:: الى ماذا تفتقر العيساوية ::

[ثائر ابو لبدة]

احمد : مسالخير يما ..

ام احمد : مسالنور يما كيف المدرسة ؟

احمد : انسينا يما من المدرسة هلا .. جعان اكتير اكتير حطيلي اكل ..

ام احمد : والله يما انزلت عالقدس اشتري اغراض وما طبخت ..

احمد : طيب شو بدي اكل انا هلا ..

ام احمد : روح يما خود خمسة شيكل من جيبة ابوك واشتريلك شغلة ..

احمد : ييي شو بدي اشتري يعني ؟

ام احمد : اشتريلك كعكة يما ساندويش فلافل شو بدك تشتري يعني ..

احمد : ييي ما بدي .. ما في بالعيساوية كلها مطعم شو هدا ..

ام احمد : يما روح اشتري ساندويش من عند داوود سندويشاتو زاكيين ..

احمد : بعرف زاكيين بس ما في غيرو .. ازهقت ..

ام احمد : طيب خلص روح هلا .. شو يعني بدك انزلك عالقدس اشتريلك وجبة شاورما من عند ابو العز !



وبعد هذا الروبورتاج ..


برأي احمد ان العيساوية تفتقر لوجود مطعم ..



http://kaheelaalmanaar.jeeran.com/52.gif


برأيكم انتم الى ماذا تفتقر العيساوية ؟

مطعم ؟ ممكن - محل ملابس ؟ ممكن - اماكن تواجد الشباب ؟ ممكن - خدمات عامة ؟ ممكن ..



اذا كنت مُقدم على عمل مشروع في العيساوية ..

فماذا يخطر على بالك ان تكون فكرة هذا المشروع وما هي الخدمات التي يقدمها ؟ ولماذا ؟



^
^
^


.. اعطوني ارائكم وافكاركم بخصوص هالموضوع ..








فكرة وكتابة : ابو وديع

تنسيق : محمد نخال

[محمد نخال]

نفتتح معاً إن شاء الله هذا النقاش

نقاشٍ هاديء بناء يصب في مصلحة القرية

بدأنا

بسم الله

[ابن فلسطين]

مرحبا


انا من ناحيتي البلد مش نقصها اشي من ناحية المطاعم لانو اذا بتتزكرو
يوم ما فتح محل البروست ما كانت موفيا معاه لانو بمشي


اما من ناحية الشباب شبابنا والعياذ بالله مش كلهم ها
يعني بتيجي بدك تفتح محل قهوة بسيرو يتكاتلو وسو مشاكل
ويلعبو كمار يعني بتسير سير صاحب المحل على اللسان الي بسوا والي ما بسوا
بتسير سمعتو بالارض
وانا من ناحيتي بكفي خليني افتح المجال لغير
ومشكورين على هالموضوع وعلى الصفحة الحلوة


ويعطيهم الف الف عافية

[محمد نخال]

أشكرك أخي ابن فلسطين على مشاركتك وإبدائك لرأيك

وبخصوص المطعم ، فهذا الروبرتاج كمثال ليس الا

تحياتي

[abu samra]

والله البلد ناقصها كتير اشياء
بس ما في عنا هل الناس الي بدها تطور البلد
للاسف هادا راي

[أ. خضر عبيد]

البلد بحاجة الى
منتدى ثقافي يحتوي على قاعات ومسرح ومكاتب استشارة يضم في داخله كل المتعلمين في القرية ومقر يسمى بنادي خريجي الجامعات

[عماد بوجه]

السلام عليكم
مشكور اخ نخال على الموضوع المهم والهادف
وأنا برأيي أن العيساويه تفتقر لمحبة اهل البلد لبعضهم البعض
والتكاتف والعمل يدا بيد وجنبا الى جنب في سبيل المصلحه العامه
واذا تحقق هذا الشيء أتحدى أن تفتقر العيساويه الى شئ؟؟؟؟؟؟؟؟؟؟؟؟؟
( اللهم ألف بين قلوبتا)

[STEEF]

انا بقول من ناحيت الشباب لازم نكون أيد وحده
**********************************

[ليل الهجر]

البلد ناقصهااااااااااااااااااا
انو نصير ايد وحده...وانو ما نحارب الناس اللي عم تنجح....ولا نحاربهم برزقهم...
يعني اخر فتره كتييييييييييييير محلات ومراكز وحتى بوتيكات عم تفتح...
بس للأسف مشوارها بالاغلب قصير....
بدنا نحب البلد...منشان البلد تحبنا....

ليل الهجر

[جرح الزمن]

مشكوور اخي ابو وديع على الكلمه الرائعه اللي ابديتها

البلد كتير نقصهاا اشياااء بس مستحيل تكمل الاا بوجود انااس مخلصين لبلدهم وقريتهم ممكن انو الواحد حابب يكون مسؤول كبير المشاريع اللي حابب تكون في القريه متل يعني مركز كبير ثقافي يضم اكبر عدد من الموهبين وكمان للي يحب يشارك بدورات ثقافيه تعليميه فكريه ... المهم يكون يعني في ايدي مساهمه في هذا المجااال
متل كتير اشياااء اذا بدي احكيها بفتح اكتر من صفحه وانا ما بدي ازغج اكتر برأيي للي بيقرؤا الرد .....

وممكن انو ينفتح مو مقهى شي تاني مش ضروري نطلع على السلبيااات
وهاد الشي كلو لصالح البلد .....

وشكرا لالك

تحياتي أمير الحب

[ندين]

البلد مو نقصها مراكز تعليمه ولا موؤسسات لانو المركز الجماهيري
في كتيير فعاليات وما بلاقي أقبال عليه
البلد نقصها اشياء معنويه متل حب الاخ والجار والصديق الحب بكل معانيه والاخلاص
والتعاون ع الخير ونمحي من عقولنا فكره الحقد والشر
بعدين لو بدنا نبني موؤسسات كان صار اسمها بدل قريه مدينه
وكان صارت مخيم بكل معنى الكلمه


مشكور ابو وديع ع الطرح
\
\
\

[SaNdRa]

الى ماذا تفتقر العيساوية ؟

بصراحة ما بظن انو العيساوية يعني الموجود عنا احسن بكتيير من الموجود عند غيرنا والحمد لله

بس مشكلتنا ما بنعرف نتعامل مع كل هالخدمات بالطريقة الصحيحة

يعني حتى المساجد الي هي بيوت الله اذا جيت تدخلها ما بتعرففف من كتر الشباب الي بيوقفو بجنبها وعاملين الطريق شارع صلاح الدين التاني

يعني بدنا بسسس نفكر كيف نستغل الموجود بدون ما نطلع شو الي عند غيرنا .. الي عنا بيكفي وزياده

والله يعطيك الف عافية اخي ابو وديع على الطرح القيم

[ياسمينة النهار]

العيساويه ايش ناقصها
احنا بنحكي ونشكي ونتذمر كتير والكل بيحط على بعضو
لو كل شخص عمل واجتهد من جهتو ما قلنا ايش ناقص
بس كلنا بنلوم بعض يعني اقل شي لو بنا نحلو حلنا ؟؟
بس اهل العيساويه بطالعو بعضهم البعض كتيير
يعني لما العيساوي يسكر على اخوه الطريق لحتى ما يمر ايش ضل
بدنا مطاعم وقهاوي ؟؟؟
بدنا اكتر من هيك
متل ما قالو من قبلي بدها محبه والفه واخوه
شكرا للمنتدى الذي اتاح لنا حرية الراي والاستماع الى مشاكل اهلو

[مغرمة القمر]

مطاعم في كتير ومش بحاجة بس في أشياء ناقصة عنا متل :

محل للتصوير يعني استديو ما في ومحل للذهب والفضة و مكتبة خصوصية للمجلات والقصص بس

تحياتي الك : مغرمة القمر

[مرجانه]

مرحبا
انا من رائي القريه بحاجه الى
1_ استديو تصوير
2_حديقه عام لاطفال البلد مرجيح
3_محلات بيع ملابس
4_مطاعم
5_فرن تاني وثالث
6_مكتبه
7_مراكز او مؤسسه لخدمات بشؤون الحالات الخاصه
واشياء كتير

[النائب ابو محمد]

السلام عليكم
تفتقر الى ناس شجاعة في اخذ القرارات والتصدي للمخططات الخبيثة وانا مع خضر انا بحاجة لمركز من هاي المراكز الي يضم المثقفين بس المثقفين الي عندهم القدرة والمسؤولية في اخذ وصياغة القرارات التي تصب في مصلحت القرية وناقصهة مراكز محو العنجهية والتفكير السلبي ولا منطقي والتعصبية القبالية وكثير من هل امور ووضع الانسان المناسب في المكان المناسب وشكرا اخوكم ابو محمد

[حنظله]

تفتقر العيساويه من القلوب الصافيه وحب الجار لاجاره تفقر من الواحده من اجل مصلحتها


حب لاخيك ما تحبه لنفسك

تأخو فالله


تحياتي:

[ثائر ابو لبدة]

انا بإعتقادي أن العيساوية تفتقر الى اماكن تواجد الشباب ..

فمثلا تفتقر للمكتبات .. للنوادي .. لأماكن تجمع الشباب .. للمقاهي ..

وأنا مؤيد للمدير خضر عبيد في طرحه أيضا ..

وسيكون في ايام قادمة اجمال لجميع الردود ..

تحياتي الكم والله يوفق الجميع .

[ثائر ابو لبدة]

استاذ خضر

العيساوية تحتاج الى منتدى ثقافي ومكان يجمع خريجي الجامعات ومتعلمي القرية ..

ولكن اين من يسعى لانشاء مثل هذا المنتدى ؟.؟.؟


امير المحبة

البلد ناقصه اشياء كثير ما بتم الا بوجود ناس مخلصين لبلدهم ..

والقرية محتاجة لمراكز ثقافية تضم موهبين البلد ..


عماد بوجه وليل الهجر وصطيف

العيساوية ناقصها توحد اهلها وشبابها وانهم يكونوا ايد وحدة !!!



لي عودة ..

تحياتي الكم والله يوفق الجميع .

[محمد نخال]

إذاً وكتلخيص لما تم طرحه حتى الآن فقد تكون لدينا نوعان من ما تفتقره العيساوية :-

النوع الأول وهو الشيء المادي المحسوس :- كمنتدى ثقافي ، مقهى ، محلات تصوير ، صايغ ، مكاتب ترفيهية تعليمية ، حديقة عامة .

اما النوع الثاني فهو من الناحية المعنوية :- كالإحترام المتبادل ( أحب لأخيك ما تحب لنفسك ) ، والتكاتف في المحن ، والعمل يداً بيد والإخلاص في هذا العمل ، الشجاعة في أخذ القرارت .

هذا لحد الآن ..

ولي عودة إن شاء الله

[العيساوي]

السلام عليكم
موضوع كبير ويحتاج الى الكثير

تحتاج العيساوية حسب رأيي الى :

العيساوية اولا تحتاج الى الرجل المناسب في المكان المناسب

تحتاج الى ان نستمع الى الافهم وليس الى الاقوى وذو الصلات

تحتاج الى ان نكف عن دس انوفنا في شؤون غيرنا ...

تحتاج الى ان نقف مع الصح جميعا ونجعل للخطأ نقطة يقف عندها ولا يستمر ...

نحتاج الى دعم المشاريع الناجحة والتي تحتاج الى دعم وليس دعم المشاريع التي اتخمت من كثرة الدعم الذي لا تحتاج اليه ...

وعلى ارض الواقع :


الى حديقة عامه خضراء تريح القلب والعين وتعيد لنا الشعور بالارض والهدوء النفسي بعد يوم عصيب

نحتاج الى مكان للاجتماع محايد غير تابع لفلان ولا علان حيث يستطيع كل اهل البلد ان يدخلوا متى شاؤوا ويجتمعوا متى يريدون

نحتاج الى بريد ...نعم بريد صناديق بريد ليش ما يكون عندنا بريد وقسم للبريد في البلد؟؟؟ شو ناقصنا احنا؟

نحتاج الى تخطيط للبلد بحيث يتم الاتفاق على ان تكون مساحه معينه مخصصة للبناء مساحه تبنى عليها عمارات سكنية مرتبة ومنظمة بدل ما كل واحد يحشر عمارة بين العمارات الموجودة ويضايق نفسة وغيرة ويحصر حريتهم ...



هذا ما لدي وان شاء الله تكون عودة اخرى للموضوع ...

[ebn_elquds]

السلام عليكم
انتو هادا الشاطرين فيه بدكم وبدكم وبدكم وبس يصير عندكم بتخربوا كل شي وما بدكم مصلحته الله يهديكم .

[ثائر ابو لبدة]

طيب ..

الاراء كثيرة ومختلفة ..

هلا وبعد ما قرأت ردودكم جميعا ..

انا لاحظت مثل اخوي محمد نخال ..

انكم انقسمتوا لفريقين ..



الفريق الاول : العيساوية تفتقر لأشياء مادية ..

الفريق الثاني : العيساوية تفتقر لأشياء معنوية ..



الفريق الاول : الاستاذ خضر عبيد

العيساوية تفتقر لمنتدى ثقافي وكل ما يتعلق بهذا المسمى ..

امير المحبة

العيساوية تفتقر مركز ثقافي .. يشبه طرح الاستاذ خضر مع اختلاف المسمى ..

مغرمة القمر

العيساوية تفتقر لاستيديو تصوير .. محل مجوهرات .. مكتبة ..

مرجانة

العيساوية تفتقر لاستيديو تصوير .. حديقة عامة لاطفال البلد .. محلات ملابس .. الخ ..





الفريق الثاني : عماد بوجه

العيساوية تفتقر لمحبة اهلها لبعضهم البعض ..

صطيف

الكل لازم يكونوا ايد وحدة ..

ليل الهجر

لازم نحب البلد علشان البلد تحبنا ..

ندين

الحب الاخلاص الخير والبعد عن الشر والحقد والكره ..

ساندرا

الرضا بما هو موجود واستغلاله الاستغلال الامثل ..

ياسمينة النهار

محبة والفة واخوة وما بدنا غير هيك ..

حنظلة

احب لأخيك ما تحب لنفسك ..




العيساوي

وقد جمع بين الجانب المادي والجانب المعنوي ..

[yaya]

انا شايفة انو العساسوة ايد وحدة

وبحبوا بعض وبخافوا على بعض

بس يا ريت انكم ما تحكوا انو فيه كره وحقد وما في حب

لانو هدا الحكي بشوه صورة العساسوة

وبعدين البلد لو ما كانوا ايد وحدة بس اكيد بخافوا على بعض

والعيساوية مثلا ناقصها محل اكسسوارات او مطعم راقي او روف للحفلات هيك شي


ابو وديع كاتب موفق ولك مستقبل في مجال الكتابة

محمد نخال تنسيق رائع

[ثائر ابو لبدة]

اها ..

^

^

^

دخلت yaya النقاش ..

وردت على ردود سابقة ..

وقالت انو الحب موجود والخير موجود والبلد ايد وحدة ..

ومش شايفة الشي اللي عم تحكو عنو ..

يا ندين وليل الهجر وعماد بوجه .. الخ ..






yaya بتنضم للفريق الاول ..

البلد ناقصه محل اكسسوارات .. مطعم راقي .. الخ ..

[عماد بوجه]

السلام عليكم
مع كل الأحترام للكلام الي بتحكي الأخت (yaya )
أنا بعرف أكثر من محل في البلد فتحوا ومشان الله وفقهم وكان مشروعهم ناجح صاحب المحل(المأجر)
مشان بحبهم غلى عليهم الأجار ضعفين
وفي كمان محل فتح ونجح صاحب المحل أطلع المتأجر مشان يفنح محلو (وبعدين بدكم مشاريع ومحلات )
كال في محبه؟؟؟؟؟؟؟؟؟؟؟

[غزاوي في البلد]

بسم الله الرحمن الرحيم
السلام عليكم
العيسوية بحاجة الى:
1. اكمال مشروع المجاري، حيث تم مد 13500 متر من شبكة المجاري في البلد وباقي 1500 متر وبالتالي منتخلص من الجور والتي هي مكرهة صحية من الدرجة الاولى.
2. اكمال مشروع تصريف مياه الامطار، وذلك لتقليل مستوى الاضرار حين حدوث الفياضانات كما حصل قبل 6 اشهر.
3. المحافظة على النظافة في البلد، القيام باعمال النظافة شيء مطلوب، ولكن ماذا فعلنا لنحافظ عليها، يا جماعة منذ سنوات يوجد شاب موظف يقوم كل يوم باعمال النظافة، فهل خطر ببالنا ان نحافظ ولو قليلاً على عمل هذا الموظف ون لا نقوم بالقاء النفايات بالشارع، من فينا يرشد اطفاله ومن حوله، وانتم يا اهل البلد وطلاب المدارس يا حبذا لو تقوموا يوماً بالقيام بعمل تطوعي للحافظ على النظافة ( اقتراح ). كذلك اقترح القيام بتكريم هذا الشاب الذي يخدم البلد دون كللٍ او ملل.
4. موضوع توعية طلاب المدارس بموضوع السلامة على الطرق، يا جماعة طلاب المدارس بمشوا على الشارع وتاركين الرصيف فاضي ... وتوعية سائقي السيارات ان لا يصفوا سيارتهم على ارصفة المشاة، كي لا يدفعوا باولادنا للمشي بالشوارع .. اولادنا اكيادنا .. تمشي على الارض.
5. فيما يتعلق بالمحلات والمطاعم او فرع بريد او بنك ... هذه قضايا اقتصادية ربحية .. يقومون بفحص الربح والخسارة ودراسة الجدوى الاقتصادية فيها ولا نستطيع الزام احدٍ فيها.
6. الحدائق العامة: اعتقد ان البلد بحاجة الى حدائق عامة وملاعب للاطفال مع منشاءات والعاب اطفال، فبدلاً من لعبهم بالشارع بامكانهم ان يقضوا اوقاتهم في هذه الحدائق، وان تحقق هذا، يجب المحافظة عليها وعدم تخريبها.
7 . وهنا اطرح قضية التوعية بالمحافظة على الاملاك العامة: يا أخي ليش بنخرب الاشياء الحلوة بالبلد، لا افهم لماذا يتم تخريب الملعب الغربي الخاص بالاطفال؟، لماذايتم سرقة المدارس؟، لماذا يتم خلع لوحات اسماء الشوارع؟، لماذا يتم حرق وتخريب حاويات النفايات؟، لماذا يتم حرق وقلع الاشجار؟، لماذا يقوم البعض بكسر كشافات الانارة الخاصة بالشوارع ؟... لماذا؟ ... والماذا؟
واخيراً، لا اريد ان اطيل عليكم، ولكن يجب ان اتناول الجانب المعنوي ايضاً واقول ان هناك نواة من اهل الخير في العيسوية، نعم فبالرغم مما ذكر اعلاه على يد الزملاء الاعزاء، وبالرغم من كل الامور السلبية، الا انه توجد مجموعة في البلد تعمل من اجل خير ورفاهية العيسوية، يعملون بصمت ودون ضجة وقلوبهم مليئة بالحنان والعطف والاحسان وقلوبهم صافية، لا تعرف الحقد ولا العنصرية ولاالتفرقة، ويقفون مع الحق ولا يخافون بالله لومة لاءمٍ، ولا اجر لهم الا الثواب، فلهم منا كل الشكر والاحترام.
واخيراً اشكر ابو وديع على طرح هذا الموضوع للنقاش واشكر نخال على جهوده.
والسلام عليكم

[ثائر ابو لبدة]

نصل الى عماد بوجه

المحبة غير موجودة في بلدي العيساوية للأسف ..

اول اشي تتوفر المحبة بعدين المشاريع ..

غزاوي انضم للفريق الاول

وقال انو العيساوية بحاجة الى مشاريع كثيرة

مثل مشاريع الصرف الصحي .. مشاريع تصريف مياه المطر .. الحدائق العامة

^
^
^
الى هنا وصل النقاش

[ثائر ابو لبدة]

هناك اجماع بأن العيساوية تفتقر الى ..

. استيديو تصوير

. حدائق عامة

. مركز ثقافي

. اماكن تواجد الشباب : نادي . مقهى . مكتبة .. الخ ..

[ام الفدا]

مشكور اخ ابو وديع على المو ضوع الرائع ويا ريتيكون في بلدنا مراكز تعليمية لطلاب الثانوية وخاصة دروس تقوية بالغة الانجليزية لان اللغة الانجليزية معدومة في هالبلد وشكور وتحياتي

[loving you makes life]

مشكور اخ وديع بس انا بقدم شكر خاص للاخ حنضله كل الاحترام والتقدير الك والله صدقت وشكور اكتير تحياتي الك من القلب لصاحبي وحبيبي حنضله والله العظيم صدقت حب لااخيك كما تحب لنفسك

[ثائر ابو لبدة]

ام الفدا انضمت للفريق الاول

مراكز تعليمية ..

loving you makes life انضم للفريق الثاني

احب لأخيك ما تحب لنفسك ..

ونكمل النقاش

^
^
^

[ثائر ابو لبدة]

لقد تم افتتاح هذا النقاش ..

لمعرفة الى ماذا تفتقر العيساوية ..

وكان المقصود الجانب المادي ..

من مباني . مراكز . اماكن تجارية . محلات ..

ولكن من خلال ردودكم تفرع الموضوع الى شقين ..

شق مادي وشق معنوي ..

فأدركت بالنهاية ان العيساوية تفتقر الى الحب و الاخلاص و التعاون .. الخ ..

قبل ان تفتقر للمباني الحجرية والخدمات وغير ذلك ..

[ام الفدا]

مشكور ويا ريت يكون في مراكز تقوية باللغة الانجليزية وخاصة للثانوية

[ღஜ¸¸MUNTASER¸¸ஜღ]

مشكور اخي القدير ابو وديع على الطرح العظيم..
البلد بحاجه لاشياء ماديه وكل اهل البلد بامكانهم انهم يوفروها مثلا لانشاء مركز ثقافي....
وبحاجه لمساعده معنويه بانو الكل يكونو ايد وحده وما يحاولو يفرقو ويخربو بالقرارات عشان ينجح المشروع..

[ابو كايد]

مرحبا
انا من رائي القريه بحاجه الى
1_ استديو تصوير
2_حديقه عام لاطفال البلد مرجيح
3_محلات بيع ملابس
4_مطاعم
5_فرن تاني وثالث
6_مكتبه
7_مراكز او مؤسسه لخدمات بشؤون الحالات الخاصه
واشياء كتير
بسم الله الرحمن الرحيم
السلام عليكم جميعا ورحمة الله وبركاته
قريباً سنحرر مقالة مركزة ومسؤولة وموضوعية قد تشفي غليلكم
وأملي بفضل من الله وهمتكم أن نصل جميعا لما نتوق إلية على
أن لا نبقى في حيص وبيص فوالله الخير فيكم يا شباب ويا صبايا
لا نريد قول دون تطبيق .. فمن قال الناس هلكى فهو أهلكهم.........
.بمعنى لنكن القدوة ونضحي ونتابع فالمهم الناقد /ة فيكم أن يكون مستعد لمشروع
تطوير القرية وترك القال والقيل والإنشغال فيما يقوله الناس
والعمل على تأهيل ذاتنا للمستوى الذي يتناسب مع ثقافتنا وعاداتنا وتقاليدنا
بما لا يتنافى مع شرع الله عز وجل
بهذا كله ومن وجهة نظري سيتم وضع النقاط على الحروف وإلى أن نلتقي بطرح مشروع عملي وفعّال
والذي هو قيد التحضير نأمل أن يكتب الجميع بأسلوب وكأنه يود عمل مشروع
لا أن نقول بدنا وبدنا ويمكن ومش ممكن, فواجب الحال يا جماعة بداية نحتاج إلى تخطيط
وتأهبل ومن ثم العمل والمتابعة مع التضحيات الصادقة............إلخ
تحياتي لكم............... والله ولي التوفيق
وبخصوص .............1_ استديو تصوير في وقت لاحق سيكون تصوير من خلال مشروعنا للخدمات الطلابية ,وللمعاملات الرسمية ,, فانتظرو ا إفتاحية المركز قريباً حيث تأخرنا وبصدق
من البدء في العمل رسمياً لأسباب إدارية وفنية
محمد أبو داوود درويش
12/11/07

[ثائر ابو لبدة]

منتصر يؤيد الفريقين

العيساوية بحاجة لمركز ثقافي والامكانيات للعمل موجودة ..

وانشالله يتحقق هذا الامر ..

وانشالله بصيروا اهل العيساوية ايد وحدة ..


ابو كايد

تطوير القرية وترك القال والقيل والإنشغال فيما يقوله الناس ..

والعمل على تأهيل ذاتنا للمستوى الذي يتناسب مع ثقافتنا وعاداتنا وتقاليدنا ..

بما لا يتنافى مع شرع الله عز وجل ..

وقريبا هناك استيديو نصوير ومركز خدمات طلابية ..

^
^
^
ارائكم لها اذان صاغية ..

ونقاشكم هنا يدل على محبتكم لقريتكم العيساوية ..



والنقاش مستمر يا اخوان ..

[ياسمينة النهار]

مع الاحترام للجميع الذين ادلو بأرائهم
اريد ان اسال اين المحبه والالفه اذا لم يقبل الاخ بفتح طريق لاخيه للمرور.......
العيساويه تحتاج الى الكثير...
تحتاج الى نظام سير ونظافه الطرق تنظيم المجاري توسيع الطرق
كثير من اهالي العيساويه يعارضون اعطاء القليل من اراضيهم لتوسيع الطريق
وهناك الكثير يمنعون السكان من الوصول الى بيوتهم يغلقون الطريق بواسطة سلاسل حديديه او بعض الحجاره
والسيارات الموجوده على الارصفه اكثر من اللتي على الشارع
طلاب المدارس لا يستطيعون السير على الرصيف ويسيرون بمنتصف الشارع لعدم تمكنهم من السير على الرصيف لكثرت السيارات المصفوفه على الرصيف
هل الحدائق اهم؟؟؟
ام الاستديوهات
ام المطاعم
المخابز موجوده ولكنها تغلق ابوابها باكر
الحديقه التي كانت في اول البلد اصبحت دمار
فتح استديو (ولاء) ولم يكمل السنه
حتى المطاعم لم تنجح
وهذا يعود الى ماذا ؟؟؟
اذافتح نقاش جاد وموسع بخصوص هذا الموضوع هناك الكثير من الشكاوي والاقتراحات
كتير من الامور التي تفتقر لها العيساويه السبب يرجع لعدم الوحده
المحبه
النظام
النظافه
المحافظه على هذه الاماكن كي تنجح وتنمو وتتطور
الموضوع الذي يجب ان يطرح لماذا لاينج شي بالعيساويه؟؟؟

[عيون السهر]

كل الشكر لكل من بدو تصير بلو منور ولؤلؤة تضوي
انا بدي اعلق على شي ما في مكان بالدنيا كامل متكامل ومتل ما بقول المتل على قد لحافك مد رجليك بس في هناك امور ضرورية بتهم الناس وممكن بتغلبو لما بحتاجوها انا برائيئ بدنا سوق خضرة متل العالم بدنا تكون بلدنا نظيفة بدنا تكون شوارعنا نظيفة وحلوة ع فكرة في بمنطقة الكروم بنص الشارع كومة تراب احمر والشتا جاي ويلي بدو يمر بسيارة لازم يكون محضر تراكتور يجرها واحنا ازا بدنا نمشي لازم نلبس جزم
الله يوفق كل من جد لبلده والله يعين كل من عمل لبلده

[ابو كايد]

بسم الله الرحمن الرحيم

حقاً المداخلات واقعية والكل يتحمل مسؤولياته بأسلوب أو بآخر

فمن فال ويقول...

كثير من اهالي العيساويه يعارضون اعطاء القليل
من اراضيهم لتوسيع الطريق

صحيح النقاش حر وصريح والصراحة راحة
بشكل عام أقول : الكلمة خارجة ومكتوبة فعلينا أن نتروى ونتحرى المفردات الأنسب
والعبارت التي تحببنا في بعض وتتعالج نفس ما نتوف إليه

فكلمة...اهالي العيساويه يعارضون اعطاء القليل

قد تكون صفة غالبة ولكن الكل يعارض في مثل هذه المسائل في قرانا ومددنا
إلاّ ما رحم ربي أو من له مصلحة مشتركة أو يطبق عليه القانون أو هيمنة غيره عليه
فوضعنا لا نحسد علية... الكل بيشتغل على راسه وبيعمل خلاصة وبيقول أنا الصحيح
و بيقول : يا أرض هدّي وما قي عليكي حدا قـــدي ................ههههههههههه
أمر مضحك مبكي!!!!!!
فكما قلت سابقاً بدنا قول وفعل وتطبيق وكمان حركة وفي الحركة بركة

وتأكدوا عامل القدوة هو المهم لا أن نكتب ونناقش وخلاااااااص المهم فشينا قلبنا
أرى إللي بيكتب وبيقول وبتهمه مصلحة البلد ومستعد لخدمتها ليقم بتفعيل ذاته
ومؤسساته فليكن لسانكم رطباً في الأفراح والأتراح وعموم المناسبابات
فالكل يستطيع الكلام والتعبير عن كل ما هو لازم ...

فأكرر قولي السابق
يا ريت إدارة المنتدى والجمعيات والنوادي والمراكز والمؤسسات والشباب والصبايا
كل في مجاله وإمكانياته وقدراته أن يكون القدوة ويقوم بمشروع ما سهل
وممكن تنفيذه على أرض الواقع لما يتطلبه واجب الحال ولو كل في محيطه

وبعدين بنقوم بمشروع غيره... وهيك الناس بتشوف الشباب مهتمة ببلدها
وما بتميز بين حارة وحارة أو بين فلان وعلاّن............!!! واتركوكم من المنفلشين والشواذ
وسيروا إلى الأمام لعل هذه الخطوة تكون عامل مهم لإصلاحهم
وبعدين لمّا بتكون مشكلة ما مثل فتح طريق أو غير ذلك بروحوا الشباب يحلوها
والناس أكيد ما بتمنعهم .. وأكيد ستكون مواجهة وعناد وعدم تعاون ولكن لا بد من مستجيب
فالأمور بخواتيمها.. لأن الخير في الناس موجود

ولكن نحتاج إلى صبر وقدوة حسنة ومتابعة ولنتوكل على واحد أحد

وصدقوني جمعياتنا ونوادينا ومؤسساتنا ومراكزنا مقصرة نوعاً ما
وبنظري الإنجازات تأخذ طابق المحسوبيات والأيديولوجات وقد تشملها العشائريات
لأنه ما في متابعة...وشو بدي أقولكم الوجع في الراس والحال زي بعضة
أكيد بنحتاج للمبادرة ومين أول من يعلق الجرس والله ولي التوفيق

فيا جماعة هذه مسائل عامة متواجدة في كل مدينة وقرية
وكلنا في الهم شرق وقد تكون قرية أو مدينة أو حارة أهون من غيرها

وأستميحكم العذر
والله ولي الصابرين
خادمكم محمد أبو داوود درويش
14/11/07

[ضياء المجد]

بسم الله الرحمن الرحيم

أحمدك ربي وأصلي وأسلم على حبيبك المصطفى، اللهم لا سهل إلا ما جعلته سهلا وأنت تجعل الحزن إذا شئت سهلاً

أبدأ بقول الله تعالى: ( وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ وَسَتُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُمْ بِمَا كُنْتُمْ تَعْمَلُونَ )

وليعلم كل واحد منا أنه مسؤول، والعمل بحاجة إلى نية صادقة وإخلاص يبدأ به كل منا مع نفسه

أما بلدتنا ..
بحاجة إلى وحدة وتماسك، وليكن شعارنا دوماً إلى الأفضل، ولنشهد الأمة أننا رغم كل التحديات، سنبقى يداً واحدة متماسكة وحدتنا هي الأساس، الإخوة أبناء البلد الواحد

بحاجة إلى الشباب المؤمن الذي يتطلع لمستقبله، ولو تطلع الشباب لمستقبلهم لما رأينا الشباب يجلسون على عتبة المسجد في وقت الصلاة، دون أن تتوق أنفسهم لسماع الأذان أو التفكير في الصلاة، ولما رأينا الشباب يركضون حول متاع زائل
ألا تعلم أيها الشاب أنك ستحاسب أمام الله، وأمامك طريقان في النهاية، إما إلى جنة وإما إلى نار، والله يا إخواني لا أقول هذا إلا من حرقتي عليكم، من حرقتي على أهلي وإخواني، فليقف كل واحد منا ليحاسب نفسه

ماذا قدمت لنفسك ؟ ماذا قدمت لمجتمعك ؟ ماذا قدمت لدينك ووطنك ؟؟؟

يا إخواني .. والله لا ينفعكم هذا الحال أبداً، ولو بدأ كل واحد بنفسه لانقلبت حياتنا رأساً عن عقب، لانقلبت حياة الهم والغم والنكد -وكثير من يشكو هذا الحال في هذه الأيام- إلى حياة طيبة كريمة مبنية على المودة والألفة والأخوة
وذكر ذلك الله تعالى قائلاً ( ومن أعرض عن ذكري فإن له معيشة ضنكاً، ونحشره يوم القيامة أعمى )

فوالله إن هذا ما نحتاج إليه قبل كل الماديات، بحاجة إلى من يغير حال الأمة، أين صفات القادة التي يتمتع بها الشباب اليوم
( إن الله لا يغير ما بقوم حتى يغيروا ما بأنفسهمم )

أين أمثال الصحابة الكرام، الذين حملوا هم الدعوة وهم شباب صغار في مقتبل العمر، هذا مصعب وهذا علي، وذاك أبو بكر ومعاوية وعمر بن الخطاب، كأمثالهم نريد شباب أمتنا، شباب بلدتنا، فأين نحن منهم ؟!!!


أما من الناحية المادية، نحن بحاجة إلى مواقف للسيارات، وأماكن لتجميع النفايات حتى لا تغلق الشوارعَ الحاوياتِ، وبحاجة إلى ستوديوها، وأماكن عامة، كما بحاجة إلى الكثير من المشاريع التي تقوم على ذكر الله، حتى لا يعصى الله بسببنا فنكون من الهالكين، ووالله لن تكون هذه إلا بكون الجانب المعنوي والتربوي الذي ذكرت


نعم .. أحبتي في الله، فليبدأ كل واحد منا بنفسه قبل القيام بأي عمل، أو حتى الكلام، وانظروا حال البلدة كيف يكون إذا استمعتم لي، بل أقول لا تسمعون لي، بل اسمعوا لكلام الله العزيز الجبار، فالق الحب والنوى، خالقنا ورازقنا وهو الأولى بالطاعة ورسوله أحق بالاتباع، أقول قولي هذا وأستغفر الله لي ولكم، وأسأل الله أن تكونوا ذوي آذان صاغية، تستمعون إلى الطيب من القول وتتبعون أحسنه، وشكراً جزيلاً لكم

دمتم بود

[صمت الناي]

برأي العيساوية
ناقصها شباب يخافوا على بنات الناس زيما بخافوا عرض وشرف خواتهن
ومكان هادي
يعطيك العافية

[ثائر ابو لبدة]

ابو كايد ..

ناصر دين الله ..

راما ..

الأعضاء والمشرفين الاحباء ..

نشكر لكم هذه الاراء الصريحة ..

ونشكر لكم التزامكم بقوانين هذا القسم ..

وبالنهاية ..


تم الاجماع بأن العيساوية بحاجة الى :

الناحية المادية : مواقف سيارات . استيديو تصوير . مراكز ثقافية . مكان لسهرات شبابية هادئة . منتزه عام .

الناحية المعنوية : حب و مودة . تماسك وترابط . الكل يكون ايد واحدة . شباب مؤمن .

[ثائر ابو لبدة]

السلام عليكم ورحمة الله وبركاته

سيتم طرح الموضوع التالي بعنوان ( ما هو هدفك عندما ترد على المواضيع ؟؟ )

فكرة الأخ أبو عطا إن شاء الله

تم إغــلاق الــمــوضــوع