السلام عليكم ورحمة الله
موضوع مهم للنقاش وابداء الاراء به مطلوب علشان نعرف وين الصح ووين الخطأ
الموضوع هو شئ لفت انتباهي والصحيح حبيت اشارككم فيه لاعرف هل ما شعرت به خطأ ام صحيح
موضوعنا :الطواقم الطبيه (سيارات الاسعافة)نجمة داوود الحمراء الي في بعض الاحيان بتدخل على البلد وللاسف بتلاقي جهنم فتحت عليهم وكأن الوطنيه دبت فينا مرة وحده على هالناس هذول !!!
كثير حالات بتصير في البلاد وبيحتاج فيها شخص معين ان يعالج بطريقة فورية والناس وقتها بتتصل بالاسعاف
الاسعاف الوحيد المتواجد في منطقة القدس بما نها مناطق تحت سلطة اسرائيل هو اسعاف تابع للدوائر المعرفة لوزارة الصحة الاسرائيلية.
طبعا هون في حالتين:
الاولى وبكل بساطه وبسبب الوضع الامني كثير من طواقم نجمة داوود الحمراء يرفضوا يدخلوا المناطق العربية ومن بينها لعيسوية (بصراحة لا الومهم مع ان القرار هذا فيه يقرر حياة انسان).
الثانية: ان يوافق الطاقم ان يدخل الى البلد وهون السؤال الي فتحنا الموضوع علشانه ...
لما واحد يخاطر بنفسه من اجل انسان اخر وبيدخل وبيلاقي (حجار وتصفير ومن الاشياء بتستنى فيه)
يعني هل من الوطنية انك تضرب سيارة اسعاف؟ هل من الوطنية انك تخوفهم ؟ هل من الوطنية انك تعيق عملهم علشان ينقذوا واحد بيقربلك او بيقربلي بحاجة ماسة للمساعده ؟
حتى في حالات الحروب بين الدول الكل بيعرف ان سيارات الاسعاف دايما خارج اللعبة كلها وممنوع استهدافها.
وبرضوا عندنا في بلادنا وقعت اتفاقيه بين نجمة داوود الحمراء وبين الهلال الاحمر الفلسطيني للتعاون وعدم استهداف واخراج طواقم وسيارات الاسعاف من اللعبة السياسية...
اما ان ما يحدث هو نتيجة جهل البعض للاسف؟؟؟ او انهم لسه مقتنعين ان لازم استهداف الاسعاف ...
حياة اي شخص ممكن تتغير بلحظة وثواني ممكن تقرر مستقبل ولما انت او انا نعيق عمل انسان مستعجل لاسعاف وانقاذ حياة انسان اخر تذكر بانك قاتل نعم قاتل ....انت وكأنك شفت واحد بيموت وبيطلب علشان يعيش كاسة ماء وشايف واحد جاي بسرعه بده يعطية جرعه الماء وتقوم توقف بطريقة وانسان سيموت بسببك تذكر هذا دائما ...
واخيرا تذكروا ان يوجد اناس يتصرفون بطريقة نعتبرها همجية مثلا في لحظات الي اسرائيل شفناها بتهاجم سيارات اسعاف وطواقم اسعاف فلسطينيه ...كنا ننضر اليهم بهمجية واستهجان ..لذلك دعونا لا نكون مثلهم ...
|