح عالقدس فبطلب من اهل البلد انهم برضه يراعو ظروفنا ويسوو عندهم نظام سفر ويعرفو انة كل 5 دقايق لعشر دقايق في باص مرات يعني بتأخرو مزبوط في بعد مرات بتأخر للساعة 10 راح يبكا في شارع فاظي ففي عنا مراقب المراقب هاظ دايما ببكا يجول جوا البلد ويشوف شو الخط بطلب. انا اليوم الي هو 11/1/2007 الصبحيات طلعت انا بنفسي فريت في البلد وشفت وين في ركاب طيب خلال 5 دقايق لعشر دقايق بكا في 3 باصات جايات , مرات في ظروف بكون الباص خربان في باصين مرات خربانات مرات في نقص في الباصات والبني ادم بمرض فما بالك في باص عجل على الخط فبطلب برضه من اهل البلد انهم يراعو الظروف هذه.


اقتباس :

او اشي شكرا للاخت عروس فلسطين اللي متابعة هذا المنتدى
وبطلب منها تقلي في اني حارة عشان اقلها شو السبب بالنسبة للشوارع بطلب منها تقول لابوها ولعمامها واهلها انهم يساعدونا انهم يعطونا الطريق عشان نقدر نفتح شوارع , الشارع الي عند المدارسة انا فتحتة اجيت مرقت مع البلدية وزبطط الي عند دار ابو مجدي وشكة دار ناصر محمد ناصر مرقت من غاد واتفقت مع البلدية انهم يوخذوا من كل المنطقة 4 متر نص وفتحنا الشارع الشارع, لحد الان اهل البلد في المنطقة غاد مش مساعديني ,اجا المتعهد يزفت في شهر 7 اجو منعوا يزفت وسكرو الطرق غاد –ايد وحدة ما بتصفقش- فبقول للاخت عروس فلسطين في اني حارة هي ساكنة عشان اعطيها الجواب الصحيح انة اهل البلد مش متعاونين معاي على فتح الشوارع الكل بدة يمرق على حساب الثاني عنا مشكلة احنا في البلد انة انت معلش تمرق من ارضي بس انا ممنوع امرق من ارضك هاي مشكلة عنا فبطلب منها تسأل ابوها للاخت عروس فلسطين وتقلي في اني حارة بنزل فيها مجاري عشان انزل اصلحلها اياهن واودي البلدية عشان تصلحلها اياهن


اقتباس :

بقول للاخ عيساوي وجبهاوي انا بستغريب منة في تفائلة المشؤوم هذا يعد تفائل مش طبيعي وانا سبق اني لميت مصاري من اهل البد وعملت عدة مشاريع والحمد لله نجحت فاذا هو متفائل بالفشل لأ بطمنة يجيبلي مصاري ويكون هو امين الصندوق تبع اللجنة ويتفضل يشتغل عشان ينجح هذا المشروع, مع العلم انه عدة مشاريع مسكتها ونجحت وبسميله اياهن المشاريع انهن نجحن كاملة مشروع مجاري عنا في اللجنة نجح و مشروع عدة شوارع فتحنا في البلد ونجحن والشركة اخر مشروع قمت فيها والحمد لله نجحت والديوان اللي بنيتة عند الجامع ولميتلة تبرعات نجح, فدايما الانسان لازم انة يتفائل في الخير يا اخ عيساوي وجيهاوي ما يتفائل في التشاؤوم وانا مستغرب منة شب صغير وكيف متفائل في الشؤم في هالمشروع
يا عمي جيب مصاري ومستعد افتحلك شارع وانجحه للمشروع جيب مصاري.
وبحب اسالك انت على أي اساس بتحكي هالحكي ؟؟ كيف استنتجت هالاشي ؟؟ شو اللي خلاك تحكي هالحكي هذا ؟؟

****************************

انتهت الاجوبة
وقد حب ضيفنا الكريم ان يضيف ..

انا بضيف اني بناشد الشباب والصبايا من اجل تطوير البلد وبتمنالهم التوفيق وبشكر كل انسان يتابع البرنامج وهذا المنتدى من اجل تطوير البلد وبشكر كل واحد منهم اعطى سؤال وان شاء لله راح يستفيد في المتسقبل من الاسئلة تيعاتة والاجابة عليهن وبتمنى منهم شخصيا ييجو يشاركو معي انهم يطورو البلد


***************************

في الختام نحب ان نوجه شكر وتقدير لاخونا وابن قريتنا رجل البناء فيها
الشيخ درويش درويش
ونقول له اطال الله عمرك وزاد من امثالك في قريتنا الغالية ....

وكذلك نحب ان اوجه شكر خاص لاخونا ابو عطا لانه ساعدنا في الطباعة

وكذلك نحب ان نوجه شكر لكل الاعضاء الكرام اللذين شاركونا في هذه المقابلة

ونلقاكم ان شاء الله في المقابلة القادمة

تحياتنا الحارة
اخوكما المحبين لكم جميعا

adm و خيّال البلد

والله الف الف الف شكر على على الموضوع الاكثر من حلو
والمقابله الاكثر من رائعه


والف شكر لابن بلدنا واخونا درويش درويش وعلى صبره واجوبته الكامله وصراحته معانا

وبتمنا ان احلامه ومشاريعه المستقبليه تتحق بالواقع اللهم امين


اشكر اخوتي برضو الي تعبوا كثير علشان يطلعولنا الموضوع الرائع


خيال البلد

adm

واخونا ابوعطا الي ساعد في الطباعه

الكم كلكم اكبر سلام
والله يوفقكم ويخليكم لبلدكم واهلكم

شكرا كمان مره

العيساوي

انشالله تكونو استفدتو من الاسئلة الي سئلتوها لدرويش

ابو عطا

وهكذا اخواني الكرام .. نكون قد وصلنا الى نهاية المشاركات جميعها التي كانت ضمن الموضوع


وفي الختام تقبلوا تحياتنا

وعلى امل ان لا تحدث مشاكل مستقبلية تضطرنا لفقد بعض مواضيعنا الاصلية



والسلام عليكم ورحمة الله وبركاته