مرحلة ما بعد التوجيهي... شو رح تعمل؟؟

[زهرة الأقصى]

السلام عليكم ورحمة الله وبركاته
كيف حالكم يا اخواني واخواتي؟؟... انا رجعت بعد التوجيييييهي
:hi:
احنا خلصنا مرحلة المدرسة وهلأ كل واحد فيني رح يبني حياته الخاصة الي هو برسم طريقها
اشي منا.. حاب يكمل بجامعات اسرائيلية...
واشي منا... متلي... بيفضل يقعد بالدار ولا يدرس بين اليهود.. فحابين يدرسو بجامعات فلسطين...
واشي منا... ما لقا التخصص اليِ بحلم فيه هون ... او رغبته يدرس برا .. فجهز حالو وحمل وراقو عشان يطلع برا...
وفي منا... فضلو يكملو حياتهم بعيد عن جو الدراسة والجامعات واتجهو نحو الخطبة والزواج وتكوين الاسرة...
وفي منا... لهلأ تايه في الدنيا... مش عارف وين يروح.. او شو بدو يسوي في حاله.. يعني "مش عارف وين الله حاطه"...
والبعض منا... ناوي يمشي الطريق الي رسموله اياها اهلو.. بدون اي اعتراض وبدون اي رأي منه... "مرضيين.. ولكن..!"
أياً كنا... من أي نوع احنا...
كل واحد فينا بهالمرحلة المفروض عم يرسم طريقه لقدام ...
وعم يحاول ياخد كل النصائح من الانسان الي ممكن يساعده بهالخصوص...
وطبعا رح تكون اراء الكبار مهمة .. بس الأهم آراءنا احنا..
احنا
شو حابين نعمل؟؟؟
شو ميولنا
وقدراتنا
ومهاراتنا
شو الاشي الي بنقدر نبدع فيه
والي صارلنا 12 سنة بنشتغل عشانه
شو هدفنا؟؟
وشو مصيرنا؟؟
أسئلة كتير بتدور ببالنا حالياً
وطبعا التوتر هو رد فعلنا
مش شرط التوتر يكون سلبي
-متل ما اخدنا بالانجليزي-
بس عنجد..
المرحلة الي وصلناها صعبة
-الي هي هلأ-
هلأ صار لازم نقرر.. او...
صار لازم نحسم القرار
وأكيد..
قراراتنا.. احنا الي بنتحمل نتائجها...
يا إما رح نقدر نحط بصمتنا في هالدنيا
يا إما نعيش ونموت أغراب
ودائما تذكر..
الفشل.. هو بداية طريق النجاح
وأيضاً تذكر...
"من يتق الله يجعل له مخرجاً"
.................
تعالو كلنا نحكي شو حابين نعمل بحياتنا؟؟
شو هدفنا؟؟؟ شو ناويين نقرر؟؟
شو بدنا ندرس؟؟ ووين؟؟ وكيف؟؟ وليش؟؟
شو البصمة الي حابب تتركها بحياتك؟؟
وكيف رح تستغل شبابك القادم؟؟
رح تبلش حياتك صح؟؟
ولا لهلأ مش عارف ليش انتة عايش؟؟
بدنا نجاوب كلنا مع بعض
على هالاسئلة الي صرلها سنة كاملة بتخطر على بالنا
والي الكل حوالينا بيستنا منا اجابة لألها
الهدف من الموضوع
انه نساعد بعض قدر المستطاع عشان نتوصل للقرار النهائي
..............................
فبالنسبة الي...
انا عارفة شو ميولي وعارفة بإيش انا ببدع..
بس التخصص مش قادرة اوصلله
او.. مش قادرة احدده
مع العلم اني دورت كتير وتعبت كتير وانا بدور وبستفسر
و....لهلأ...
ما في نتيجة!!
والنتائج يوم عن يوم عم بتقرب
والطلبات هلأ صار لازم تتقدم للجامعات
يعني لازم هلأأأأأ نقرر
ولكن.........
ما زال القدر مجهولاً.....!
:huh:

[أبو عدي]

السلام عليكم ورحمة الله وبركاته


اول شي بتمنى النجاح لجميع الطلاب ليقدو يبنو حياتهم بالطريقه الي بحلمو فيها
ويقدرو يفوتو التخصص الي بحلمو فيه من زمان

وانا من جهتي راح ابني حياتي على الطريقه الي بتناسبني وراح احاول
ادخل التخصص الي كنت احلم فيه من زمان
واكمل تعليمي وهدفي اني ادخل تخصصي واكمل فيه
لاني اكيد راح ابدع فيه لاني بحبو من كل قلبي وبحلم فيه من زمان
وفي مرة اهلي عرضو علي اني ادرس برا ازا ما زبطت معي هون بس
انا ما بفكر بهيك شي بس دايما بحط احتمالات وبخلي هاد الاقتراح لاخر شي
وبفكر فيه


تعالو كلنا نحكي شو حابين نعمل بحياتنا؟؟

حابب اعمل اشياء كتير ومنها اني اكمل تعليمي


شو هدفنا؟؟؟ شو ناويين نقرر؟؟

هدفي متل ما قررت اول اني اكمل تعليمي في المجال الي بحلم فيه


شو بدنا ندرس؟؟ ووين؟؟ وكيف؟؟ وليش؟؟

حابب ادرس اداره اعمال ..بالجامعه العبريه ومش ضروري فيها باي جامعه المهم اتعلمها
لاني حببها هاي الشغله من زمان





وكيف رح تستغل شبابك القادم؟؟

بالتعليم والشغل عشان اقدر ابني حالي

رح تبلش حياتك صح؟؟

اشي اكيد


ولا لهلأ مش عارف ليش انتة عايش؟؟

لا الحمدلله عارف وبعرف كيف راح ابلش طريقي


مشكورة كتير على الموضوع
والاسئله الحلوة

[زهرة الأقصى]

كتير منيح يا قناص انه الواحد يكون عنده هدف بحياته وانا بنصحك ما تتخلى عنه
وتخصصك كتير حلو ومتاح تقريبا بكل الجامعات هون

بس الباقي علينا المعدل :d

الله يوفق الجميع

تسلم خيي على المشاركة الطيبة...

[محمد نخال]

اول شي كل الشكر الك اخت عبير على طرح هذا الموضوع المهم لكل طالب توجيهي ، واللي برأي لازم الطالب يبدا يفكر فيه قبل التوجيهي حتى يكون الهدف براسه ويسعى لتحقيقه ..

كل الطلاب الآن امام مفترق طرق ، الطريق الاول فيه سعادتهم وهناؤهم ، والثاني فيه التعاسة والشقاء الى ان يتداركه الله برحمته .

بالنسبة الي محتار بأكثر من تخصص وأكثر من جامعة ، فمن ناحية الميول " الرياضة ، الصحافة والإعلام ، هندسة كمبيوتر ، وممكن محاماه " اما الجامعات فمحتار سواء عربية او عبرية .

الصحافة والإعلام كثار شجعوني عليه وانا صراحة حابب هالتخصص بما انه بجمع بكثير شغلات انا بحبها وممكن اني ابدع فيها ، لكن البعض قالولي انه هالتخصص مجاله مش واسع كثير وما بطعمي خبز ! ، وغيرهم بحكولي انت داخل علمي علشان تدخل تخصص ادبي ! ، وهالتخصص اذا قررت واني ادرسها فكرت في بيرزيت ، وممكن تخصص غيره إعتماداً على نتيجة التوجيهي .

اما الجامعات العبرية فهي بشهادة اللي درس فيها أفضل من الجامعات العربية من عدة نواحي ، وعن نفسي ، انا بقول هيك كمان بس إذا فكرت واني ادخلها لازم ادرس البسيكومتري والله بعلم اذا من اول مرة اجيب العلامة اللي بتأهلني لأدخل التخصص اللي بدي اياه ، ويمكن احتاج محاولة ثانية وثالثة وما تزبط معي ، وأضيع سنين من عمري "هيك" ، وغير هيك تكلفتها عالية ومش الكل بيقدر يتحمل تكاليف الجامعات العبرية ،، عمي شجعني ادرس محاماه في الجامعة العبرية ، او هندسة في التخنيون مثل ما قلي خيال البلد ، الا اني متردد الى الآن ، لكن حتى ما اضيع وقت ، رح اقدم طلب في بيرزيت وأخلي فكرة الجامعة العبرية في راسي .....

ولسا القرار النهائي ما اخذته ، الا اني ناوي اكمل دراستي ان شاء الله ، وما اضيع شبابي في الشغل مثلاً او بشغلات ممكن يكون مستقبلي فيها مجهول ومظلم ، حابب اقدم شي مفيد لديني وبلدي ولنفسي طبعاً ، ومهما يكون المال مهم في حياتنا ، الا انه بنظري التعليم أهم ...

وكل الشكر والتقدير مرة اخرى اخت عبير .. ويا ريت تحكيلنا شو حابة تتخصصي يمكن نقدر نساعدك :--)

[زهرة الأقصى]

بدك رأيي خيي نخال الصحافة تخصص حلو كتير ممكن تبدع فيه
وعلى قصة انه "ما بطعمي خبز" اصلا بطل في اشي عنا بطعمي خبز سواء كنت صحفي ولا استاز كبير ولا مدير مدرسة بحالها الوضع عنا مش ماشي مع جميع الفئات الا الي بدو يشتغل مع اليهود... وهادا برجع الك
وحسب ما الكل بنصحني انه ازا حابة افوت تخصص "ما بطعمي خبز" اني ما اخلص البكالوريوس واوقف لازم اكمل ولما احصل على شهادة اعلى بيصير وقتها الشغل متاح بأكتر من مجال وبشكل اعلى من اول... وكمان هادا برجعلك
واما بالنسبة لأنك داخل علمي مش شرط تكمل في تخصص علمي ازا كانت هاي رغبتك .. المهم انتة شو بدك
وبالنسبة للجامعة فقدم طلبات بكل الجامعات ولما تيجي الموافقة بتقرر بأي وحدة ... بالمناسبة ازا حابب تقدم لبيرزيت هيهم نزلو اعلان بالجريدة انهم بلشو يستلمو الطلبات
ونصيحة اخيرة... -هاي النصيحة مصدرها امي- انه لو فتنا اي تخصص واكتشفنا انه مش مناسب لإلنا مش نهاية المطاف ، بنقدر نشد حالنا ونجيب علامة منيحة تأهلنا لنحول للكلية الي بدنا اياها.. المهم انه يكون هدفنا واحد..."نتعلم"

اما بالنسبة الي.... الصراحة اخوي نخال من وقت ما كتبت الموضوع واهلي عمالهم بساعدوني اوصل للي بدي اياه والاهم انه موضوع خالتي ام زيد "كيف تختار تخصصك الجامعي" ساعدني اكتر والحمدلله مبارح بس وصلت للتخصص المناسب وبتوقع انه عنجد هادا الي بدي اياه
اسمه "دكتور صيدلة" بأهلني اشتغل بمستشفيات.. وهادا الي بدي اياه لاني كنت رافضة ادرس طب بشري عشان التشريح والعمليات والقصص هاي بس دكتور صيدلة كتير اخف من هيك
وبالمقابل كنت رافضة ادرس صيدلة.. عشان اخرتي اشتغل بصيدلية
بس الحمد لله اني وصلت........!
بتشكرك عالمشاركة...