SoFt G!rL تــحــت الاضــواء يا عـــاالم.. [الأرشيف]

SoFt G!rL

29-07-2009, 08:24 PM

اهلا وسهلا سوفت جيريل
مبروك نجاحك بالثانويه العامه
وبتوفيق بالمراحل الجاي

اهلا فيكي كارين

والله يبارك فيكي حبيبتي وعقبال عند تخرجك من الكلية :D

1- كيف تعرفتي على منتديات العيساوية؟؟

من ابن عمي

2-ما هو رأيك بالمنتدى وماذا ينقصه؟؟

منتدى رائع ومميز وبيجمع ابناء القرية في محل واحد وبعرفهم على اخبار بلدهم وبتواصلو مع بعض من خلاله

بالوقت الحالي بشوف انه ما بنقصه اشي

3-افضل قسم عندك بالمنتدى؟؟

اكيد قسم السياحة والسفر :p

4-هل يوجد فرق بالمنتدى قبل ثلاث سنوات والان؟؟

اكييييد وفرق كبير

5-أجمل لحظات حياتك ما هي؟؟

بصراحة ايام التوجيهي كانت احلى لحظات حياتي :D

6-اصعب موقف مرّ بحياتك؟؟

لما ابوي سوا حادث الله لا يعيدها

7-ما الشيء الذي يميزك عن الاخرين؟؟

مممم يمكن اني مش حشورة زي الناس وما بحب اتدخل باشي ما الي فيه .... وذكية :p

8-حكمه ترددينها دائماً؟؟

لقد خلقت اصليا فلا تكن نسخة

مشكورة حبيبتي كارين على اسئلتك الحلوة متلك

دمتي بكل خير

//

SoFt G!rL

29-07-2009, 08:28 PM

اهلا فيك معاذ :D

http://up.arab-x.com/July09/vuP87501.gif

بصراحة هلأ عندي امتحان قبول بجامعة بيت لحم وان شاء الله اتوفق فيه يا رب

وسجلت ادرس اختيارين

الاختيار الاول تعليم تاريخ وجغرافيا

والاختيار التاني علم اجتماع

بالاول سجلت بكلية بس كل اهلي عارضو لانه جبت معدل عالي بأهلني ادخل جامعة عشان هيك رديت عليهم :huh:

كلمة للطالبين الناجحين

لقد وصلتم الى نصف بر الامان وللوصول الى نهايته باشرو بنفس الجهود والمثابرة ولسه هادا اول الطريق ما مشينا اشي وبالتوفيق بالمراحل الجاية

ولكل الي ما حالفهم الحظ بهالمرحلة هادي مش اخر الدنيا الفشل بداية النجاح وبالتوفيق

ومشكور اخوي العزيز معاذ على اسئلتك الرائعة

والمقابلة الاكتر من رائعة

دمت متميزا

//

روز

29-07-2009, 10:28 PM

يا اهلين فيكي سفوته تحت الاضواء تريحي خدي راحتك
بدي اسئلك سؤال فضولي شوي
دخلك شو اجتك احلى هديه بمناسبه نجاحك بالتوجيهي
هاد سؤال تسليكة يعني بلة ريك راجعتلك في كوميات اسئله
\/

just fofo

30-07-2009, 01:27 PM

اهلا وسهلا بضيفتنا العزيزه (SoFt G!rL)

(منوره):36_3_11:

وتفضلي الاسئله

وقت فراغك بشو بتقضيه ..؟

شو طموحاتك بالحياه ...؟

ماهو الشيء الذي تحبيه في شخصيتك؟

متى تلجئين الى الصمت؟؟

أين تأخذك ذروة الغضب ؟

ماهي نقطة ضعف SoFt G!rL

الوداع .. ماذا يمثل لكِ ؟

اي الدول تتمني ان تزوريها ..؟؟

بكفي لليوم

ئلي رجعه

وبتشكر المدمر وكارين ع اختيارهم الرائع وابداعهم المتواصل

YâŖâ

30-07-2009, 02:17 PM

اهلاً بالاخت سوفت تحت الاضواء ^_^
اولاً بحب اباركلك كمان مرة بمناسبة نجاحك
ورح اسالك كمان كم سؤال مش رح اطول : )
\\
_ شو اكترر شخصية اثرت فيكي ؟؟
_مم من خلال اجوبتك فهمت انك حابة تدرسي جغرافيا او تاريخ بفهم انك مفكرة تصيري معلمه ولا شغلة تانية ؟ *!*

وبس *!*

موفقة
\\

أمجد محمود

30-07-2009, 03:39 PM

اول شي الف الف الف مبروك على نجاحك يا اخت سوفت جيرل

كيف شفتي التوجيهي شو راييك فيه

براييك انو اسهل التوجيهي الفلسطيني ولا الاسرائيلي ( البجروت)

شو حابه يكون تخصصك بالجامعه ؟؟
كنتي تطمحي انك تجيبي معدل عالي هيك ولا كان عندك شويت خوف ؟

ومبروك على المعدل العالي 86 وعقبال عند الششهده الجامعيه انشالله

تحياتي الك

صمت الناي

30-07-2009, 07:08 PM

اهلا اهلا
بسوسو والله
ازيك يا بطة اكيد تمام بشوفتي
والله زمان عن قعداتنا وعن وكفاتنا واكلاتنا وكلشي كويس
تخلناش نبرم كثير وخليا بجد اسا
اول شي يعني كان لزام اجي عحفلتك بس انو كان عندي حفلة بس اكيد جاي كبسة عندك
تاني شي انا مبسوطة انك رح تتدخلي جامعة مش كلية زي ما بكيتي كايلة
تالتا يا الله شو بتحبي البرم خلينا نسأل
1_ كيف اكتشفتي فيك موهبة الشعر؟؟
2_ انت من الناس الي بتركو اثر بنفسيت الشخص الي بتتعاملي معو لمازا يا هازا؟؟
3_ انت قدمتي ل امتحانين في ايش حابة تنجحي يعني الاشي الي ميالة الو اكثر؟
4_ احكيلي الخلطة السحرية الي جبتي فيها هيك معدل عقبالي كولي امين؟؟
5_ سؤال صريح ومن غير احراج عمرك شوفتي حد ببرم اكتر مني ؟؟
6_ ليش بطلنا نشوفك بالحارة ؟؟

لي العودة تتمنيش اني اعمل حادث وانا طالعة من الصفحة اوك بدي ارجع يعني بدي ارجع

سلامات يا سديكتي

صمت الناي
انسيت سؤال بتحملش اخلي لنكلة الجاي
بتفكري بالارتباط

SoFt G!rL

30-07-2009, 09:49 PM

يا اهلين فيكي سفوته تحت الاضواء تريحي خدي راحتك

اهلين فيكي وانا بقول ليش منورة الصفحة :D

بدي اسئلك سؤال فضولي شوي
دخلك شو اجتك احلى هديه بمناسبه نجاحك بالتوجيهي

هههههه انتي فضولية شو بدي اسوي !!

احلى هدية هي سنسال دهب من ستي
وسنسال فضة من اخوي

هاد سؤال تسليكة يعني بلة ريك راجعتلك في كوميات اسئله
\/

بليت ريكي وهيني بستنى في الوجبة الدسمة هههه :p

وشكرا حبيبتي على مرورك الحلو وعلى سؤالك الحشري

:D

وعقبال عند تخرجك من الجامعة يا رب

//

SoFt G!rL

30-07-2009, 09:56 PM

اهلا وسهلا بضيفتنا العزيزه (SoFt G!rL)

(منوره)

منورة بوجود حبيبتي فوفو

وتفضلي الاسئله

وقت فراغك بشو بتقضيه ..؟

بقضيه على النت واحيانا بكتابه مذكراتي او بلعب مع اختي الصغيرة استعيد ايام طفولتي :P

شو طموحاتك بالحياه ...؟

اخلص دراساتي العليا وأكون اسرة حلوة :D

ماهو الشيء الذي تحبيه في شخصيتك؟

التعاطف مع الآخرين والاحساس بمعاناتهم

متى تلجئين الى الصمت؟؟

حين يسلتزم مني الأمر ولا تسعفني الكلمات فأجد الصمت أبلغ من الكلام فعندها التزم الصمت

أين تأخذك ذروة الغضب ؟

الى حد الجنون :p واحيانا الندم

ماهي نقطة ضعف SoFt G!rL

دمعتي

الوداع .. ماذا يمثل لكِ ؟

بداية معاناة بعد لقاء ونهاية طريق دون عودة

اي الدول تتمني ان تزوريها ..؟؟

ألمــــانيا

بكفي لليوم

ئلي رجعه

اهلا وسهلا بأي وقت

وسررت بوجودك واسئلتك الحلوة

نورتينا

//

SoFt G!rL

30-07-2009, 10:00 PM

اهلاً بالاخت سوفت تحت الاضواء ^_^

اهلا فيكي حبيبتي يارا

وشكرا لتواجدك :d

اولاً بحب اباركلك كمان مرة بمناسبة نجاحك

الله يبارك بعمرك يا رب وعقبال عندك

ورح اسالك كمان كم سؤال مش رح اطول : )
\\
_ شو اكترر شخصية اثرت فيكي ؟؟

مممم يحيى عياش

_مم من خلال اجوبتك فهمت انك حابة تدرسي جغرافيا او تاريخ بفهم انك مفكرة تصيري معلمه ولا شغلة تانية ؟ *!*

هههههه هو بصراحة مش متخيلة حالي اصير معلمة لأني من صغري بكره هاي المهنة بس سجلت جغرافيا وتاريخ لأني بحبهم وانا متأكدة اني رح احول لأني متأكدة اني هادي المهنة مش الي :p

وبس *!*

موفقة

وانتي كماااان يا رب الله يوفقك بحياتك وبدراستك

وشكرا على اسألتك الخفاف

//

SoFt G!rL

30-07-2009, 10:08 PM

اول شي الف الف الف مبروك على نجاحك يا اخت سوفت جيرل

الله يبارك فيك ياااا رب :d

كيف شفتي التوجيهي شو راييك فيه

بصراحة مرحلة التوجيهي غيرت حياااتي كتير وكانت مرحلة حلوة بحياتي يمكن عكس كتير طلاب شفوها اتعس مرحلة بحياتهم بس انا كتير انبسطت لأني تعرفت على كتير صحبات ومعلمات لهلأ بتصل فيهم وبحكي معهم وكتيييير صار معي نهفات وكانت سنة نكشة وحلوة عليي بس المش حلو امتحانات اخر السنة والضغط الي صابني فيه وكتير تعبت باخر مرحلة والواحد بضل على اعصابه وبضل يتفشش بالكل وخصوصا اهلي كتير كنت اعصب عليهم على الفاضي والملان :d

براييك انو اسهل التوجيهي الفلسطيني ولا الاسرائيلي ( البجروت)

بصراحة ما جربت البجروت عشان احكم بس بظن انه التوجيهي الفلسطيني اسهل

شو حابه يكون تخصصك بالجامعه ؟؟

اخترت تعليم جغرافيا وتاريخ والاختيار التاني علم اجتماع

كنتي تطمحي انك تجيبي معدل عالي هيك ولا كان عندك شويت خوف ؟

اكيد كنت اطمح اجيب 90 بس كنت مرتعبةةة خووووف وخصوصا من التكنولوجيا كنت حاسة اني رح اسقط عشان هيك تراجعت معنوياتي بعده بس الحمد الله ... الله وفقني وجبت فالتكنولوجيا 80 :d

ومبروك على المعدل العالي 86 وعقبال عند الششهده الجامعيه انشالله

الله يبارك بعمرك يااا رب وعقبال عندك تنجح بالبجرووت وتجيب معدل عالي :d

وشكرا الك أمجد محمود على اسألتك الحلوة
ونورتنا

//

SoFt G!rL

30-07-2009, 10:19 PM

اهلا اهلا
بسوسو والله
ازيك يا بطة اكيد تمام بشوفتي
والله زمان عن قعداتنا وعن وكفاتنا واكلاتنا وكلشي كويس
تخلناش نبرم كثير وخليا بجد اسا

اهلا حبيبتي صمت االناي وزمان عنك وعن الحارة بس كبرنا وراح زمنها :p

اول شي يعني كان لزام اجي عحفلتك بس انو كان عندي حفلة بس اكيد جاي كبسة عندك

اهلا وسهلا وينتا مأجيتي وانا بستناكي على الباب بس تخلنيش واقفة كتيييييير

تاني شي انا مبسوطة انك رح تتدخلي جامعة مش كلية زي ما بكيتي كايلة

الله يبسطك دايما عقبال كمان متنبسطي الك وننبسطلك

تالتا يا الله شو بتحبي البرم خلينا نسأل

هههههه :p

1_ كيف اكتشفتي فيك موهبة الشعر؟؟

صدفة كنت كتير مضايقة من موقف مسكت ورقة وقلم وخربشت شوي طلع اشي زابط واخدتها عادة وصرت اكتب بس مرات ما بزبط معي بحتفظ فيه لنفسي بس الاشي الي بزبط بنشره

2_ انت من الناس الي بتركو اثر بنفسيت الشخص الي بتتعاملي معو لمازا يا هازا؟؟

بترك اثر بنفس الي بتعامل معه ؟! بعرفش والله هادا السؤال للشخص الي بأثر عليه مش الي ....بس ولا مرة حدا حكالي اني بأثر على الشخص القبالي احكيلي انتي :p

3_ انت قدمتي ل امتحانين في ايش حابة تنجحي يعني الاشي الي ميالة الو اكثر؟

من ناحية ميول للجغرافيا والتاريخ بس من ناحية شغل ومهنة للمستقبل علم اجتماع لاني مستحيل اتخيل حالي معلمة ... لأنها مصيبه :p

4_ احكيلي الخلطة السحرية الي جبتي فيها هيك معدل عقبالي كولي امين؟؟

هههه فش خلطات بس التوجيهي بدو متابعة اول بأول وحشرة بالدار شوووي والواحد يضغط حاله شوي بالامتحانات وبمشي الحال بس يكون كل عقله بالدراسة مش سااااارح وهو يدرس باشي تانية انتي عارفة شووو :d

5_ سؤال صريح ومن غير احراج عمرك شوفتي حد ببرم اكتر مني ؟؟

لا مشفتش :p

6_ ليش بطلنا نشوفك بالحارة ؟؟

حدا بكون عنده توجيهي وبضل بالحواري وبعدين كبرنا على الحارة صرت تقريبا 18 سنة يعني بس لما بدي اطلع مشوار بمرق من الحارة هههههه

لي العودة تتمنيش اني اعمل حادث وانا طالعة من الصفحة اوك بدي ارجع يعني بدي ارجع

لا الله لا يجيب حوادث ترجعي بالسلامة ههه

سلامات يا سديكتي

صمت الناي
انسيت سؤال بتحملش اخلي لنكلة الجاي
بتفكري بالارتباط

ههههههههههه بعرفش ليش مصرة على هالسؤال كل متشوفيني بتسأليني اياه شكلك مستكلعة مني من الحارة خليني اكم سنة

انا تاركة كلشي للنصيب وكل اشي من الله يامحلاه

واهلا وسهلا حبيبتي صمت الناي

بإنتظار النكلة الجاي بس يا ريت تكون اخف :d

نورتينا

//

ई فـُـنـون فَـلسطيـنـيةई

31-07-2009, 01:36 AM

السلام عليكم ورحمة الله وبركاته

بسم الله الرحمن الرحيم

هلا بأختي سوفت جيرل نورتي شو هل الطله الحلووة

الف مبروك اختي وعقبال يارب ما نفرح يوم تخرجك من الجامعه ان شاء الله

خلينا نفوت بالمووضوع p:

1..شو اكتر شي بتتمنيه بحياتك ؟

2.. انـتي فضـوليه ؟ p:

3.. أحساسك بالانسان الغدار ؟

4. شـو بعنيلك الحب والثقه بحياتك

5.. اعضاء المنتدى وحبايبنا بتقدري تعطيني لكل عضو مطلوب كلمه صغيره بستحقها بالحياه

المدمر

نديين

روز

نخال

كارين

خيال البلد

حنظلة

ام زيد

صمت الناي

ريمونا

ضياء المجد

وسلامـتك بكفو اه p:

مع انو الاسئله مش كل هلئد بس برضو راح ارجعلك

موفقه اختي

روز

31-07-2009, 02:04 PM

عدنا اليكم مع المقبلات
كنت راح احطلك 50 سؤال ههه بس قلت حرام عليكي يا بنت
خليها بالتقسيط
السؤال الاول شو رأيك فيا؟
التاني افضل تلات اعضاء بالمنتدى تحكيش كلهم احكي 3 بس
التالت في حدا مدايقك بالمنتدى؟
الرابع مين عضو بتحسي مميز؟
الخامس ايش بدك تسوي بعد ما تتخرجي من الجامعة بإذن الله؟
السؤال الاخير معلش ارجع مع كومة اسئلة مفلسفة؟
بامكانك تستعيني بالجمهور

SoFt G!rL

31-07-2009, 05:16 PM

السلام عليكم ورحمة الله وبركاته
بسم الله الرحمن الرحيم
هلا بأختي سوفت جيرل نورتي شو هل الطله الحلووة
تسلمو اخوي ई فـُـنـون فَـلسطيـنـيةई النور نورك :D
الف مبروك اختي وعقبال يارب ما نفرح يوم تخرجك من الجامعه ان شاء الله
الله يسعدك وعقبال عند تخرجك انت كماااان :woohehe:
خلينا نفوت بالمووضوع p:
1..شو اكتر شي بتتمنيه بحياتك ؟
راااااااااااحة البال
2.. انـتي فضـوليه ؟ p:
اكتر اشي بكرهه واكيد مش فضولية
3.. أحساسك بالانسان الغدار ؟
انسان ميت ما بحس فيه ومستحيل اتعامل معه او اقرب منه وهو انسان غدر حاله قبل ما يغدرني
4. شـو بعنيلك الحب والثقه بحياتك
الحب : طريق نصه تعاسة ونصه سعادة بس حلو بالجهتين وبدوون حب فش حياة وهو احلى اشي بحياتنا ولا بدونه كان صرنا وحووش
الثقة : انك تعطي كلشي عندك من اسرار لشخص ويقدر يحتفظ فيها هاي بسميها ثقة بس بزمنا شبه معدومة :36_11_20:
5.. اعضاء المنتدى وحبايبنا بتقدري تعطيني لكل عضو مطلوب كلمه صغيره بستحقها بالحياه
المدمر اخووووي وانسان رائع ومتفهم وقلبه كبيررر وطيوووب والله يوفقه وينجحه بدراسته وبحب احكيله الف الف الف الف الف مبروك وعقبال عند الشهادة الكبيرة
نديين ......

روز هادي الكلمااااااااات ما بتوصفها بس بإختصار توأم روحي وغطايتي :=D:
نخال انسان محترم ومثقف وبساعد الكل واخ لكل الاعضاء وبحترمه كتييييير والف الف الف مبرووك نجاحك محمد ومنها للأكبر
كارين هادي ازكى بنوووتة بالمنتدى وبحبها متل اختي بالزبط وبتمنالها كل خيرر وطيووووووووووبة لدرجة كبيرة

خيال البلد اخ بالمنتدى مثقف وواعي وعقله اكبر من عمره :D
حنظلة بحس االوطن بهالشخص بعرفش ليش :D وانسان مثقف وفاهم الله وين حاطه
ام زيد ام غالية علينا وبعتبرها متل امي واعز وانسانة اكتر من رائعة
صمت الناي بنت حارتنا :D
ريمونا بنوتة طيوبة ورووووووعة وبمووووت فيها
ضياء المجد ما بعرفه منيح بصراحة بس بحسه انسان محترم كتير وما بختلط بحدا
وسلامـتك بكفو اه p:
بكفوووو
مع انو الاسئله مش كل هلئد بس برضو راح ارجعلك
موفقه اختي
شكرا الك ई فـُـنـون فَـلسطيـنـيةई واهلا زسهلا فيك دايما بتنورنااا
//

SoFt G!rL

31-07-2009, 05:25 PM

عدنا اليكم مع المقبلات

اهلا نورتي من جديددددد

كنت راح احطلك 50 سؤال ههه بس قلت حرام عليكي يا بنت
خليها بالتقسيط

هههه حنونة تقبريني :d

السؤال الاول شو رأيك فيا؟

انتي توأم روحي والانسانة الوحيدة الي ممكن اشكيلها اسراري ولا حد بعرف اخطر اسراري غيرك وانتي صديقتي واختي وكل اشي بحياتي ولما احكيلك الي بقلبي بكون مطمنة زي كأني بحكي مع حالي وانتي بنوتة طيوووبة كتير وحنونة وفش احلى من هيك

التاني افضل تلات اعضاء بالمنتدى تحكيش كلهم احكي 3 بس

مممم بنفع مشرفين؟؟

انا بحس عقاب
كاسيلاس
جست فوفو

التالت في حدا مدايقك بالمنتدى؟

لا محدا بسترجي :p

الرابع مين عضو بتحسي مميز؟

روز

الخامس ايش بدك تسوي بعد ما تتخرجي من الجامعة بإذن الله؟

زي مكل الناس بسوو بدي اشتغل بشهادتي

السؤال الاخير معلش ارجع مع كومة اسئلة مفلسفة؟

اكيد معلش واهلا وسهلا فيكي وضلي نوريني بكل صفحة :d

بامكانك تستعيني بالجمهور

هههههه فش داعي

شكرا الك روزتي على الاسئلة الحلووووة

جد جد جد نورك طفا الكهربا بدارنا

//

Ṁǎĵđ

31-07-2009, 05:49 PM

نتوكل ع الله ونبلش اسأله معك
بسم الله

شو اكتر لون بتحبي ؟

اكتر اسمين بتحبيهم اسم لبنت واسم لشب ؟

امنيتك بالحياه ؟

شو رئيك في انا ؟

كلمة شكر بتهديها لكل شخص وقف معك ؟

لهان وبكفي راجعين تحياتي هبووووووش

حنظله

31-07-2009, 05:52 PM

أهلا ًوسهلاً في الأخت سوفت جيرل تحت الأضوء
وعلى أمل قضاء اجمل الأوقات هنا
ومبارك النجاح والتفوق في الثانويه العامه
وشكر واصل للأخ المدمر على جهده المتميز

ابداء بإسئلتي

\

1* لكل فينا وطن , انتِ ماذا يعني لكِ وطنك ؟؟
2* يقال انَ فلسطين أُحتلت بمؤامره وتوطئ وخذلان عربي , هل انتِ من الذين يؤمنون بهذا التأريخ ولماذا,ام لديك وجهة نظر مخالفه لهذا التعبير؟؟
3* تمر القضيه الفلسطينيه بمرحله عصيبه الى حداً ما , برئيك ما أفضل الحلول للخروج من هذه المرحله ؟؟
4* كلنا نعرف سلبيات بنات اليوم بغض النظر عن الإيجبيات, فما رئيك ببنات اليوم بشكل عاام؟؟
5*هل تؤيدين من اتهم المرأة بالثرثرة في حين أن هناك نساء قليلات الكلام؟؟ غير معمم
6* هل تناقشين للوصول الى الحل وللأستفاده من تجارب الأخرين ام انك تفرضين رأيك؟؟
7* ماذا تعني لك البيئة الاجتماعية ؟؟ وهل انطباعك اجتماعي بين الناس؟؟
8* من هو قدوتك في الحياة وهل تؤمنين بشئ اسمه مثل أعلى؟؟
9*هل ترين ان علاقة الام ببنتها تمثل علاقة صداقة ام لا؟وكذلك الاب بابنه؟؟
10* ما هو الشئ الذي يؤرق مضجعك ؟؟

انتهي هنا

خالص الود والأحترام

كبرياء الحب

01-08-2009, 01:06 PM

انا اجيت في الا وسااااااااااااااااااااااااع ابعدولى انا هووووووووووووووووون

اهلا وسهلا فيكي حبيبتي واختي نوووووورت والله يلا بدي ابليش اسالك اكم من سؤال يعني ما بدي اطول عليكي ولة اقولك بدي اطول عليكي هههههههههههههههههه

1. ايش امنيتك بالحياة ؟
2. مين اكتر انسان ازا جرحك ممكن تسمحي ؟
3.مين الانسان اللى ما بترفضيلو ولة طلب ؟
4. مين هل الايام زعلان منك وحابة ترضي بس ما بدك وانتي الغلطة بحكقة احكي بصرررررررراحة ؟
5. شو رايك فيا بصررررررراحة ؟
6. شو رايك بمنتدي العيسوية .؟

اوكي طولت عليكي اوك راجعتلك ماشي دبري حالك بهدول الاسئلة وراجعة

سلامات

NoOoOoOuR

SoFt G!rL

01-08-2009, 11:58 PM

نتوكل ع الله ونبلش اسأله معك
بسم الله

شو اكتر لون بتحبي ؟

بحب اللون الليلكي يعني البنفسجي

اكتر اسمين بتحبيهم اسم لبنت واسم لشب ؟

اسم شب : وليد
اسم بنت : سارة

امنيتك بالحياه ؟

حكيت قبل ... اخلص دراساتي العليا وأكون اسرة حلووة :d

شو رئيك في انا ؟

انت اخ طيوووب كتير واخوي الصغير وبحب انصحك نصيحة دايما خلي الك هدف بالدنيا وتخليهاش هي الي تمشيك والله يوفقك

كلمة شكر بتهديها لكل شخص وقف معك ؟

بحب اول اشي اهدي شكر خاااص جدا لششخص وقف معي بمرحلة التوجيهي ودعمني معنويا وساندني وبحب اهدي شكر كبيررررررررررررررررررررررررررررررررررررررررررررررر رررررررررررررررررررررررررررررررررررررررررررررررررر رررررررررررررررررررررررررررررررررررررررررررررررررر ررررررررررررررررررررر لأمي وابوي ولأختي حرام عشان كانت متوصية فيا بالشاي والعصير والنسكافية واللذي منه ههههه

لهان وبكفي راجعين تحياتي

اهلا وسهلا فيك بأي وقت

//

SoFt G!rL

02-08-2009, 12:14 PM

أهلا ًوسهلاً في الأخت سوفت جيرل تحت الأضوء
وعلى أمل قضاء اجمل الأوقات هنا
ومبارك النجاح والتفوق في الثانويه العامه
وشكر واصل للأخ المدمر على جهده المتميز
شكرا الك اخوي حنظلة على التهنئة
وانت كمان الف الف الف مبروك نجاحك
ابداء بإسئلتي
\
1* لكل فينا وطن , انتِ ماذا يعني لكِ وطنك ؟؟
الوطن قبل ان يكون قطعة من الارض نسكن عليها هو الضمير الذي يسكن بداخلي
2* يقال انَ فلسطين أُحتلت بمؤامره وتوطئ وخذلان عربي , هل انتِ من الذين يؤمنون بهذا التأريخ ولماذا,ام لديك وجهة نظر مخالفه لهذا التعبير؟؟
طبعا بآمن بهالاشي وهاد الاشي 100% صحيح لأنه عبر التاريخ احتلت فلسطين عدة مرات ومن ضمن هالاحتلال هو البريطاني وخلال الاحتلال البريطاني حدث التواطئ العربي ضد فلسطين وخصوصا من مصر التي تآآمرت وتم دخول اسائيل بعدها مكان فلسطين ووقف الحكام العرب وقفة المتفرج مع انه كان طالع بأيدهم اشي لكن الضمير بهداك الوقت كان ناااايم
3* تمر القضيه الفلسطينيه بمرحله عصيبه الى حداً ما , برئيك ما أفضل الحلول للخروج من هذه المرحله ؟؟
الوفاق بين الجبهات الموجودة في فلسطين (فتح وحماس والجبهة ...الخ ) والتوحد تحت اسم فلسطيني وليس فتحاوي وحماسي وجبهاوي والحروب الاهلية الي بتصير بينهم
4* كلنا نعرف سلبيات بنات اليوم بغض النظر عن الإيجبيات, فما رئيك ببنات اليوم بشكل عاام؟؟
بشكل عااام بشوف البنات منهم المنيحات ومنهم العاطلات حالهم حال الشباب :heeee: بس اعتقد بزمنا اختفى الحياااء عن اغلب البنات
بطلنا نشوف الخجل عندهم ولا الادب طبعا مش الكل ولكن الغالبية العظمى هيييك
انت اطلع بباص البلد وبتشوف بنات اليوم :s

5*هل تؤيدين من اتهم المرأة بالثرثرة في حين أن هناك نساء قليلات الكلام؟؟ غير معمم

نعم بأيده لأنه النساء مش بايدهم لازم يبرموووو الشغلة مش بأيدهم وخصوصا ازا اجتمعو على فنجان قهوة الصبح :p احت البلد بخبر كاااان وقليل متلاقي امرأة قليلة الكلام يوجد بالنساء فطرة الثرثرة :D

6* هل تناقشين للوصول الى الحل وللأستفاده من تجارب الأخرين ام انك تفرضين رأيك؟؟

بناقش لكن عندما اكون مقتنعة بشغلة وانا متأكدة انها صحيحة بحاول تجنب النقاش خصوصا ازا كان النقاش مع ناس ما بعرفو يناقشو وزي مبحكو لا تناقش سفيها حتى لا يعتقد الناس انكما الاثنين سفهاء :D وطبعا الاستفادة من تجارب الاخرين حكمة مش من الضرورة انه نوقع بالخطأ عشان نتعلم فالاستفادة من تجارب الغير افضل

7* ماذا تعني لك البيئة الاجتماعية ؟؟ وهل انطباعك اجتماعي بين الناس؟؟

البيئة الاجتماعية هي البيئة التي تجمع كل فئات الناس الفقيرة والغنية والمثقف والجاهل والشاب والعجووز وهي البيئة التي نترعرع فيها فللبيئة الاجتماعية تأثير بنسبة 80% على صقل شخصية الفرد
انطباعي اني لست اجتماعية بين الناس لأتجنب غدرهم :heeee:
8* من هو قدوتك في الحياة وهل تؤمنين بشئ اسمه مثل أعلى؟؟
قدوتي رسولنا صلى الله عليه وسلم ولا اؤمن بمثل اعلى لي لأني المثل الاعلى لنفسي ولا يوجد لي مثل اعلى غيري
9*هل ترين ان علاقة الام ببنتها تمثل علاقة صداقة ام لا؟وكذلك الاب بابنه؟؟
نعم فعلاقتي بأمي ليست علاقة ام ببنتها انما علاقة اخت لأختها وهادا الاشي بخلي البنت دايما قريبة من امها وما بتخبي عنها اشي ولما توقع بمشاكل تلاقي حدا يساعدها وكمان الوضع بالنسبة للاب وابنه وزي مبحكو "ازا كبر ابنك خاويه"
10* ما هو الشئ الذي يؤرق مضجعك ؟؟
الفشل
انتهي هنا
خالص الود والأحترام
اشكرك اخي حنظلة على اسئلتك المميزة
فسررت بوجودك لطرح اسئلتك التي راقت لي
دمت لمن أحببت

//

SoFt G!rL

02-08-2009, 12:19 PM

انا اجيت في الا وسااااااااااااااااااااااااع ابعدولى انا هووووووووووووووووون

اهلا وسهلا فيكي حبيبتي واختي نوووووورت والله يلا بدي ابليش اسالك اكم من سؤال يعني ما بدي اطول عليكي ولة اقولك بدي اطول عليكي هههههههههههههههههه

اهلا وسهلا بأختي وحبيبتي وطولي قد مبدك خدي راحتك الصفحة صفحتك :D

1. ايش امنيتك بالحياة ؟

ههههه تالت مرة بنسأله وبتمنى تكون الاخيرة

امنيتي اخلص دراساتي العليا وأكون اسرة حلوة :D

2. مين اكتر انسان ازا جرحك ممكن تسمحي ؟

مسسسسسسسسسسسسسسسسسسسسسسسسسحيل اسامح اي انسان جرحني مين ما كان وخصوصا ازا اساء الي كتير يعني بسامحش بسهولة

3.مين الانسان اللى ما بترفضيلو ولة طلب ؟

ابوي وامي وكل انسان غالي على قلبي

4. مين هل الايام زعلان منك وحابة ترضي بس ما بدك وانتي الغلطة بحكقة احكي بصرررررررراحة ؟

هههههههههه ولا حدا

5. شو رايك فيا بصررررررراحة ؟

اختي وحبيبتي وانتي بنوتة كتير طيوووبة وبتمنالك بحياة حلوة بتتمنيها مع كل الناس الي بتحبيهم

6. شو رايك بمنتدي العيسوية .؟

منتدى رائع ومميز

اوكي طولت عليكي اوك راجعتلك ماشي دبري حالك بهدول الاسئلة وراجعة

سلامات

NoOoOoOuR

اهلا وسهلا فيكي وينتا مأجيتي وانا بستناكي
وشكرا على اسئلتك الحلوة

دمتي بخير

//

just fofo

02-08-2009, 03:23 PM

مرحبا

ورجعنالك سوفت جيرل:d

انبلش الاسئله

في أي قرار تتخذيه ..... تحكم عقلك أم قلبك فيه ... ؟؟ ومن الأسبق فالتحكيم ؟؟

أين تجدين راحة البال ... ؟

كلمه لها تأثير في قلبك؟

ذكرى لن تغيب عن بالكِ فما هي .؟؟

عاده تفعليها دائما بتمني ان تتركيها ..؟؟

ماهو رأيك في الحكمة القائلة :

إذا خانك أحدهم مره فالذنب ذنبه وإذا خانك مرة أخرى فالذنب ذنبك

ما هي أجمل الكتب التي قرأتِها في حياتك ؟

ما هي المواضيع التي تحبِ قراءتِها بشكل عام ؟

دمتي بخير وسعاده
وانشالله ماكون تقلت عليكي في الاسئله

:36_3_11:

SoFt G!rL

02-08-2009, 04:17 PM

مرحبا

ورجعنالك سوفت جيرل:d

اهلا وسهلا نورتينااا

انبلش الاسئله

في أي قرار تتخذيه ..... تحكم عقلك أم قلبك فيه ... ؟؟ ومن الأسبق فالتحكيم ؟؟

اغلب الاوقات قلبي يحكم ....وقلبي اسبق في الحكم

أين تجدين راحة البال ... ؟

بقرب من أحب

كلمه لها تأثير في قلبك؟

الله يرضى عليكي

ذكرى لن تغيب عن بالكِ فما هي .؟؟

ذكرى النكبة

عاده تفعليها دائما بتمني ان تتركيها ..؟؟

اصدق الناس بسرعة :p

ماهو رأيك في الحكمة القائلة :

إذا خانك أحدهم مره فالذنب ذنبه وإذا خانك مرة أخرى فالذنب ذنبك

مقولة صحيحة 100% لأن الثقة بإنسان خانك مرة غلطة كبير

ما هي أجمل الكتب التي قرأتِها في حياتك ؟

كتاب عابر سبيل / أحلام مستغانمي

ما هي المواضيع التي تحبِ قراءتِها بشكل عام ؟

مواضيع مرحة ومواضيع عن تجارب حياة وشعر

دمتي بخير وسعاده
وانشالله ماكون تقلت عليكي في الاسئله

لا حبيبتي اهلا وسهلا فيكي دايما
واكيد ما تقلتي عليي

دمتي بكل ود

//

عقاب

02-08-2009, 09:04 PM

السلام عليكم ورحمة الله وبركاته

أهلاً وسهلاً بسوفت جريل ضيفة عزيزة والله ونبارك لك الضيافة

ونبارك لك أيضاً نجاحك وحصولك على معدل جيد جداً وان شاء الله من نجاح الى نجاح أكبر

يا سوفت جريل وفي شتى المجالات وحياك الله

وأسئلتي قليلة ما تخافي ههههههههههههههه

شو رأيك بصراحة بقاعة قضيتنا ؟

وما هو رأيك بالمشرفين القائمين عليها بصراحة ؟

وماذا ينقصها حسب رأيك ؟

لمن تعطي هذه الألقاب والني تليق بهم من وجهة نظرك

مذيع أو مذيعة صحفي أو صحفية طباخ أو طباخة

مدير أو مديرة ممثل أو ممثلة

ورأيك بالعيساوي وأم زيد وليل الهجر ومحمد نخال وخيال البلد

وبكفي وتحيتي لك ودمت بود

وفي النهاية بشكر المدمر جزيل الشكر على تألقه المستمر ويعطيكم العافية

SoFt G!rL

02-08-2009, 10:14 PM

السلام عليكم ورحمة الله وبركاته

وعليكم السلام

أهلاً وسهلاً بسوفت جريل ضيفة عزيزة والله ونبارك لك الضيافة

شكرا الك اخوي الغالي عقاب والله يبارك فيك

ونبارك لك أيضاً نجاحك وحصولك على معدل جيد جداً وان شاء الله من نجاح الى نجاح أكبر

يا سوفت جريل وفي شتى المجالات وحياك الله

الله يسعدك يا رب وان شاء الله تشوووف ولادك ناجحين ومن المتفوقين يا رب ويرفعو راسك :p

وأسئلتي قليلة ما تخافي ههههههههههههههه

ولوو خد راحتك

شو رأيك بصراحة بقاعة قضيتنا ؟

قاعة رائعة وتسمح لنا بمناقشة هالقضية الي محدا سائل فيها فتجد بعض الاعضاء الذين يعبرون احيانا هذه القاعة كعابرين سبيل واحيانا يكون الوضع بالنسبة لي كذلك ولكنها قاعة هادفة واعتقد انها من اهم القاعات الموجودة في المنتدى والتي تنمي روح المشاركة الوطنية حتى ولو بكلمة

وما هو رأيك بالمشرفين القائمين عليها بصراحة ؟

لا ارى تفاعل جميع المشرفين على هذه القاعة وانما ارى تفاعل بعضهم واهتمامهم فيجب على المشرفين على قاعة مهمة كهذه القاعة المزيد من المتابعة والتفاعل والنقاش مع الاعضاء ولكن هذا الشيء مفتقر بهادا القسم

وماذا ينقصها حسب رأيك ؟

ينقصها التفاعل والمناقشة بين الاعضاء وطبعا المناقشة الهادفة بعيدا عن الانحياز والعنصرية لأي حزب او جبهة معينة وانما يكون النقاش باسم فلسطينين

لمن تعطي هذه الألقاب والني تليق بهم من وجهة نظرك

مذيع أو مذيعة يارا *_*

صحفي أو صحفية عقاب

طباخ أو طباخة ام زيد

مدير أو مديرة العيساوي بدون شك

ممثل أو ممثلة همسة الاحساس

ورأيك بالعيساوي

اخونا الكبير ومديرنا واله كل الاحترام على هالمنتدى الرائع وجهوده الجباااااااارة

وأم زيد ام رئعة وخالتنا وطباخة المنتدى

وليل الهجر ما بعرفها منيح !!

ومحمد نخال اخ رائع ومميز وبحب يساعد الكل

وخيال البلد اخونا الكبير وزي محكيت قبل عقله سابق عمره

وبكفي وتحيتي لك ودمت بود

اهلا وسهلا فيك اخوي عقاب
جد سعدت بوجودك واسئلتك الحلووة

دمت لمن احببت

//

هدايه

02-08-2009, 10:29 PM

بسم الله الرحمن الرحيم

السلام عليكم ورحمة الله وبركاته

بعتزر عن قدومي متاخره بس كنت مشغوله شوي

اهلا وسهلا فيكي اختي ومبروك نجاحك بالثانويه العامه

يلا انبلش

من هم الصحاب الصفات الاتية ؟

قلم رائع
قلم جميل
قلم نشيط
قلم ذواق
قلم رهيب

من هو مئلك الاعلى بالحياه

اجمل كلمه قيلت لكي ومتى

اسعد يوم بحياتك

شو بتهدي اعضاء هذا المنتدى الرائع

كما تعودنا ان ناخذ راي الجميع بكرسي الاعتراف فمارايك اختي بكرسي الاعتراف

فأي قرار تتخذه هل ..... تحكم عقلك أم قلبك فيه ... ؟؟ ومن الأسبق فالتحكيم
قلبك أم عقلك ؟؟؟؟؟؟؟؟

شو أصعب المواقف اللي مريتي فيها ؟

هل ندمت فحياتك على شي معيّــن ؟؟؟

مالفـرق بين الحب والصداقة ؟ وهل يمكن ان يسلكا طرق الغيرة 00؟

ما رأيك بهذه الكلمات ..
الخيانة ..
المرأه..
الصداقة ..
النميمة ..
النفاق ..

مارايك بالكلمات التاليه :::::
الحب - الرومانسيه - الجمال - رقة المشاعر - الام - فلسطين

حابه نضيف قسم اخر للمنتدى وان نعم فما هو هذا القسم

ماذا تقولين لاصحاب الموضوع
محمد نخال
العيساوي
فادي
ام زيد
انا هدايه

لي عوده باذن الله

تقبلي مروري

همسة الاحساس

03-08-2009, 05:39 PM

هايزووو
كيفك حبوشتي؟
جلطوكي في الأسئلة صح ؟

طيب الموهمززز
انا بدي أسأل بس سؤالين وما تنسي انك على كرسي الإعتراف
يعني بدي صراااااااحة

السؤال الأول بقووول
مين أكتر انسان كرهتيه بكل حياتك ولو شوفتيه نفسك تقتليه ؟

السؤال الثاني بقول:
أتعس يوم مر بحياتك هو يوم ... ؟ وليش كان تعيس ؟

السؤال الثالث بقول:
في تحت إيدك بارودة مين حابة اتطخي فيها ؟؟ خخخ
وفي تحت إيدك التانية وردة حمراء لمين بتهديها (بس لشخص واحد).

وهيييييييك بنكون خلصنا
ويعطيييييييكِ ألف ألف ألف عافية

تحيااااتي
همسة الاحساس

ريّانه

03-08-2009, 05:49 PM

اهلا اهلا ببنت العم ..

جايبه الك معي كاسه ميه .. :36_3_4:
المهم بعد ما شربتيها بدي أسألك ..

1. بتأمني بإشي اسمه كزبه بيضه ؟؟

2. بتخافي من العتمه ..؟؟

3. بتحبي تقعدي على شباك داركم او البلكون ؟؟

4. لو القضيه الفلسطينيه بإيدك شو هو أول قرار بتتخذيه ؟؟

5. شو رأيك فيّ .؟؟:woohehe:

أخر سؤال فضولي شوي ..
انتي متأكدة انو الروايه الي قرأتيها لأحلام مستغانمي اسمها عابر سبيل ؟؟:huh:
لأني قرأتها وأسمها عابر سرير :D

\\

صحتين الاسئله عليكِ

ДŁ-мoĐąмЄR

03-08-2009, 05:54 PM

السلام عليكم ورحمة الله وبركاته

http://www5.0zz0.com/2009/08/03/14/746352624.gif

SoFt G!rL

03-08-2009, 07:12 PM

بسم الله الرحمن الرحيم
السلام عليكم ورحمة الله وبركاته
بعتزر عن قدومي متاخره بس كنت مشغوله شوي
اهلا وسهلا فيكي اختي ومبروك نجاحك بالثانويه العامه
اهلا وسهلا هداية والله اشتقنالك والله يبارك فيكي يا رب :D
يلا انبلش
من هم الصحاب الصفات الاتية ؟
قلم رائع
عقاب
قلم جميل
ام زيد
قلم نشيط
هداية
قلم ذواق
همسة الاحساس
قلم رهيب
كاارين
من هو مئلك الاعلى بالحياه
مثلي الاعلى نفسي
اجمل كلمه قيلت لكي ومتى
كل كلمة من انسان بحبو بتكون اجمل كلمة :D
اسعد يوم بحياتك
يوم نتائج التوجيهي :woohehe:
شو بتهدي اعضاء هذا المنتدى الرائع
بهديهم لكل واحد وردة بيضا
http://alamuae.com/gallery/data/media/32/1515461-d5cfaf533e356cce.jpg
كما تعودنا ان ناخذ راي الجميع بكرسي الاعتراف فمارايك اختي بكرسي الاعتراف
حلووو وبعرف الاعضاء على العضو الي على الكرسي اكتررر
فأي قرار تتخذه هل ..... تحكم عقلك أم قلبك فيه ... ؟؟ ومن الأسبق فالتحكيم
قلبك أم عقلك ؟؟؟؟؟؟؟؟
جاوبت قبل ارجعي صفحة لورا <<<<<<
شو أصعب المواقف اللي مريتي فيها ؟

مممم مش متزكرة موقف معين
هل ندمت فحياتك على شي معيّــن ؟؟؟
لا والحمد الله
مالفـرق بين الحب والصداقة ؟ وهل يمكن ان يسلكا طرق الغيرة 00؟
في فرق كبير بين الحب والصداقة ....
الصداقة يمكن اقوى من الحب بس الحب احلى من الصداقة والحب ازا كان صادق بدووم اكتر من الصداقة والحب يسلك طرق الغيرة اكتر من الصداقة
ما رأيك بهذه الكلمات ..
الخيانة ..
وسيلة للرد على وفاء شخص غبي لم يختر الاختيار الصحيح
المرأه..
نصف المجتمع وشريكة الرجل وسبب مشاكل الدنيا :D
الصداقة ..
صخرة لا تحطمها الا مطرقة الخيانة
النميمة ..
عادة بشعة جدا ولا توجد كلمات لوصفها من كتر مهي بشعة
النفاق ..
سلووك بشع جدا واصحابه ابشع
مارايك بالكلمات التاليه :::::
الحب احساس حلو كتير وخصوصا ازا كان صادق ونابع من القلب بوصل للقلب
الرومانسيه اشي بكمل الحب وما بكون الا بين العشاااق :36_3_4:
الجمال نعمة من الله وهبها لكل انسان والجمال جمال الروح والمشاعر برأيي
رقة المشاعر الاحساس والتضامن مع الاخرين في مأسيهم والاحساس بمعاناتهم
الام اجمل مخلووق خلقه الله بالدنيا واصدق انسانة بالدنيا
فلسطين وطن الاحرار
حابه نضيف قسم اخر للمنتدى وان نعم فما هو هذا القسم
مممم لازم اتضيفو قسم للشباب زي قسم البنات عشان يحطو فيه اواعي الهم وشغلات بتخصهم هيك فيها مغاوزة :=D:
ماذا تقولين لاصحاب الموضوع
محمد نخال .... حكيت قبل ..
العيساوي .... حكيت قبل ..
فادي عضو منيح وبتمناله النجاح والتوفيق السنة الجاي بالتوجيهي
ام زيد.... حكيت قبل ..
انا هدايه بنوتة طيوبة وكربوجة وبتمنالك النجاح بحياتك العلمية والعميلة يااارب ودمك خفيف ونشيطة
لي عوده باذن الله
تقبلي مروري
اهلا وسهلا فيكي هدهد بكل وقت بتنورينا
دمتي بكل خير

//

SoFt G!rL

03-08-2009, 07:25 PM

هايزووو
كيفك حبوشتي؟

تمام حبيبتي مشتاقينلك ونورتيني بوجودك حبوشتي :p

جلطوكي في الأسئلة صح ؟

لا ولووو

طيب الموهمززز
انا بدي أسأل بس سؤالين وما تنسي انك على كرسي الإعتراف
يعني بدي صراااااااحة

أكيد ولو من عيوني

السؤال الأول بقووول
مين أكتر انسان كرهتيه بكل حياتك ولو شوفتيه نفسك تقتليه ؟

ولا حدا ما بكره حدا :

السؤال الثاني بقول:
أتعس يوم مر بحياتك هو يوم ... ؟ وليش كان تعيس ؟

لما امي زعلت مني وضلت اسبوع ما تحكي معي السبب بحب احتفظ فيه لحالي :p

السؤال الثالث بقول:
في تحت إيدك بارودة مين حابة اتطخي فيها ؟؟ خخخ

محمود عباس "ابو مازن"

وفي تحت إيدك التانية وردة حمراء لمين بتهديها (بس لشخص واحد).

لحدا ....

وهيييييييك بنكون خلصنا
ويعطيييييييكِ ألف ألف ألف عافية

الله يزيدك الف الف الف عافية

وشكرا همووسة على اسئلتك المميزة متل وجودك

دمتي بخير

تحيااااتي
همسة الاحساس

SoFt G!rL

03-08-2009, 07:33 PM

اهلا اهلا ببنت العم ..

اهلا اهلا حبيبتي وانا بحكي ليش الصفحة هاي بالزات منووورة :d

جايبه الك معي كاسه ميه ..

الله يسعدك يا رب صاحبة واجب بس يا ريت تكون باردة :p

المهم بعد ما شربتيها بدي أسألك ..

1. بتأمني بإشي اسمه كزبه بيضه ؟؟

بآآآمن وبكزبها كتييييير :p

2. بتخافي من العتمه ..؟؟

هههههه هاي نقطة ضعفي اجيتي على الوجع

3. بتحبي تقعدي على شباك داركم او البلكون ؟؟

على البلكووون بس اكون لحالي

4. لو القضيه الفلسطينيه بإيدك شو هو أول قرار بتتخذيه ؟؟

احرق فتح وحماس والجبهة واعمل وحدة وطنية وكلنا نكون ايد وحدة وفلسطينين واخوة جمب بعد ضد عدو واحد مش ضد بعض

5. شو رأيك فيّ .؟؟

انتي بنوتة عسسسسسسسل وما في زيك واكتر بنوتة بحبها من بنات عم ابوي :d لانو بحسك فهمانة وعقلك بوزن بلد وكربوجة

أخر سؤال فضولي شوي .
.
انتي متأكدة انو الروايه الي قرأتيها لأحلام مستغانمي اسمها عابر سبيل ؟؟
لأني قرأتها وأسمها عابر سرير

يمكن مخربطة لانو قرأتها قبل سنة ونص ,سنيتن :d والي بكون توجيعي بنسى الدنيا مش بس اسم رواية والعتب عالنظر

\\

صحتين الاسئله عليكِ

الله يسعدك واهلا وسهلا فيكي

وشكرا على الاسئلة الحلوة

دمتي بود

//

SoFt G!rL

03-08-2009, 07:51 PM

http://www5.0zz0.com/2009/08/03/14/746352624.gif
عادة حلوة فيكي بتحبيها وبتحبب الناس فيكي ؟؟
ممم طيبة قلبي ودايما بضحك بوجه الناس ومرات بضحك بوجه بنات ما بعرفهم وبرفضش لحدا طلب وبحبش احكي لأ لحدا او اكسر خاطر حدا
اسوء عادة ب SoFt G!rL ؟

ممم بزعل بسرعة وبعيط من كلمة وحساسة زيادة عن اللزوم كبيرررررة و عنيدة وصعب اقتنع بسرعة

شو بتفهمي من كلمة (اشمئزاز)؟
يعني اشي قررررف اوو اشي بخلي الواحد يقرف :p
شو بيعنيلك دفترك الخاص!

أمين اسراري ومخبأ مشاعري
لو اعطاناكي هالدفتر وقلم شو بتكتبي فيه؟ بصراحة !
بكتب .... إذا اخترت الحياة على الهامش فـأعلم إنك ستموت بدون عنوان !!
قد تستطيع أن تنزع صوره من حائطك ولكنك حتمًا ستبقي جرحًا ينزف على الحائط !!
وشكرا الك معاذ على الاسئلة الحلووووة كتير
واهلا وسهلا فيك
والله يعطيك ألف عافيهـ
//

ريمونا

04-08-2009, 12:23 AM

ريمونا بنوتة طيوبة ورووووووعة وبمووووت فيها

:=D:
والله انك عجبتيني
وخجلتيني كمان
وانا كمان بموووت فيكي
دوري اسالك
لساتك زعلانه عشان ما حكاناش مبروك.. :huh:
يا ستي ميت الف مبروووووووووووووووووووووووووووووووووووووووووك
بس انا حبيت احكيلك اياها على الطبيعه مش عالمنتدى وكلام الجرايد

بس هاد السؤال الي في بالي ومحيرني
ومش مخليني اعرف انام
يلا جاوبيني اشوفك :bringitout:

احتمال ارجعلك
...

SoFt G!rL

04-08-2009, 05:01 PM

والله انك عجبتيني
وخجلتيني كمان
وانا كمان بموووت فيكي

الله يخليكي حبيبتي وشكرا الك

دوري اسالك
لساتك زعلانه عشان ما حكاناش مبروك..
يا ستي ميت الف مبروووووووووووووووووووووووووووووووووووووووووك
بس انا حبيت احكيلك اياها على الطبيعه مش عالمنتدى وكلام الجرايد

بس هاد السؤال الي في بالي ومحيرني
ومش مخليني اعرف انام
يلا جاوبيني اشوفك

هههههههههههههههههههههه لا ولووو ما بنزعل منك يا حجة بس انا زعلت عشان ما حكتيلي وحبيت انكشك واعاتبك ولوما ما بحبك ما بعاتبك انك ما حكتيلي مبرروك يعني بهمني امرك وبهمني تباركيلي

وان شاء الله السنة الجاي انا بباركلك بنجاحك يااااااارب ونفرح فيكي يا بطة

احتمال ارجعلك
...

اهلا وسهلا يا احلى ريمونااا وينتا مرجعتي

دمتي بكل خير

//

kArEeN

04-08-2009, 09:29 PM

يعطيكي العافيه هبوش
رجعتلك مع كمشة اسئله

كم ساعه تقضيها في عالم النت؟

هل تعترفي بشيء اسمه الصداقه بين الرجل والمرأة؟؟

هل تؤيدي الزواج العاطفي ام الزواج التقليدي ..؟؟ ولماذا

ما رأيك بالاقوال التاليه :

المرأة اذا أحبت الرجل تحب كل شيء فيه حتى مساوئه
واذا كرهت الرجل تكره كل شيء فيه حتى محاسنه؟؟

الإبداع يولد من رحم المعاناة؟

ما التجربه التي تتمني تكرارها؟؟

شخصية سوفت جيرل داخل المنتدى مطابقه لشخصيتها خارج المنتدى؟؟

من يحتل المساحه الاكبر في قلبك؟؟

مشكلهة واجهتك من الشخص الذي تلجأ اليه سوفت جيرل لحلها؟؟

وشكرا على رأيك فيي خجلتيني والله :$
:36_3_11:

SoFt G!rL

05-08-2009, 12:40 PM

يعطيكي العافيه هبوش
رجعتلك مع كمشة اسئله

الله يزيدك الف عافية حيببتي كارين
واهلا وسهلا فيكي وبأسئلتك

كم ساعه تقضيها في عالم النت؟

من 3-4 ساعات

هل تعترفي بشيء اسمه الصداقه بين الرجل والمرأة؟؟

في مجتمعنا لا اؤمن

هل تؤيدي الزواج العاطفي ام الزواج التقليدي ..؟؟ ولماذا

مممم لو عليي الزواج العاطفي أكيد لانه الواحد بكون عارف الانسان الي بدوو يرتبط فيه وبتعود عليه اسرع ولكن دائما القدر بلعب لعبته معنا وكلشي نصيب :d

ما رأيك بالاقوال التاليه :

المرأة اذا أحبت الرجل تحب كل شيء فيه حتى مساوئه
واذا كرهت الرجل تكره كل شيء فيه حتى محاسنه؟؟

صحيح نوعا ما ولكنه لا ينطبق عليي فأنا اذا احببت اعرف مساوئ الشخص الذي احبه وممكن اني انتقده ولا اكره في الرجل الذي اكره محاسنه

الإبداع يولد من رحم المعاناة؟

ليس شرطا فيوجد كثير من المبدعين ليسو محرومين والعكس صحيح ولكن ربما في بعض الحالات يكون الحرمان دافع للإبداع ولكن ليس شرطا !!

ما التجربه التي تتمني تكرارها؟؟

ههههه التوجيهي

شخصية سوفت جيرل داخل المنتدى مطابقه لشخصيتها خارج المنتدى؟؟

تقريبا 70%

من يحتل المساحه الاكبر في قلبك؟؟

من سكن قلبي :p

مشكلهة واجهتك من الشخص الذي تلجأ اليه سوفت جيرل لحلها؟؟

ل مم روز وشخص

وشكرا على رأيك فيي خجلتيني والله :$

ولووو انتي ما بتنوصفي بكلمات وانتي متل اختي والله

والله يسعدك ويوفقك

دمتي بكل خير

//

ДŁ-мoĐąмЄR

05-08-2009, 08:34 PM

http://www10.0zz0.com/2009/08/05/17/365868985.gif

>>>>>>>>>>>>>>>>>>>

ام زيد

05-08-2009, 09:36 PM

السلام عليكم ورحمة الله وبركاته

كنت خايفة ما الحق فترة استضافتك ..اعتذر عن التأخير والسبب الاعراس ..عقبال عرسك

وتأخيري هذا من سوء حظي لانه مش لاقي سؤال اسألك اياه .بس ما بتخافي بندبرها .

اول شئ طلبك مش ناسيته !

ثاني شئ اشكرك على رأيك فيه ..وعلى وصفك لي باني طباخة المنتدى !

سؤالي شو اكثر طبخة شفتيها اعجبتك ؟؟

شو الطبخة التي تتقنيها ؟؟

هل انتي ميالة للفنون والاشغال اليدوية ؟؟

احكيلنا عن حفل زفاف حضرتيه وكان فيه شئ مميز .

سوفت جيرل ..لما كنت بنت وقبل زواجي كنت اجمع كروت الاعراس اللي كانت تيجينا
والسبب !!

علشان اختار احلى كرت واعملوا لعرسي ..بس النهفة ..
اني تزوجت في الانتفاضة وما كان في لا كروت ولا معازيم !!

هل سوفت جيرل بتجمع كروت ههههههههه ؟؟

معلش اسألتي فرايحية ...لساني متأثرة بالاعراس اللي كانت عنا .!

واحلى تحية للمدمر على تميزه بعرض الاسئلة

SoFt G!rL

06-08-2009, 03:46 PM

http://www10.0zz0.com/2009/08/05/17/365868985.gif

>>>>>>>>>>>>>>>>>>>

ههههههههههههههههههه

لالالالا ومش هاااان !!

يعني علينا تعزيل وكش وورشة بس انا بكشط وانت بتمسح :heeee:

//

SoFt G!rL

06-08-2009, 04:10 PM

السلام عليكم ورحمة الله وبركاته
كنت خايفة ما الحق فترة استضافتك ..اعتذر عن التأخير والسبب الاعراس ..عقبال عرسك
وتأخيري هذا من سوء حظي لانه مش لاقي سؤال اسألك اياه .بس ما بتخافي بندبرها .
اهلا وسهلا خالتو ام زيد وحياكي الله وين مأجيتي انتي بس لو اجيتي وحكيتي مرحبا بتكفي وبتوفي المهم شوفتك :p
اول شئ طلبك مش ناسيته !

تسلمي :D

ثاني شئ اشكرك على رأيك فيه ..وعلى وصفك لي باني طباخة المنتدى !
ولوو هاد اقل واجب
سؤالي شو اكثر طبخة شفتيها اعجبتك ؟؟
اكلة السمك المحشي ومن الحلويات كعكة البلاك فورست
بس مزبطش معي الكيك :P
شو الطبخة التي تتقنيها ؟؟
الكبسة بس... لأني بحبها
هل انتي ميالة للفنون والاشغال اليدوية ؟؟
لا ما الي طولت بال على هيك شغلات
احكيلنا عن حفل زفاف حضرتيه وكان فيه شئ مميز .
كل حفلات الزفاف متل بعض وانا من النوع الي نادرا بروح على اعراس يعني الي بقربولي كتير كتير كتير بس بروح على عراسهم وبزهق بسرعة في العرس يعني بقعدش ساعة الا انا مروحة :D
سوفت جيرل ..لما كنت بنت وقبل زواجي كنت اجمع كروت الاعراس اللي كانت تيجينا
والسبب !!
علشان اختار احلى كرت واعملوا لعرسي ..بس النهفة ..
اني تزوجت في الانتفاضة وما كان في لا كروت ولا معازيم !!
هل سوفت جيرل بتجمع كروت ههههههههه ؟؟
لا ما عندي هالهواية بس مرة وحدة اعجبني كرت واحتفظت فيه ولهلأ عندي بس مش هواية لوقت مأتجوز بصير خير ويمكن يصير فييا زيك ويصير انتفاضة واتعب حالي على الفاضي !!:p
معلش اسألتي فرايحية ...لساني متأثرة بالاعراس اللي كانت عنا .!
هههههههههههههه مش مشكلة معذورة !!
واحلى تحية للمدمر على تميزه بعرض الاسئلة
واحلى تحية الك على مرورك واسئلتك الحلوووة
//

روز

07-08-2009, 12:49 PM

السؤال الاخير معلش ارجع مع كومة اسئلة مفلسفة؟
اكيد معلش واهلا وسهلا فيكي وضلي نوريني بكل صفحة :d

كما وعدناكم

مع الوجبه الدسمه

1- لازم نسال عن احوالك .. شو اخبارك؟

2- لو ظهر في بيتكم بئر نفط ... هل ستخبر الدولة أم تختار الصمت .؟

3- لو قدر لك أن تدخل السجن فماهي القضية التي تتمنى أن تدخل بها إليه ؟

4- أنت مكلف بحذف حرفين من حروف اللغة العربية .. أيهما ستختار ؟ ولماذا ؟

5- في يدك قنبلة يدوية وفي الأخرى وردة حمراء .. أين ستضع القنبلة ؟ وأين ستضع الوردة؟

6- يقال أن الكتابة محاولة للطيران بطائرة ورقية .. مجرد أحلام في الهواء .. ما رأيك أنت ؟

7- بجملة واحدة فقط أكتب تعريفاً لكل كلمة من الكلمات التالية :

الوطن :
الأم :
الليل :
الحب :
الصمت :
أمريكا :
المرآة :
الإنترنت :
الرجل :
الماسنجر :

8- على افتراض انك وجدت كائن غريب كيف ستقدمه للعالم .,؟؟

9- كيف تتخيل العالم دون هذه الأشياء
القهوة :
الكمبيوتر :
الحب :
يوم العطله:

10- اختر منصباً واتخذ قرارا !؟

11- عاد المتنبي وقَصَدَكَ لتبحث له عن عمل ماذا ستقترح عليه ؟

12- لو كنت مرشدا سياحيا في صحراء الربع الخالي من ستصطحب معك وتضيعه هناك ، ولماذا؟

13- أختر خمسة أعضاء من المنتدى وامنحهم ألقاباً ؟

اسئله مفلسفه بس انتي وافقتي :36_1_1:

Good Luck :bingo:

SoFt G!rL

07-08-2009, 02:14 PM

كما وعدناكم

مع الوجبه الدسمه

1- لازم نسال عن احوالك .. شو اخبارك؟

الحمد الله تمام ...بدي سلامتك

2- لو ظهر في بيتكم بئر نفط ... هل ستخبر الدولة أم تختار الصمت .؟

هههه اختار الصمت هو لما الحكومة تلاقي اشي بتخبرني

3- لو قدر لك أن تدخل السجن فماهي القضية التي تتمنى أن تدخل بها إليه ؟

انا خايفة احكي اوصل السجن ... بس الي بالي بالك

4- أنت مكلف بحذف حرفين من حروف اللغة العربية .. أيهما ستختار ؟ ولماذا ؟

ههههه ولا حرف لانه لغتنا حلوة هيك متل مهي

5- في يدك قنبلة يدوية وفي الأخرى وردة حمراء .. أين ستضع القنبلة ؟ وأين ستضع الوردة؟

القنبلة بحطها بمحل موجود في اعدائنا والوردة لكل فلسطيني يقد وطنه

6- يقال أن الكتابة محاولة للطيران بطائرة ورقية .. مجرد أحلام في الهواء .. ما رأيك أنت ؟

صحيح فكلما حلقنا بعيدا وصلنا الى ذروة الابداع في الكتابة

7- بجملة واحدة فقط أكتب تعريفاً لكل كلمة من الكلمات التالية :

الوطن : الضمير الذي يعيش بداخلي

الأم : ارق واصدق انسانة في العالم

الليل : مسكني في وحدتي

الحب : اسما المشاعر الانسانية

الصمت : لغتي عند العجز

أمريكا :ازبل حكومات العالم

المرآة : تخبرك حقيقة ملامحك

الإنترنت : عالم واسع تجد فيه كل جديد

الرجل : شريك المرأة ونصفها وسندها

الماسنجر : كترة برررم وبستغنيش عنوو

8- على افتراض انك وجدت كائن غريب كيف ستقدمه للعالم .,؟؟

بجيبه وبفرجيهم اياه زي مهو وهما بعرفو لحالهم :heeee:

9- كيف تتخيل العالم دون هذه الأشياء
القهوة : عادي لأني ما بشربها بس اكيد بنشوف العالم مسطلة ومش مصحصة
الكمبيوتر : مستحيل نعيش
الحب : عالم وحوش
يوم العطله: عالم تعبااانة ومحدا شايف الفضى

10- اختر منصباً واتخذ قرارا !؟

رئيسة الدولة ... بلغي كل الاحزاب وبوحد الدولة الفلسطينية وبنوقف ضد عدوو واحد

11- عاد المتنبي وقَصَدَكَ لتبحث له عن عمل ماذا ستقترح عليه ؟

بنصحه يضل بعمله لانه الي احسن منه مش لاقيين عمل :p

12- لو كنت مرشدا سياحيا في صحراء الربع الخالي من ستصطحب معك وتضيعه هناك ، ولماذا؟

ابوو مازن :D

13- أختر خمسة أعضاء من المنتدى وامنحهم ألقاباً ؟

روز : نوارة المنتدى

العيساوي : الزعيم

ريمونا : وردة المنتدى

عقاب : حكيم المنتدى

المدمر : عقيد المنتدى :D

اسئله مفلسفه بس انتي وافقتي :36_1_1:

Good Luck :bingo:

اهلا وسهلا حبيبتي روز
وشكرا على اسئلتك المفلسفة بس بتعرفي نص ساعة بالزبط وانا بجاووب :p

//

ДŁ-мoĐąмЄR

08-08-2009, 11:24 AM

السلام عليكم ورحمة الله وبركاته

اختي سوفت جيرل
اسمحيلي اسألك آخر اسئلة قبل ما ننهي الاستضافة

اتدلعتي بهالاستضافة؟؟

كيف كان تفاعل الاعضاء ومشاركتهم بهالاستضافه!!

اكتر سؤال حبتيه؟

سؤال ازعجك ودايكك؟؟

رأيك بالمقابلة!

كلمة للمنتدى بشكل عام؟

(المايك معك احكي شو بدك)

تحيتي،،

ريّانه

09-08-2009, 02:33 PM

5. شو رأيك فيّ .؟؟

انتي بنوتة عسسسسسسسل وما في زيك واكتر بنوتة بحبها من بنات عم ابوي :d لانو بحسك فهمانة وعقلك بوزن بلد وكربوجة

يا بنت حمرو خدودي هه .. :heeee:
يلا خليني أسأل وأشرد ..

شو رأيك بقترة المراهقه .؟

نصيحه للي بهذه المرحله ؟

اذا كنا احنا دولة مستقله وفي تجنيد أجباري للشباب والبنات اذا بدهم بس تطوع .. هل تكوني ممن يتطوع ؟؟ (أنا اه هه ) ؟

كزبة كزبيتها ولهلكيت ماشيه ؟

احلا لحظات عمرك وين عشتيها ومع مين ؟؟ (غير اللتوجيهي )

شو بتسوي لو خرب موديم جهازكم ؟؟

بتحبي شغلات السيطرة على البني ادمين ؟؟

انتي من النوع الي بحب يلبس الحطات أو الكوفيه بشكل كبير ؟؟

وبسس
جاوبي عليهن وادعيلي :36_9_1:

بكت هان ..
بنت عم أبوكي :D
\\\

SoFt G!rL

09-08-2009, 06:37 PM

السلام عليكم ورحمة الله وبركاته

اختي سوفت جيرل
اسمحيلي اسألك آخر اسئلة قبل ما ننهي الاستضافة

اتدلعتي بهالاستضافة؟؟

اها اكيد اتدلعت واحلى اشي التصاميم عتجد الله يعطيك الف الف الف عافية

كيف كان تفاعل الاعضاء ومشاركتهم بهالاستضافه!!

كان التفاعل حلوو وانبسطت بالاستضافة والاسئلة

اكتر سؤال حبتيه؟

ههههههههه تبع الكشاطة

سؤال ازعجك ودايكك؟؟
ما في ولا سؤال ازعجني كلهم حلوات

رأيك بالمقابلة!

كانت مقابلة مميزة وحبيتها كتير

كلمة للمنتدى بشكل عام؟

الله يوفق كل شخص بالمنتدى ويعطيعي كل واحد عقد نياته وقضيت ايام حلوة كتير بهالمنتدى 3 سنين كانو ايام حلوة وكتير مميزة

(المايك معك احكي شو بدك)

بحب احكي لكل طالب نجح بالتوجيهي الف الف الف الف مبررررروك وعقبال عند الجامعة ولكل الي ما حالفهم الحظ الله يوفقكم بمجاللات حياتكم التانية ولطلاب السنة الجاية شدوو حالكم وجيبو علمات عالية وارفعو راسنا
وراس اهليكم

وشكرا الك معاذ كتيييييييير على المقابلة الرووعة والاسئلة الاروع

تحيتي

//

خيّال البلد

09-08-2009, 10:21 PM

السلام عليكم ورحمة الله وبركاته ..

(( الحمد لله .. لحقت حالي بالوقت بدل الضائع ))

اول شي اختي بباركلك بنجاحك بالتوجيهي .. وبدعيلك الله يوفقك بالجامعة وتنهي تعليمك العالي وتكوني اسرة تبكي مبسوطة فيها .. -- يعني باختصار تحققي امنيتك بالحياة --

ثاني شي .. بشكرك ع الكلمات اللي قلتيها بحقي في هاي المقابلة الجميلة والمميزة بوجودك ووجود باقي الاعضاء ..

ثالث شي .. بعتذر عن التاخير ...

رابع شي .. عندي اكم سؤال ..

1- انت مشرفة معنا وبتعرفي .. في كثير مشاريع بنحاول نسويها ونطبقها من اجل ان تعم الفائدة ع الجميع ..
بعض هذه المشاريع يتم تطبيقها بنجاح .. بعضها يبدا ولا ينتهي .. وبعضها لم نبدا به .. والوقت يمر دون عمل شيء .. اين المشكلة برايك .. ولو قلنا لك انت المسؤولة عن ايجاد حل لهذه المشكلة .. ماذا كنت ستفعلين ؟؟؟

2- لو قلنا لك حاولي تغيير ترتيب الاقسام بالصفحة الرئيسية .. مثلا تغير الترتيب فقط .. او تحويل قسم من قسم رئيسي الى فرعي او العكس .. او ازلة قسم او اضافة قسم .. ماذا كنت ستفعلين ؟؟

3- فكرة او مشروع تودين القيام به من اجل الجميع وتجدين صعوبة في ذلك ؟؟

4- سؤال توقعت ان يسالوك اياه .. ولم يقم احد بذلك ؟؟

5- طوال وقت المقابلة وانت تجيبين على الاسئلة ... هل تودين تبديل الادوار وان تسالي شخصا ما ؟؟

6- لو استيقظت في يوم من الايام .. وفتحت المنتدى . ووجدت رسالة تقول ..

(( اهلنا الكرام .. الى كل شخص احب هذا البيت الذي جمعنا لاكثر من 4 سنوات متحديا كل عواصف القمع التي حاولت ان تودي به .. نعتذر لكم جميعا لان نخبركم انه للاسف قد اغلقت ابواب هذا البيت ونوافذه .. بفعل اناس حقودين .. نعذر لكم .. والى لقاء .. )) يعني باختصار .. المنتدى سكر ... وما في منتدى

شو هي ردة فعلك الاولية ؟؟

الاسئلة بكن رابعا ...

خامسا .. بشكر اخي وحبيبي المدمر على هذه المقابلة المتميزة .. وبحكيله يعطيك العافية ومبروك نجاحك انت الثاني ..

سادسا ..

تقبلوي احترامي وتقديري
اخوكم
خيّال البلد

محمد نخال

10-08-2009, 12:00 AM

السلام عليكم ورحمة الله وبركاته

ان تصل متأخراً خير من أن لا تصل أبداً ..

اعتذر بشدة للاخت سوفت جيرل عن تأخري بالرد على إستضافتك المميزة حقاً

واسمحي لي ان انتهز فرصة استضافتك للمباركة بنجاحك في الثانوية العامة وبمعدل برفع الراس فعلاً ، مـــبـــارك ومـنـهـا للأكـبـر إن شـاء الله

وأرفع قبعتي احتراماً لقلمك ، الذي سَطُعَ نوره الجميل فأضاء عتمة قسم الإبداعات بجمال كلماته ومعانيه ، دام لك قلمك ، ودمتي لنا مبدعة

واعذريني فلا أملك الا ان أسأل لكِ دوام التقدم والنجاح ، هذا سؤالي الوحيد ، ومن سبقني قام بواجب الضيافة :--)

وجزيل الشكر للمدمرالمبدع والذي يتحفنا بكل ما هو جديد ومختلف في هذا القسم ، وبجانبه الأخت المتميزة أيضاً كارين

احترامي

SoFt G!rL

10-08-2009, 01:52 PM

يا بنت حمرو خدودي هه ..
يلا خليني أسأل وأشرد ..

هههههههههههه اسألي واشردي عطووول :p

شو رأيك بقترة المراهقه .؟

هي فترة ما بين الطفولة وسن الرشد وبمرفيها المراهق بعدة تغيرات فيسولوجية وفكرية وبتكون على بعض المراهقين صعبة وفي بعضهم ما بحسو انهم براهقو بس اكيد فترة صعبة على الاهل قبل الشباب

نصيحه للي بهذه المرحله ؟

انهم يسمعو حكي اهلهم لأنهم هما اعرف بمصلحة ولادهم وما يعاندوهم :s

اذا كنا احنا دولة مستقله وفي تجنيد أجباري للشباب والبنات اذا بدهم بس تطوع .. هل تكوني ممن يتطوع ؟؟ (أنا اه هه ) ؟

اكيد بتطوووع

كزبة كزبيتها ولهلكيت ماشيه ؟

ههههههههه لما اكزب ببين عليي وانا بحكي ههههههههه

احلا لحظات عمرك وين عشتيها ومع مين ؟؟ (غير اللتوجيهي )

احلا لحظات عشتها الصيف هداك لما رحنا رحلة مع دار سيدي وعمامي وعماتي بباص واحد كان يوم ما بنتسى ابدااااااااااااااااااا وكان يوم بجنن بالنسبة الي لأنوو كنا عيلة وحدة كبيرة ومبسطوين مع بعض

شو بتسوي لو خرب موديم جهازكم ؟؟

ههههه بسوي عرس فالدار

بتحبي شغلات السيطرة على البني ادمين ؟؟

لا لأنه بحبش حدا يسيطر عليي

انتي من النوع الي بحب يلبس الحطات أو الكوفيه بشكل كبير ؟؟

لا ما بحبهم

وبسس
جاوبي عليهن وادعيلي

بكت هان ..
بنت عم أبوكي
\\\

اهلا وسهلا بنت العم

والله نورتينا وانبسطت عنجد بوجودك بهالمقابلة واسئلتك الحلوة متلك

تحيتي

//

SoFt G!rL

10-08-2009, 02:00 PM

السلام عليكم ورحمة الله وبركاته ..

(( الحمد لله .. لحقت حالي بالوقت بدل الضائع ))

اهلا وسهلا فيك اخوي خيال البلد نورتنا

اول شي اختي بباركلك بنجاحك بالتوجيهي .. وبدعيلك الله يوفقك بالجامعة وتنهي تعليمك العالي وتكوني اسرة تبكي مبسوطة فيها .. -- يعني باختصار تحققي امنيتك بالحياة --

الله يبارك فيك يااا رب وانا كمان بدعيلك انه الله يوفقك بالجامعة وكمان انت تحقق امنيتك بالحياة

ثاني شي .. بشكرك ع الكلمات اللي قلتيها بحقي في هاي المقابلة الجميلة والمميزة بوجودك ووجود باقي الاعضاء ..

ولووو هادا واجبنا

ثالث شي .. بعتذر عن التاخير ...

مش مشكلة زي محكى اخونا محمد ان تصل متأخرا افضل من ان لا تصل ابدا

رابع شي .. عندي اكم سؤال ..

1- انت مشرفة معنا وبتعرفي .. في كثير مشاريع بنحاول نسويها ونطبقها من اجل ان تعم الفائدة ع الجميع ..
بعض هذه المشاريع يتم تطبيقها بنجاح .. بعضها يبدا ولا ينتهي .. وبعضها لم نبدا به .. والوقت يمر دون عمل شيء .. اين المشكلة برايك .. ولو قلنا لك انت المسؤولة عن ايجاد حل لهذه المشكلة .. ماذا كنت ستفعلين ؟؟؟

الحل الوحيد هو توزيع المهام من قبل المدير على المشرفين والتعاون بين المدير والمشرفين والاعضاء بالتنسيق مع الكل

2- لو قلنا لك حاولي تغيير ترتيب الاقسام بالصفحة الرئيسية .. مثلا تغير الترتيب فقط .. او تحويل قسم من قسم رئيسي الى فرعي او العكس .. او ازلة قسم او اضافة قسم .. ماذا كنت ستفعلين ؟؟

الترتيب بشوفه مناسب

بس قسم القدس عاصمة الثقافة بشوف انه مش لازم يكون فرعي لازم يكون رئيسي لأنه لم يعطى حقه وانا مرات ما بنتبه انه في مواضيع جديدة فيه لانه فرعي ويمكن كتير اعضاء ما بنتبهوله مع انه مهم جدا ويعتبر يمكن اهم من القسم العام!!

3- فكرة او مشروع تودين القيام به من اجل الجميع وتجدين صعوبة في ذلك ؟؟

لا يوجد افكار او مشاريع بعقلي ... لأنه مشروع جامعتي بكفي :p

4- سؤال توقعت ان يسالوك اياه .. ولم يقم احد بذلك ؟؟

ممممم من اول المقابلة ما حطيت اسئلة معينة بعقلي وما كنت استنى سؤال معين

5- طوال وقت المقابلة وانت تجيبين على الاسئلة ... هل تودين تبديل الادوار وان تسالي شخصا ما ؟؟

اهااا

6- لو استيقظت في يوم من الايام .. وفتحت المنتدى . ووجدت رسالة تقول ..

(( اهلنا الكرام .. الى كل شخص احب هذا البيت الذي جمعنا لاكثر من 4 سنوات متحديا كل عواصف القمع التي حاولت ان تودي به .. نعتذر لكم جميعا لان نخبركم انه للاسف قد اغلقت ابواب هذا البيت ونوافذه .. بفعل اناس حقودين .. نعذر لكم .. والى لقاء .. )) يعني باختصار .. المنتدى سكر ... وما في منتدى

شو هي ردة فعلك الاولية ؟؟

ممم بزعل اكيد لانه اول مأفوت على النت متعودة افوت على المنتدى حتى لو مش بإسمي مرات بفوت كضيفة عشان اتفرج على اخبار البلد وبدونه اكيد بكون ناقصني اشي لما افوت على النت

الاسئلة بكن رابعا ...

خامسا .. بشكر اخي وحبيبي المدمر على هذه المقابلة المتميزة .. وبحكيله يعطيك العافية ومبروك نجاحك انت الثاني ..

سادسا ..

تقبلوي احترامي وتقديري
اخوكم
خيّال البلد

اهلا وسهلا اخوي خيال البلد

اكيد انبسطت بوجودك واسئلتك الحلوة

دمت بخير

//

SoFt G!rL

10-08-2009, 02:03 PM

السلام عليكم ورحمة الله وبركاته

ان تصل متأخراً خير من أن لا تصل أبداً ..

أكييييد

اعتذر بشدة للاخت سوفت جيرل عن تأخري بالرد على إستضافتك المميزة حقاً

واسمحي لي ان انتهز فرصة استضافتك للمباركة بنجاحك في الثانوية العامة وبمعدل برفع الراس فعلاً ، مـــبـــارك ومـنـهـا للأكـبـر إن شـاء الله

الله يبار بعمرك يا رب والف مبروك الك كمان وعقبال عند تخرجك من الجامعة

وأرفع قبعتي احتراماً لقلمك ، الذي سَطُعَ نوره الجميل فأضاء عتمة قسم الإبداعات بجمال كلماته ومعانيه ، دام لك قلمك ، ودمتي لنا مبدعة

واعذريني فلا أملك الا ان أسأل لكِ دوام التقدم والنجاح ، هذا سؤالي الوحيد ، ومن سبقني قام بواجب الضيافة

وجزيل الشكر للمدمرالمبدع والذي يتحفنا بكل ما هو جديد ومختلف في هذا القسم ، وبجانبه الأخت المتميزة أيضاً كارين

احترامي

اشكرك اخوي محمد نخال على مرورك الرائع
وكلماتك الرائعة بحقي واشكر لك اطرائك الجميل
فدمت متميزا واقدر لك مرورك

تحيتي

//