منتديات العيساوية - كنيسة المهد تحت أضواء سياحة وسفر من تصويري

صبآح/مسآء معطر بأجمل باقات الورود

بما اني دايما في بيت لحم عشان جامعتي هناك قررت اروح انا وصحباتي نزور كنيسة المهد وحبيت اشاركم بالصور والمعلومات الي عنجد فاجئتني لما عرفت عنها خلينا نبدا

اول اشي بدي احط صورة حبيتها لبيت لحم لما كانت الدنيا تشتي صار قوس قزح وانا سرحت فيه هههههههه وصورته طبعا

http://www.esawiah.com/hosting/files...gxhhdo4udg.jpg
قبل منبدا رحلتنا على الكنيسة حابة احكيلكم اكم من معلومة انا استفدت منها لما رحنا طلبنا مرشد وشرحلنا كلشي

اول اشي كنيسة المهد موجودة في بيت لحم في البدة القديمة لبيت لحم وبتضم ساحة بسموها ساحة المهم على اسم هالكنيسة الرائعة برأيي والمسيحية بيجو على هاي الكنيسة لأداء الحج فيها طبعا بيجو من مختلف انحاء العالم من اوروبا واكيركا وحتى من الدول العربية وتعتبر من الكنائس الررائعة والقديمة جدا بفلسطين بنتها الملكة زنوبيا زمااان وكان بنائها رائع جدا لانه انبنت على شكل صليب يعني لما بتفوتو جوا الكنيسة بتلاحظو انها مجسم للصليب وجاي شكلها على شكل الصليب والكنيسة جوا مقسمة لعدة اديرة لعدة طوائف فمثلا الروم الهم جزء منها والارذوكس الهم قسم و الكاثوليك الهم قسم ومن المعلومات الي فعلا ادهشتني انه هاي الكنيسة بكشوها مرة وحدة بالسنة وهالمرة بشهر 12 يعني بعيدهم وكل طائفة بتنضف جهتها او القسم المخصص الها بالكنيسة ومن زمان كانووو كتير يتقاتلو ازا حدا اتعدى على حدود التاني بالكنيسة

بلا طول سيرة خلينا نبدا

هادي الصورة اول مدخلنا على الكنيسة ومتل ما بتلاحظو كل الكنيسة فوانيس بالسقف وضواو قديمة وفي تقريبا 15 عمود جواها

http://www.esawiah.com/hosting/files...zd8umfkk1j.jpg

طبعا هادي الكنيسة مش الكنيسة الاصلية زمان كانت في كنيسة بس انبنى فوقها وانضافلها شغلات كتيرة والدليل انه هادي الارضية للكنيسة القديمة كانت الارضية القديمة كلها من الفسيفساء الغالي والملون والرائع بنفس الوقت

http://www.esawiah.com/hosting/files...1djiv6jq9q.jpg

وطبعا زي محيت قبل في تقريبا 15 عمود داخل الكنيسة اول منفوت وفي على عمود من هالعمدان الموجودات رسمة صليب بالخمس اصابع محفور وطبعا هادا الصليب اله خرفيتين عند المسيحية اول خرافية انه بالزمنات صار زلزال وستنا مريم حطت اصابعها على العمود على شكل صليب متل ما انتو شايفين بالصورة الي تحت والزلال وقف وانحفر محل اصابعها هادا الاشي والخرافية التانية بصراحة انسيتها :o_o: متأسفة كتير .... بس رح احكيلكم شغلة اعجبتني او بالاحرى عادة بسووها المسيحية بحطو على العمود هادا حولين الصليب شيكل ازا الشيكل لزق يعني انت انسان محظوظ اما ازا ما لزق فأنت انسان منحوووس وطبعا رح تتسالو كيف بده يلزق الشيكل على العمود وانا اتسألت زيكم فالجواب كان انه من كتر الوسخ الي على العمود والخمة اكيد الشيكل بلزق ههههههههه يعني انت وحظك واضغط على الشيكل منيح عشان تكون انسان محظوظ قدام الناس الي معك .... وانا جربتها وحاولت قد مأقدر اضغط على الشيكل بس لزق ههههههه

http://www.esawiah.com/hosting/files...nh7i7fyi70.jpg

زي محكيت قبل انه الكنيسة هادي مش الاصلية وحابة افرجيكم السقف القديم والرسومات الي كانت عليه طبعا الرسمة هادي فيها دهب

http://www.esawiah.com/hosting/files...sj39285ewz.jpg

وهادي الصورة للكنيسة وزي محيت انها كتير ملانة فوانيس قديمة بالسقف معلقة وضواو تقريبا اثرية

http://www.esawiah.com/hosting/files...ee9n1tmgcy.jpg
وطبعا مستحيل الواحد يروح على الكنيسة بدون ميشوف السرير تبع سيدنا عيسى او زي مبحكو عنه يسوع ومكان ولادته وحابه اضيف انه حولييين مكان ولادته 14 فنوس وهدول الفوانيس بدلو على 14 ألم الي صابو ستنا مريم اثناء المخاض الي صابها والولادة

هادي صورة للسرير ... "بس انا شاكة بالموضوع ههههههه "

http://www.esawiah.com/hosting/files...xe263brenx.jpg

وهادي الصورة لمكان ولادة سيدنا عيسى وهادا المحل يعتبر مقدس كتير عند المسيحية ولازم بتملسو من هادا المحل ويبوسو وممكن يركعوله واذا بتلاحظو في 14 فانوس حوليين هادا المكان

http://www.esawiah.com/hosting/files...3ckbop3xii.jpg

وهون في مسيحيين بتملسو او بباركو لسيدنا عيسى وبدعووو عند مكان ولادته سيدنا عيسى

http://www.esawiah.com/hosting/files...0vlyywvb0p.jpg

هادا المجسم الي انتو شايفينه هوون ممنووووووووووووووووووع ولا اي انثى تفوت عليه هادا المجسم بس للرجال ورجال الدين وممنوع اي انثى مين ما كانت انها تفوووت طبعا فضولي قتلني اني افوووت وفتت بس انصدمت انه المكان بس في كتب انجيل وكلوو صلبان وكلهم بصلو وبدعو جوا وكمان جوا في خوري وبيجو الزلام بعترفو بذنوبهم اله .... طبعا فتت بالسرقة ههههههه

http://www.esawiah.com/hosting/files...b78gzaxn3v.jpg

وبيني وبينكم بالكنيسة حبيت هاي الثريا وكنت بدي اروحها معي للجامع عنا ومن كتر ما حبيتها صورتها هههههههههه

http://www.esawiah.com/hosting/files...o1xfuq796d.jpg

بحب اضيف انه الكنيسة مقسمة لقسمين القسم الاول الي هو هادا والقسم التاني الي هو مبني جديد يعني تقريبا من 50 سنة او اقل شوي وهو زي الكنايس العادية الي فيها كراسي والي بصير فيها مراسم الزواج عند المسيحية وبتم الخطبه عندهم انه يروحو على الكنيسة والخوري بقرأ اشياء على الدبل والعرسان بلبسو بعض الدبل والعرس بصير زي مبنشوف على التلفزيون انه بعلنهم زوج وزوجة وبحب اضيف شغلة انه بكووون في غرفة صغيرة بفوت فيها العريس مع الخوري وبعدين العروس مع الخوري وبعترفو بالذنوب الي سووها بحياتهم وبهيك بعتبرو حالهم بدوو حياة جديدة بدوون ذنوب مع شريك حياتهم " بس براهنكم ازا حدا بعترف هههههههه"

ولسوء حظي انه التصوير بالقسم التاني ممنوع بس قدرت اصورلكم المجسم تبع ستنا مريم وسيدنا عيسى الي حطينه بنص الكنيسة وجمبه طبعا بتضوي شمعه وبتتمنى امنية

المجسم اعجبني كتييييير

http://www.esawiah.com/hosting/files...nfvq9nu3z8.jpg

وهادا المجسم لسيدنا عيسى وهو صغير ومن الشغلات الي أدهشتني ايضا انهم بحممو المجسم تبع سيدنا عيسى وبغسلو بالعيد

وما في زجاج من برا يعني بتقدر تلمس المجسم تبع سيدنا عيسى بس طبعا ممنوع اللمس

http://www.esawiah.com/hosting/files...yl1kpetr07.jpg

وبهيك بنكووون اوصلنا لاخر الرحلة بس بحب اضيف كمان صورة مجسم للخضر ازا بتعرفو وهو الانسان العالم الي راحله سيدنا موسى لحتى يتعلم منه لما الله سبحانه وتعالى حكى لسيدنا موسى انه في انسان اعلم منه فراح سيدنا موسى لحتى يتعلم منه بس طبعا كلنا بنعرف القصة انه سيدنا موسى ما صبر على الخضر لما كان يغلط .. وهي الصورة

http://www.esawiah.com/hosting/files...e9wmyj8glm.jpg

وبهيك بنكووون خلصنا رحلتنا وان شاء الله بحاول ارجعلكم بصوور لجامعتنا عشان اعرفكم عليها اكتر بأقرب فرصة بتسمحلي وما تأخدوني الصور مش واضحة كل هالكد لانها من بلفوني وما كنت حاسبة حساب اني اصور عشان هيك ما اخدت الكاميرا معي :o_o:

وياريت تردوو لاني تعبت وانا بحط الصور وعنيي راحووو :donwan:

مع خالص ودي