خلصناااااااااااااا ..... الى طلاب التوجيهي

[محمد نخال]

السلام عليكم ورحمة الله وبركاته

الى كل طلاب التوجيهي

ادخلوا وعبروا عن شعوركم بتقديم آآآآآخر امتحان وإنهاء مرحلة التوجيهي

بالإضافة الى كم سؤال أرجو الإجابة عليها :

1_ كيف كانت همتك لأول إمتحان وزاري ، وكيف قدمت فيه ؟:noway:

2_ شو أصعب إمتحان قدمته :angry:؟ وشو أسهل امتحان :woohehe:؟

3_ هل خايف من مادة تكمل فيها "لا سمح الله" واذا في ، شو هي ؟ :36_11_20:

4_ بكل صراحة .. قدرت تغش بالإمتحانات او تغشش :=D:؟ وهل صدف وانو المراقب مسكك وانت تغش :bringitout:، وضحلنا موقفك ؟

5_ موقف طريف صار معك في القاعة ؟ احكيلنا اياه :bingo:

6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ وشو رأيك فيهم ؟ :hmmm:

7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟ :36_13_3:

8_ هل فعلاً التوجيهي يقيّم مستوى الطالب الحقيقي ؟ :goodjob:

9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟ :haix:

10_ كم بتتوقع نسبة معدلك مثلا (من 70-80) " واللي بتوقع بالزبط الو وسام " ؟:touched:

وأي شي بخطر على بالكم ، اكتبوه هون ..



لي عودة للمشاركة بما اني طالب توجيهي :haix:

تحياااااااتي

:36_3_11:

[SoFt G!rL]

أول اشي بحكي

أشهد ان لا اله الا الله:d

أكيد مبسوطه كتير وزي كأنو كنت حامله جبل عكتافي وهلأ راح بس التوتر هلأ لما الواحد يستنا النتيجه

الله ينجح كل الطلاب

ومبروك اول اشي الي ولكل الطلاب الي خلصو امتحانات وبالتوفيق

ومشكور محمد وموفق

‏ ‏


كانت هنا

احدى ضحايا التوجيهي :p

[أبو عدي]

السلام عليكم ورحمة الله وبركاته

بسم الله الرحمن الرحيم


اخي نخال اشكرك جزيل الشكر على اهتمامك وأدائك الرائع

بعد مشــوار طوــيل جـدا دام 12 سنـة من النجاح والتفوق لكل طالب وطالبه
اتمنى ان تكون هذه السنه سنه مميزة ومرضيه للجميع بالنسبه للنتايج الي اكـيد
راح ترفع كل راس طالب وطالبه قدمو بكل تميز واداء رائع بالامتحانات
واسال الله النـجاح فقـط


1_ كيف كانت همتك لأول إمتحان وزاري ، وكيف قدمت فيه ؟

كـان بمستوى كتير سهـل _اللغه العربيه

2_ شو أصعب إمتحان قدمته ؟ وشو أسهل امتحان ؟

اصعـب امتحان شي معروف التكنولوجيا ..واسهل امتحان
العربي والانجلش

3_ هل خايف من مادة تكمل فيها "لا سمح الله" واذا في ، شو هي ؟

كنت خايف من الاقتصاد بس ان شاء لله لا
النجاح فقط

4_ بكل صراحة .. قدرت تغش بالإمتحانات او تغشش ؟

اها اشي اكيد مرقت علينا ايام بالامتحانات غشينا لقلنا بكفي ههه


5_ موقف طريف صار معك في القاعة ؟

اممم مع واحد صاحبي غششني بس طريقه حلوة كتير
وفي مرة من الايام انمستك بغش بشغلات صغيره بس صعبه كانت
امم بس الحمدلله ما عملو شي سماح اول مرة ههههه


6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟

لا انا الي بقدمه بالامتحان بقوله عادي

7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟

لا كنا ندرس والحمدلله

8_ هل فعلاً التوجيهي يقيّم مستواك الحقيقي ؟

اها احيانا

9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟

الحمدلله وان شاء الله ربنا بيسرها

10_ كم بتتوقع معدلك " واللي بتوقع صح الو وسام " ؟

الله واعلم
النجاح وما بدنا الوسام هههههه
احلى نخالو


يسلمو على الموضوع
وان شاء الله النجاح للجميع باذن الله

[حنظله]

السلام عليكم ورحمة الله وبركاته

وعليكم السلام ورحمة الله وبركاته
الى كل طلاب التوجيهي

وانتا معنا دربالك

ادخلوا وعبروا عن شعوركم بتقديم آآآآآخر امتحان وإنهاء مرحلة التوجيهي

من ناحية التعبير بكفي انها مرحله بتسبب ضغط نفسي ما بمر عليك زيه في فترة حياتك :36_17_3:


1_ كيف كانت همتك لأول إمتحان وزاري ، وكيف قدمت فيه ؟:noway:
أول امتحان فش في همه بتكون رهبه وتوتر غير شكل:swt: وبعد الامتحان الأول خلص بتسير عادي , والحمد الله قدمت منيح في

2_ شو أصعب إمتحان قدمته :angry:؟ وشو أسهل امتحان :woohehe:؟
تقريباً التكنولوجيا مع انو الاسئله من الكتاب بس الطلاب ما درسوا بشكل المطلوب , وأهون امتحانات الدين والاقتصاد والثقافه

3_ هل خايف من مادة تكمل فيها "لا سمح الله" واذا في ، شو هي ؟
الله اعلم بس ان شاء الله خير:36_11_20:

4_ بكل صراحة .. قدرت تغش بالإمتحانات او تغشش :=D:؟
من ناحية الغش انتا وحظك اذا اجه عليك مراقب من الختايره العتكيه والي سنهم فوق 45 سنه :36_6_2:,اذا الوحي كان بدو ينزل عليك منهم ببطل ينزل
وبعدين انا فش احدى اغش منو كلهم بغششهم إلا اذا اجاك مراقب بكون بدرس نفس الماده الي بتقدمها بساعد شوي اذا شاف الطالب دارس :bringitout:
وهل صدف وانو المراقب مسكك وانت تغش :bringitout:، وضحلنا موقفك ؟
انمسكنا كثير واحنا منغشش وموقفي عادي كل ما يحكيلي عيساوي خلص:crywithno:
عيساوي بسحب دفترك بقله روح توكل على الله العالم وصلت القمر واحنا
منعاني من التوجيهي وهو فش غيري كمان :noway:



5_ موقف طريف صار معك في القاعة ؟ احكيلنا ايا :bingo:
مواقف كثير كان اغلب الامتحنات اكون اجوب وانا فارط ضحك عندنا طالب بيعها مش نواي ينجح :36_7_8: كان يضل حاطط نكرو بالمراقبين ومحسوبك مكضيها ضحك عليه:36_1_1:
6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ :hmmm:
زي ما بتكول بعض الشيء في التجريبي كانت همتي اكبر :36_7_16:
7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟ :36_13_3:
كنت استغله بشكل جيد ما كنت اضغط حالي كثير , بس الثقافه درستها منييح منشان التخيير بينها وين التكنولوجيا:36_13_3:
8_ هل فعلاً التوجيهي يقيّم مستوى الطالب الحقيقي ؟ :goodjob:
امتحان التوجيهي في ظلم كثير يعني احياناً الطالب بكون مبدع في المواد ومعدله وصل الثمنينات بتجي ماده بتكون عليه صعبه بترسبو
واحياناً بتلاكي طالب ناجح في كل المواد وجايب في الخمسينات
يعني طالب المعدلو في الثمنينات بسقط والي في الخمسينات بنجح , وفي قاعة بكون فيهم غش وقاعة ما بكون فيهم

9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟ :haix:
لا معامله لا ريب فيها:36_3_3: ولم يسألوني ما في احسن من كلمة الحمد الله ان شاء الله خير
10_ كم بتتوقع معدلك " واللي بتوقع صح الو وسام " ؟:touched:
الي من الله يا محله خليها على التواكيل


تحياتي نخال على موضوعك الروعه

وان شاء الله ما بضيع تعب لحده

[SoFt G!rL]

رجعت أجاوب على الاسئلة

1_ كيف كانت همتك لأول إمتحان وزاري ، وكيف قدمت فيه ؟:noway:


والله الصراحة كنت متوترة وخايفة وغلطت غلطات مش لازم اغلطها بس بضللو هيبتو والحمد الله :D

2_ شو أصعب إمتحان قدمته :angry:؟ وشو أسهل امتحان :woohehe:؟

اكييييييييييييييييد اصعب امتحان التكنولوجيا

اسهل اشي كان الادارة والاقتصاد والدين


3_ هل خايف من مادة تكمل فيها "لا سمح الله" واذا في ، شو هي ؟ :36_11_20:

..... مش متوقعة الله لا يقدر كلوو قدمت منيح


4_ بكل صراحة .. قدرت تغش بالإمتحانات او تغشش :=D:؟ وهل صدف وانو المراقب مسكك وانت تغش :bringitout:، وضحلنا موقفك ؟

ههههههه غشيت وغششت بس مش هالغش الرهيب كلمة كلمتين او ضعي دائرة مش اكتر انمكست بس قللولي راسك لقدام هههه


5_ موقف طريف صار معك في القاعة ؟ احكيلنا اياه :bingo:
نسيت هويتي والبطاقة واتشرشحت ومرة خلصت امتحان القضايا وفضو القلميين وكتبت بقلم تانية خلوني اعدي الدفتر وانهريت يومها

6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ :hmmm:

لا بالعكس

7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟ :36_13_3:

بضل من الخمسة ونص الصبح لل 10 او 11 بالليل وبطفي لانه بخلصو بطرياتي


8_ هل فعلاً التوجيهي يقيّم مستوى الطالب الحقيقي ؟ :goodjob:

مش دايما بصراحة

9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟ :haix:
عمري ما اتدللت كد ما اتدللت وانا بقدم امتحانات كلشي بيجي عندي وانا كاعدة عالتخت وكلهم بردو عليي اتمنيت اضل اقدم امتحانات بهداك الوقت محدا كان يقلي لا هههه
ههههه هاد السؤال بنسأله قبل ما اقول مرحبا بس الجواب دايما ماشي الحال :36_11_20:


10_ كم بتتوقع معدلك " واللي بتوقع صح الو وسام " ؟:touched:

بصراحة حلمت كديش بدي اجيب ومتوقعة هيك بس خايفة احكي ويطلع اقل خليي توقع وبدنااش هالوسام ههه

[ДŁ-мoĐąмЄR]

1_ كيف كانت همتك لأول إمتحان وزاري ، وكيف قدمت فيه ؟:noway:
الحمدلله منيح

2_ شو أصعب إمتحان قدمته :angry:؟ وشو أسهل امتحان :woohehe:؟
تكنولوجيا اكيد..اسهل مادة دين


3_ هل خايف من مادة تكمل فيها "لا سمح الله" واذا في ، شو هي ؟ :36_11_20:
الله لا يقدر

4_ بكل صراحة .. قدرت تغش بالإمتحانات او تغشش :=D:؟ وهل صدف وانو المراقب مسكك وانت تغش :bringitout:، وضحلنا موقفك ؟
غشينا وغششنا وانزكطنا مممم كانوا يغيروا محلي بس

5_ موقف طريف صار معك في القاعة ؟ احكيلنا اياه :bingo:
لما وزعوا الدفاتر عبيت كلشي من اسم ورقم جلوس واسم المادة وفتحت الدفتر لكيت اول 4 صفحات مش مسطرات راحوا بدللولي اياه صرت اضحك

6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ :hmmm:
لااا

7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟ :36_13_3:
لا كنت استغل الوقت قدر المستطاع بلاش الوقت يخنكني

8_ هل فعلاً التوجيهي يقيّم مستوى الطالب الحقيقي ؟ :goodjob:
مش دايما..لانو امرات الواحد بكون موكل المادة اكل بجيبو اسئلة استنتاجية...يعني حظ

9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟ :haix:
على كيفك......كنت امير وكتها...*!*

10_ كم بتتوقع معدلك " واللي بتوقع صح الو وسام " ؟:touched:
الله اعلم...انشالله خير

وأي شي بخطر على بالكم ، اكتبوه هون ..

يسمننوووووو نخال روووعه

يا ريت تجاوب عليهم انت...

[محمد نخال]

والله وهلا بطلاب التوجيهي ..
ايوا اطلعوا من جحوركم خلونا نشوفكم ، المنتدى اشتاق لطلتكم ، (وانا معكم طبعاً)

فعلاً شعور اليوم هو مزيج من عدة احاسيس ، ولعل اكثر هذه الأحاسيس تأثيراً هو الفرح الممزوج بشئء من الخوف ، الفرح بإنهاء هذه المرحلة والخوف والقلق من النتيجة ..

طلاب التوجيهي حوالي 140 ، اطلعوا وبانوا وفضفضوا عن شعوركم خلونا نتشاركها سوا ، مرحلة تقديم الإمتحانات والدراسة خلصت ، المرحلة الجاي مرحلة نفسية نحنا بحاجة لمن يدعمنا فيها ، والكلام والكتابة بتخفف شوي من هذا الشعور ......

وما بنقول الا الله يجيب اللي فيه الخير ..

ان شاء الله ربنا يكون النجاح حليف الكل ..

وشكراً قناص فلسطين ، وسوف جيرل ، وحنضلة ، والمدمر ، على مشاركتكم المميزة واكيد ليكم عودة ^_*

وانا لي عودة بكتابة الأجوبة ، لكن بيني وبينكم اشتقت لكرة القدم ، واليوم من حظي في مباراة ، بدي اروح اقابل معشوقتي :36_3_4:

لي عودة

[سيدرا]

مشكور نخال ع الموضوع الحلو والمتميز دالما

وموفقين يا شباب ان شالله الكل ينجح يا رب وبتفوق كمان

يعني اوطا معدل السنه يكون 95 هههههه
شو رايكم امانه ما انا منيحه

تحياتي

سيدرا

[Messi.3la2]

وأخيرا بعد نحت وتعب وجهد ، وسهر العيون طول السنة ،
بختتموا طلاب التوجيهي في فلسطين ( الضفة الغربية وقطاع وغزة ) مسيرتهم الدراسية اليوم الاربعاء ، واحد تموز 2009 .

اليوم يوم مهم كتير عند طلاب التوجيهي - الثانوية العامة - ، وهو يوم بعتبروا اليوم الفاصل بين الحياة والمدرسة ،اليوم بعد ما يخلصوا من تقديم اخر امتحان راح يطلعوا فرحانين من انهم خلصوا مدرسة ورح ينتقلوا على مرحلة مهمة جديدة بحياتهم وهي المرحلة الجامعية .

وان شالله يا رب تتكمل فرحتكم بالنجاح بعد ما تطلع النتائج ، نتائج امتحانات التوجيهي الثانوية العامة ,من وزارة التربية والتعليم العالي ، اللي الاغلب بتوقع موعدها في نص شهر تموز كالعادة .

[محمد نخال]

ههههههههههه سيدرا مش طالبة شي كثير ، لكن ان شاء الله يطلع من العيساوية هيك معدلات ، وبتوقع هالسنة في ان شاء الله

والشكر للأخ ميسي علاء على الخبر الموجز عن هذا اليوم التاريخي ، وأتمنى لك التوفيق والتفوق في مسيرتك "التوجيهية" العام القادم

اما بالنسبة للأسالة

_ كيف كانت همتك لأول إمتحان وزاري ، وكيف قدمت فيه ؟

أول إمتحان شي طبيعي يكون الطالب خايف ، لكن هالخوف بيتبدد مع اول نصف ساعة من بادية الإمتحان ، والهمة بأول إمتحان بتكون عالية ثم تدريجياً تتناقص حتى آخر امتحان ( وهذا اللي صار معي ) ، ومعظم الغلطات في إمتحاني الأول كانت في أسالة القواعد اللي زقوها في إمتحان المطالعة ! ،، لكن الحمد لله ...

2_ شو أصعب إمتحان قدمته ؟ وشو أسهل امتحان ؟

بخالفكم الراي بالنسبة لأصعب امتحان ، لانه التكنولوجيا ولا شي بالنسبة للفيزيا اللي جابولنا اياه هالسنة ، والجلسة الأولى رياضيات اتصعبت منها شوي .. أسهل إمتحان الدين والإدارة

3_ هل خايف من مادة تكمل فيها "لا سمح الله" واذا في ، شو هي ؟

والله هالشعور بروادني أحياناً وانا بقدم في الإمتحان ، لما ما يضل غير نص ساعة ولسا بكون ضل علي سؤال كامل او كم فرع مش حاللهم ، لكن الحمد لله بعد ما اطلع من الإمتحان بحسب علاماتي وبنجاوب الأسالة مع هالشباب وبنطلع ناجحين :--)

4_ بكل صراحة .. قدرت تغش بالإمتحانات او تغشش ؟ وهل صدف وانو المراقب مسكك وانت تغش ، وضحلنا موقفك ؟

انا مقتنع انو هالشغلة ما اسمها غش ، بسميها "مساعدة" ، يعني مثلاً بكون ناسي قانون بالفيزيا او مش متأكد منه ، بسال صاحبي علشان أتأكد ، لانه احياناً قانون واحد بترتب عليه سؤال كامل بأفرعه وبكون عليه علامات محرزة ، وهالشي بصير قدام المراقب حسب طيبة قلبه ههههههه ، يعني المساعدة اللي كنت اخذها او اعطيها مجرد رؤوس أقلام اللي تساعدك تحل باقي السؤال او اتذكرك بجواب سؤال كنت ناسيه .
والمراقبين بالعادة لما يمسكو ثنين بغشو بصرخوا وبهددوا واحد منهم ، فأنا لحسن حظي وسوء حظ اللي جنبي بشرد من البهدلة واللي جنبي بياكلها ، او مرات ثانية المراقب بجحرني فأنا بصير اتبسملو خلي يروق شوي هههههههههه .

5_ موقف طريف صار معك في القاعة ؟ احكيلنا اياه

في إمتحان العربي الجلسة الثانية ، بتعرفوا في سؤال إنشاء ، فالطالب بالعادة بخليه لآخر شي ، وفعلاً هاد اللي عملته ، ضل معي حوالي ثلث ساعة ، بديت أكتب بالمسودة ، فأنا لما اكتب بنسجم مع اللي بكتبو وبتفاعل وبنسى الوقت علما اني كتبت عن "واعتصموا بحبل الله جميعا ولا تفرقوا"، فخلصت من كتابة المسودة ، الا المراقب الله يرضى عليه ويبشره بالخير ، بقلي ضل 5 دقايق ، وانا لسا ما بيضت الموضوع ، فبديت وبأقصى سرعة اكتب وبخط بدعي يا رب يفهموا شو كتبت ( انا خطي لا يعلا عليه على فكرة ههههههههههه) ، فالشباب بلشوا يطلعوا واحد ورا الثاني ، حضرتي قاعد اول درج بطلع وراي القاعة فاضية ! ، فش ولا طالب !!، والمراقبين (مراقبين اثنين) فوق راسي بحكولي سلم الدفتر ، وانا ابداً ، مش مسلم دفتري الا لأخلص الموضوع ، وفعلاً طلعوا المراقبين برا القاعة ونفذوا تهديدهم ، طبعاً بعد ما يئسوا مني وانا كل شوي احكيلهم " آخر سطر ، آخر كلمة ، آخر حرف" وهو في الحقيقة كان ضايل علي جزء من الخاتمة ، فلما خلصتها قدرت الحقهم واسلمهم الدفتر بعد ثواني من خروجهم من القاعة ههههههه ، طبعاً كنت اكتب بمعدل 5 كلمة/ث ، وبدعي مرة ثانية وبتمنى يفهموا على خطي !! ...

هالموقف ما كان طريف بالنسبة الي وقتها ، لاني وقتها حسيت بضغط كبير وكنت في صراع مع الوقت ، لكن هو أكيد طريف بالنسبة للي بحكيلو اياه ، وكذكرى طريفة بخزنها في ذاكرتي لما أفكر اني اتذكر التوجيهي من جديد !!!

6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ وشو رأيك فيهم ؟

لا مش منهم ، الا انه ممكن يكون معهم حق بهالشي ، لانه الطالب اذا طلع مقدم كويس في الإمتحان ويحكي للكل انه مزبط وعلامة عالية ، وطلعت النتيجة على عكس ما توقع ، رح يكون احباط اله وللي حكالهم ويمكن يتهكموا عليه ، فالواحد يطلع من الإمتحان يحكي الحمد لله واللي من الله يا محلاه :--) ، وأحياناً العكس الطالب ما بكون مزبط وبحكي للكل انه قدم كويس ، فهذا الطالب بحزن عليه يوم النتائج !!

7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟

صراحة انا بعد كل إمتحان نفسيتي ما بتكون مهياة للدراسة ، اول ما اروح بنام ، ولما اصحى بدرس شي بسيط جداً ممكن درس او درسين ، ثاني يوم بضغط حالي من الصبح للساعة 12 ، واللي بضل علي بصحى الصبح بكمله وفي الباص طبعاً ، وقبل ما ادخل القاعة ، وأحياناً كنت اضلني برا القاعة بعد ما يوزعوا الوراق علشان ادخل على الإمتحان وانا مخلص المادة ! وبدخل بعد مدة اقصاها ربع ساعة يعني 9:15.. ، وبعض المواد كنت اروح مش مخلصها ، ولحسن حظي يجيني فرع من سؤال فبحذفوا .. :--)

8_ هل فعلاً التوجيهي يقيّم مستوى الطالب الحقيقي ؟

لا ، ليس المستوى الحقيقي ، فترة الإمتحانات ممكن يصير شي يأثر على نفسية الطالب ، وما يقدر يدرس كويس للإمتحانات ، ولكنه يقيم الجزء الأكبر من مستوى الطالب

9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟

طبعاً لولا الأهل التوجيهي بزبطش ، الأهل اللي بوفروا الهدوء والجو الدراسي ، وغير هيك تشجيعهم وعروضاتهم المنحصرة بحرف الشرط "إذا" يليها كلمة "نجحت" والعرض اللي بدهم اياه ، ولما يسالوني السؤال المشهور ، انا بجوابهم جوابي المشهور " الحمد لله ، إن شاء الله بنجح" ، والله يخليهم أهلي ما قصروا ومعي ، واختي lady lady الله يرضى عليها ، كانت تساعدني بشغلات ما اكون فاهمها ، مع انها كانت بعد كل امتحان تجاوبلي الأسالة واطلعلي غلطات من تحت الأرض ههههههه

10_ كم بتتوقع نسبة معدلك مثلا (من 70-80) " واللي بتوقع بالزبط الو وسام " ؟

مممممم بين الـ 75-85 ..
وممكن نفس معدلي في المدرسة 82.3 " إذا طلع توقعي مزبوط الجائزة عليكم ههههههههه "


شكراً نخال على الأسالة :hi:

تحياتي

[همسة الاحساس]

مرحبا
يعطيكم ألف ألف عافية على جهودكم وتعبكم
والحمد لله على سلامة كل طالب توجيهي هههه نجى من هذا الكااابوس ومن دمار وعذاب التوجيهي ههه:)
وألف مبرووووك لانكم خلصتوا بالسلامة
وعقبال ما تقابلو الكابوس الأخييير اللي هو نتيجة التوجيهي هههههه
وياااا رب الكل ينجح وتكتمل الفرحة

وعقبااااااال عندنا :36_11_20:
ومشكووور خيو نخال وبتمنالك النجاح انت وكل طلاب وطالبات التوجيهي من كل قلبي
تحياتي
همسة الاحساس

[محمد هيثم]

وعليكم السلام ورحمة الله وبركاته

شكرا الك حبيبي ابو حميد

اسمع وشاهد بتمعن هههههههه


1_ كيف كانت همتك لأول إمتحان وزاري ، وكيف قدمت فيه ؟

اكثر امتحان درستو منيح


2_ شو أصعب إمتحان قدمته ؟ وشو أسهل امتحان ؟

الاصعب: تكنولوجيا(كاتب الاسئله كانت متجليه معو)
الاسهل:التربيه الاسلاميه(الله يارب يناولك اللي بدك اياه يا كاتب الاسئله)

3_ هل خايف من مادة تكمل فيها "لا سمح الله" واذا في ، شو هي ؟

كنت خايف من التكنولوجيا ....... بس محمد نخال رفعلي معنوياتي حسبت العلامه لاقيتها الحمد لله ناجح


4_ بكل صراحة .. قدرت تغش بالإمتحانات او تغشش ؟ وهل صدف وانو المراقب مسكك وانت تغش ، وضحلنا موقفك ؟

اوووووووووووووووووووووووووووووووووف لا تعد
كنا نعملها ورقه عمل
انزقطنا واشي طبيعي نبطل ولما يدير والمراقب وجهه وكأن شيئا لم يكن


5_ موقف طريف صار معك في القاعة ؟ احكيلنا اياه

اجانا مراقب شديد جدا ما يخلي حدا يلف وجهه في اواخر الامتحان بدا يفتخر بحالو انا وانا وانا
وبدا يحكيلنا عن ايام بطولاته حسينا حالنا بفلم هندي المهم صار يحكي انا براقب 30 واحد لحالي وما حدا بيقدر يغش ومن هالحكي ما بعرف كيف حكيتلو(استاذ مع احترامي الك ولمراقبتك بس بدي احكيلك انو اقدرنا نغش...)
وطالب تاني صار يسأله(ان شاء الله بدك تراقب علينا بالاكمال !!!!!!!!!!!)




6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ وشو رأيك فيهم ؟

اكيييييييييييييييد , هادول هم طلبه العلم وبس
خخخخخخخخخ

7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟

للأسف حالي متل حالك نخال , اول يوم ما بعرف ادرس بس تاني يوم بشد حالي وبحاول اخلص
وللاسف ما رحت على امتحان مخلص الماده




8_ هل فعلاً التوجيهي يقيّم مستوى الطالب الحقيقي ؟

التوجيهي يعمل على تجهيل الأمه يعني معلومات مدسوسه وسياسه تجهيل حقيقيه



9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟

كيف قدمت , كيف التوجيهي معك ؟؟؟؟
الجواب الاشهر...الحمد لله منيح

10_ كم بتتوقع نسبة معدلك مثلا (من 70-80) " واللي بتوقع بالزبط الو وسام " ؟

بلا وسام بلا هم المهم ننجح

[هدايه]

أول اشي بتأسف على تأخري

وتاني شي يسلمو محمد نخال علموضوع الحلو
يلا انبلش ههههههههه


1_ كيف كانت همتك لأول إمتحان وزاري ، وكيف قدمت فيه ؟:noway:
بالنسبه لاول امتحان الحمدالله الهمه عاليه كانت ودراسه بجد من كل قلبي كانت والحمدالله قدمنا بس اتفجئت انو اكتريت المطالعه كان قواعد وهيك بس الحمدالله وان شاء الله بقدم منيح انا وكل طلاب التوجيهي



2_ شو أصعب إمتحان قدمته :angry:؟ وشو أسهل امتحان :woohehe:؟
اصعب امتحان كان التكنولوجيا واسهل امتحان كان هو الاداره ههه بجد بحكي



3_ هل خايف من مادة تكمل فيها "لا سمح الله" واذا في ، شو هي ؟ :36_11_20:
امممم خايفه كتير وخصوصا من الانجليزي والتاريخ بس ان شاء الله يكون خوفي مش بمحلو واكون من النجحين بأذن الله



4_ بكل صراحة .. قدرت تغش بالإمتحانات او تغشش :=D:؟ وهل صدف وانو المراقب مسكك وانت تغش :bringitout:، وضحلنا موقفك ؟
ههههههه الصراحه راحه اه غششنا هههه نو ما كانت تسوي شي عادي ما يحكو اشي بس يجو ويوقفو جمبنا ههههه عشان ما نغشش ولا نغش


5_ موقف طريف صار معك في القاعة ؟ احكيلنا اياه :bingo:
امممم كان علينا امتحان انجليزي ومعلمتين طبعا براقبو وفي اشي مش عرفتو جمله مش عارفه احلها هههههه بحكي مش عارفه احلها فهمتني بنت كيف بحكيلها نقليني اياها ههههه نقلتني اياها اخر اشي بتقلي المراقبه خلص نقلتيها يلا روحي هههههه



6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ وشو رأيك فيهم ؟ :hmmm:
لا طبعا

7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟ :36_13_3:
الصراحه مش دايما الامتحان الي بكونلو يومين بدرس باليومين مش لمني ارجع كنت ارجع ارتاح وهيك والصراحه هلشي غلط ولازم كنت استغليت كل دقيقه


8_ هل فعلاً التوجيهي يقيّم مستوى الطالب الحقيقي ؟
ممم مو دايما في طلاب بكونو ممتازين باشياء تانيه بس بطرو يقدمو توجيهي مشان يقدرو يدرسو الي راح يكونو ممتازين فيه يعني مش تقييم لمستوى الحقيقي



9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟ :haix:
هيهي والله الاهل كل شوي ادرسي توجيهي هههه بس كنت اطنشهم اوه عال عال الحمدالله كان يكون جوابي


10_ كم بتتوقع نسبة معدلك مثلا (من 70-80) " واللي بتوقع بالزبط الو وسام " ؟:touched:

هههههه هلاشي ما بقدر احددو

وأي شي بخطر على بالكم ، اكتبوه هون ..


محمد نخال بشكرك علموضوع الرائع وحابه انصح الطلاب الي راح يقبلو علتوجيهي السنه انو ما يضيعو اي دقيقه من وقتهم ويدرسو كلشي بيخدوه اول بأول وما يراكمو عليهم الدروس

وبحكي انو الحمدالله خلصنا التوجيهي ومنتأمل من الله انو ينجح كل الطلاب والطالبات السنه

تحياتي

[زهرة الأقصى]

السلام عليكم ورحمة الله وبركاته
وعليكم السلام ورحمة الله وبركاته :hi::hi:
الى كل طلاب التوجيهي
قصدك الي طلاب التوجيعي :D
ادخلوا وعبروا عن شعوركم بتقديم آآآآآخر امتحان وإنهاء مرحلة التوجيهي
شعورااات مش شعور واحد يمكن فرح على خوف على قلق على فخر على كلشي :36_11_20:
بالإضافة الى كم سؤال أرجو الإجابة عليها :
تكرم
1_ كيف كانت همتك لأول إمتحان وزاري ، وكيف قدمت فيه ؟
والله كانت دراسته صعبة متت فيه وبالاخر طلع كلو قواعد! وراحت علينا طبعا :36_13_11:
2_ شو أصعب إمتحان قدمته ؟ وشو أسهل امتحان ؟
اصعب امتحان الاحياء لاني ما كنت دارسة منيح واسهل امتحان الانجليزي والدين

3_ هل خايف من مادة تكمل فيها "لا سمح الله" واذا في ، شو هي ؟
حلوة والله اكون ناجحة بكلشي الا التكنولوجيا.. الله يستر :bringitout:
4_ بكل صراحة .. قدرت تغش بالإمتحانات او تغشش ؟ وهل صدف وانو المراقب مسكك وانت تغش ، وضحلنا موقفك ؟
هئ هئ هئ :o_o:
اجتلنا مديرة قاعة ما بتخلي البني ادم يتنفس لا احنا ولا المراقبات والمراقبات طلعو من النوع الي ما بضحك للرغيف السخن! :angry1:
وغش يلي بتقدر.. بس بصراحة بامتحان الكيميا كتبت قوانين الغازات على ايدي بلاش انساهم بس انمحو قبل ما اوصل السؤال!!
نيالكم!!!!!! :36_7_15:
5_ موقف طريف صار معك في القاعة ؟ احكيلنا اياه
لا كلو كان سمة بدن، والبنات كانو يفوتو عالقاعة زي الي فايتة على عزا.. فش غيري كنت افوت بضحك وبعمللهم جو ..بس اكئب من هيك عالم ما في.. بنزلولي من الامتحان لابسين وجههم بالمقلوب اي والله انها شغلة بتكئب.. ::
6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ وشو رأيك فيهم ؟
ولا مرة اخبي.. بكرا النتيجة بتنزل بالجريدة والي بأميركا رح يعرفو كيف مقدمة! والشهادة طبعا لازم تتصور وتتوزع نسخ على العيلة عشان يرفعو راسهم كيف لكان فخليني صادقة احسنلي :36_1_4:
7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟
كنت اضل اضيع وقتي لتصير الدنيا ليل وانا مش مخلصة وبعدين ابلش ادرس دراسة محترمة للصبح بس طبعا هاد الوضع بهلك :36_3_4:
8_ هل فعلاً التوجيهي يقيّم مستوى الطالب الحقيقي ؟
لا ولا مرة في كتير مرات رحت على الامتحان مش دارسة نص المادة تقريبا واقدم منيح زي الدين وفي مرات اروح ماكلة الكتاب اكل زي الكيميا واعجب
9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟
الله يبعتهم لكل طالب!!! كانو يتركوني على راحتي متل ما بدي ادرس لاني انا الي بعرف ازا هلأ انا بقدر ادرس او تعبانة وبالنهاية انا الي بتحمل المسؤولية مش همة .. ولونهم كانو يضغطو علي كان عجبت بالامتحانات هيك طبعا احسن
والاهم من هيك الوالد العزيز يخليلي اياه بدو ياخدني على عمااااان اطش :36_6_3: وبدون جملة الشرط الي كانت داااااااااايما على لسانهم "ازا جبتي بالتسعينات بدنا وبدنا.." بس طبعا ازا ما جبت بالتسعين رح يروح علي كتير اشياء :donwan:
بالنسبة للسؤال المشهور...جوابي اولها كان صريح بس لما قلتلهم اني زفتت بالتكنولوجيا انسم بدنهم وصارو بدهم يطخوني صرت اقلهم انا عملت الي علي والباقي على الله يا بجيبلنا مصلحين ولاد حلال يا اما.........!!!
10_ كم بتتوقع نسبة معدلك مثلا (من 70-80) " واللي بتوقع بالزبط الو وسام " ؟
متوقعة من 85-90 ادعوووولي اوصلها
وأي شي بخطر على بالكم ، اكتبوه هون ..
الله ينجحنااااا جميعا ااا
وشكرا الك محمد نخال.... :36_3_11:

[سواحرة دوت كوم]

_ كيف كانت همتك لأول إمتحان وزاري ، وكيف قدمت فيه ؟:noway:
خوف وتوتر وقلق ولكن يبدأ بالتلاشي تدريجيا
2_ شو أصعب إمتحان قدمته :angry:؟ وشو أسهل امتحان :woohehe:؟
تكنولوجيا فيزياء رياضيات جلسة اولى
3_ هل خايف من مادة تكمل فيها "لا سمح الله" واذا في ، شو هي ؟ :36_11_20:الله يستر من الاحياء

4_ بكل صراحة .. قدرت تغش بالإمتحانات او تغشش :=D:؟ وهل
طبعا ولكن حسب المراقب اذا كان شب فهو بساعدك اما اذا كان ختيار اكيد راح يسحب دفترك
صدف وانو المراقب مسكك وانت تغش :bringitout:، وضحلنا موقفك ؟
اشي اكيد خصوصا بالضع الدائرة و كان يضحكلي

5_ موقف طريف صار معك في القاعة ؟ احكيلنا اياه :bingo:
بالفيزياء ناديت على مراقب اعطيته قانون لصاحبي قعد يقلي طويل اعطيه اياه انت ههههههههههه

6_ بعض الطلاب بخفو أداءهم الحقيقي في الإمتحان ، انت منهم ولا لا ؟؟ وشو رأيك فيهم ؟ :hmmm:
انا بقول علامتي الحقيقية سواء كانت بالتسعين او بالخمسين

7_ هل كنت تستغل الوقت المخصص قبل كل امتحان لدراسته ، ولا بتخلي حالك لآخر وقت ؟؟ :36_13_3:
اه بس فش ارادة ض7

8_ هل فعلاً التوجيهي يقيّم مستوى الطالب الحقيقي ؟
طبعا لأ


9_ كيف كانت معاملة أهلك سواء وانت تدرس او بعد كل إمتحان ، وشو جوابك لما يسألوك السؤال المشهور " كيف قدمت!" ؟ :haix:
ادرس ادرس ادرس بقرفوك بهاي الكلمة من اول امتحان لاخره
10_ كم بتتوقع نسبة معدلك مثلا (من 70-80) " واللي بتوقع بالزبط الو وسام " ؟:touched:
69 بالضبط

ان شاء الجميع بنجح